ନୂଆଦିଲ୍ଲୀ,୨୩।୩: କରୋନା ସଂକ୍ରମଣର ମୁକାବିଲା ନେଇ ଭାରତ ସରକାର ସ୍ବତନ୍ତ୍ର ରଣନୀତି ପ୍ରସ୍ତୁତ କରିଛନ୍ତି। ଏହି ମର୍ମରେ ସ୍ବାସ୍ଥ୍ୟ ମନ୍ତ୍ରଣାଳୟ, ବହିର୍ବ୍ୟାପାର ମନ୍ତ୍ରଣାଳୟ ଏବଂ ଇଣ୍ଡିଆନ୍ କାଉନସିଲ୍ ଅଫ୍ ମେଡ଼ିକାଲ ରିସର୍ଚ୍ଚ(ଆଇସିଏମ୍ ଆର୍) ପକ୍ଷରୁ ଆୟୋଜିତ ଏକ ମିଳିତ ଗଣମାଧ୍ୟମ ସମ୍ମଳନୀରେ ଗୁରୁତ୍ୱପୂର୍ଣ୍ଣ ସୂଚନା ଦିଆଯାଇଛି। ଏହାଦ୍ୱାରା ଆତଙ୍କିତ ଲୋକଙ୍କୁ ଆଶ୍ୱାସନା ମିଳିଛି। କରୋନା ସଂକ୍ରମଣରୁ ଦୂରେଇ ରହିବା ପାଇଁ ଆଇସୋଲେଶନ୍ ଏବଂ କ୍ୱାରାଣ୍ଟାଇନ୍ ଉପଯୁକ୍ତ ମାଧ୍ୟମ ବୋଲି ଉପସ୍ଥିତ ଅଧିକାରୀ ସୂଚନା ଦେଇଛନ୍ତି। ୧୪ ଦିନ ଆଇସୋଲେଶନ୍ରେ ରହିଲେ ପ୍ରାୟ ୮୦ ପ୍ରତିଶତ ସଂକ୍ରମିତ ଆପଣାଛାଏଁ ସୁସ୍ଥ ହୋଇ ଯାଇଥାନ୍ତି। ତେବେ ୫ ପ୍ରତିଶତ ସଂକ୍ରମିତଙ୍କୁ ହସ୍ପିଟାଲରେ ଭର୍ତ୍ତି କରିବାକୁ ପଡ଼ିଥାଏ। ସେହିପରି କୌଣସି ଲକ୍ଷଣ ପ୍ରକାଶ ପାଇଲେ ନମୁନା ଯାଞ୍ଚ୍ କରାଯିବା ଉପରେ ଅଧିକାରୀ ଗୁରୁତ୍ୱାରୋପ କରିଛନ୍ତି। ବିନା ଲକ୍ଷଣରେ ହସ୍ପିଟାଲରେ ଅଯଥା ଭିଡ଼ ଜମାଇବା ଅନାବଶ୍ୟକ। କରୋନା ସଂକ୍ରମିତଙ୍କ ଛେପରୁ ସଂକ୍ରମଣ ହେଉଥିବା ଆଇସିଏମ୍ଆର୍ ମହାନିର୍ଦ୍ଦେଶକ ବଳରାମ ଭାର୍ଗବ ସୂଚନା ଦେଇଛନ୍ତି। ଏହା ବାୟୁରେ ସଂକ୍ରମିତ ହୋଇ ନ ଥାଏ ବୋଲି ସେ କହିଛନ୍ତି। ଭାରତରେ ପ୍ରତି ସପ୍ତାହରେ ୬୦-୭୦ ହଜାର ଲୋକଙ୍କ ନମୁନା ଯାଞ୍ଚ୍ ହୋଇପାରିବା ଭଳି ସୁବିଧା ରହିଛି। ତେବେ ନମୁନା ଯାଞ୍ଚ୍ ପାଇଁ ଇତିମଧ୍ୟରେ ୬୦ ଘରୋଇ ଲ୍ୟାବ୍ ପଞ୍ଜିକରଣ କରିଛନ୍ତି। ଆଖିବୁଜା ଭାବେ ନମୁନା ଯାଞ୍ଚ୍ କରାଯିବ ନାହିଁ ବୋଲି ସେ ସୂଚନା ଦେଇଛନ୍ତି।
