ଲକ୍ଷ୍ନୌ,୨।୭: ଡାକ୍ତର ଜଣେ ରୋଗୀଙ୍କୁ ମୃତ ଘୋଷଣା କରିବା ପରେ ସମ୍ପର୍କୀୟମାନେ ମୃତଦେହ ସଂସ୍କାର କରିବାକୁ ନେବା ପୂର୍ବରୁ ଘଟିଲା ଆଶ୍ଚର୍ଯ୍ୟ ଜନକ ଘଟଣା। ମୃତ ଘୋଷିତ ବ୍ୟକ୍ତିଙ୍କ ହାତ ଗୋଡ ଚାଲୁଥିବା ଲକ୍ଷ୍ୟ କରିଥିଲେ ତାଙ୍କର ଜଣେ ସମ୍ପର୍କୀୟ ଆଉ ଏହା ଜାଣିବା ପରେ ତୁରନ୍ତ ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିଲା। ଏବେ ସେ ଭେଣ୍ଟିଲେଟରରେ ଥିବା ଜଣାପଡିଛି। ତାଙ୍କର ବ୍ରେନ୍ ଏପର୍ଯ୍ୟନ୍ତ ଡେଡ୍ ହୋଇନି ବୋଲି ଏବେ ତାଙ୍କୁ ଚିକିତ୍ସା କରୁଥିବା ଡାକ୍ତର କହିଛନ୍ତି। ସୂଚନାଯୋଗ୍ୟ, ମହମ୍ମଦ ଫାରୁକ ନାମକ ଜଣେ ଯୁବକ ଜୁନ୍ ୨୧ରେ ଦୁର୍ଘଟଣାର ଶିକାର ହୋଇଥିଲେ। ଏହାପରେ ତାଙ୍କୁ ଚିକିତ୍ସା ଲାଗି ଏକ ଘରୋଇ ହସ୍ପିଟାଲରେ ଭର୍ତ୍ତି କରାଯାଇଥିଲା। ସେଠାରେ ଚିକିତ୍ସା ଚାଲିଥିବା ସମୟରେ ଗତ ସୋମବାର ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଫାରୁକଙ୍କ ଭାଇ ମହମ୍ମଦ ଇରଫାନ୍ କହିଛନ୍ତି ଉକ୍ତ ଘରୋଇ ହସ୍ପିଟାଲରେ ସେମାନେ ଚିକିତ୍ସା ବାବଦକୁ ପ୍ରାୟ ୭ ଲକ୍ଷ ଟଙ୍କା ଦେଇଛନ୍ତି। ହେଲେ ଧୀରେ ଧୀରେ ଟଙ୍କା ସରିଯିବା କଥା ଡାକ୍ତର ଜାଣିବା ପରେ ସୋମବାର ଫାରୁକଙ୍କୁ ମୃତ ଘୋଷଣା କରିଥିବା ଭାଇ ଇରଫାନ ଅଭିଯୋଗ କରିଛନ୍ତି।
