ନୂଆଦିଲ୍ଲୀ,୬-୧୧: ଲଗାତାର ଦ୍ୱିତୀୟ ମାସ ଲାଗି ଦେଶର ସର୍ଭିସ ସେକ୍ଟରରେ ମନ୍ଥର ଅବସ୍ଥା ଲାଗି ରହିଛି। ଏହି ସମୟରେ ଦେଶର ସେବା କ୍ଷେତ୍ର କାର୍ଯ୍ୟକଳାପ ହ୍ରାସ ହୋଇ ୪୯.୨% ସ୍ତରରେ ରହିଛି। ୨୦୧୭-୧୮ ଆର୍ଥତ୍କ ବର୍ଷରେ ଏଭଳି ଲଗାତାର ଭାବେ ଦୁଇଟି ତ୍ରୈମାସ ଧରି ସର୍ଭିସ କ୍ଷେତ୍ର କାର୍ଯ୍ୟକଳାପ ହ୍ରାସ ହୋଇଥିଲା। ଏଭଳି କାରଣ ଯୋଗୁ କମ୍ପାନୀଗୁଡିକର ବାଣିଜି୍ୟକ ଆତ୍ମବିଶ୍ୱାସ ନିମ୍ନ ସ୍ତରରେ ରହିଥିବା ଏକ ଅଧ୍ୟୟନରୁ ସାମ୍ନାକୁ ଆସିଛି। ଆଇଏଚ୍ଏସ୍ ମାର୍କିଟ ସର୍ଭିସେସ୍ ପରଚେଜିଂ ମ୍ୟାନେଜର୍ସ ଇଣ୍ଡେକ୍ସ ୪୯.୨%କୁ ବଢିଛି। ଏହା ସେପ୍ଟେମ୍ବରରେ ୪୮.୭% ରହିଥିଲା। ଉକ୍ତ ବର୍ଗରେ ୫୦%କୁ ସୀମା ଭାବେ ଧରା ଯାଉଛି। ହେଲେ ପରଫରମାନ୍ସ ଲଗାତର ଭାବେ ୫୦% ଠାରୁ ନିମ୍ନରେ ରହିଛି। ଏହା ସ୍ପଷ୍ଟ ଭାବେ ସୂଚାଉଛି ଯେ, ସେବା କ୍ଷେତ୍ରରେ କାର୍ଯ୍ୟକଳାପ ଧାରା ନିମ୍ନଗାମୀ ସ୍ତରରେ ରହିଛି।
ପାର୍ବଣ ଚାହିଦା ଯୋଗୁ ଅକ୍ଟୋବରରେ କିଛିଟା ଉନ୍ନତି ହେବ ବୋଲି ଆଶା କରାଯାଉଥିଲା। ଯାହା ୧୪ ବର୍ଷର ସବୁଠାରୁ ନିମ୍ନସ୍ତର ବୋଲି ରିପୋର୍ଟରେ ଉଲ୍ଲେଖ ରହିଛି। ଅର୍ଥବ୍ୟବସ୍ଥାରେ ବର୍ତ୍ତମାନ ବିଭିନ୍ନ ଚ୍ୟାଲେଞ୍ଜ ରହିଥିବାରୁ ଏହାକୁ ନେଇ ବଜାର ବିଶେଷଜ୍ଞମାନେ ଚିନ୍ତା ପ୍ରକଟ କରିଛନ୍ତି। ବାଣିଜ୍ୟ କାର୍ଯ୍ୟକଳାପ, ଚାହିଦା ହ୍ରାସ ହେବା ଯୋଗୁ ସେବା କ୍ଷେତ୍ର ପରଫରମାନ୍ସ ନିମ୍ନଗାମୀ ହେଉଥିବା ଏକ ଚିନ୍ତାଜନକ ବିଷୟ ବୋଲି ଆଇଏଚ୍ଏସ୍ ମାର୍କିଟର ପ୍ରମୁଖ ଅର୍ଥନୀତିଜ୍ଞ ପଲିମା ଡେ.ଲୀନା କହିଛନ୍ତି। ସେବା କ୍ଷେତ୍ରରେ ୨୬ ମାସ ଧରି ନିଯୁକ୍ତି ବଢିଥିଲେ ମଧ୍ୟ ଏଥିରେ ମାନ୍ଦାବସ୍ଥାର ପ୍ରଭାବ ଦେଖାଯାଇଛି। ମାତ୍ର କିଛି କମ୍ପାନୀ ଅତିରିକ୍ତ କର୍ମଚାରୀ ରଖିବାକୁ ମନ ବଳାଉଛନ୍ତି। ଏହାବାଦ ଅକ୍ଟୋବରରେ ମାନୁଫାକଚରିଂ କାର୍ଯ୍ୟକଳାପ ଅକ୍ଟୋବରରେ ୨ ବର୍ଷର ସର୍ବନିମ୍ନ ସ୍ତରକୁ ଖସିଥିବା ଅନ୍ୟ ଏକ ସର୍ଭେରେ ପ୍ରକାଶ ପାଇଛି। ମୋଟାମୋଟି ଭାବେ କହିବାକୁ ଗଲେ ଚଳିତ ବର୍ଷ ଅକ୍ଟୋବରରେ ଦେଶର ଘରୋଇ କ୍ଷେତ୍ର କାର୍ଯ୍ୟକଳାପ ହ୍ରାସ ଘଟିଛି। ଶିଳ୍ପ ସଂସ୍ଥାଗୁଡିକରୁ ଉତ୍ପାଦନ ମଧ୍ୟ କମିଛି।
