ଅତାବିରା, ୧୭।୭ (ଡି.ଏନ୍.ଏ): ଆମର ସମାଜରେ ଅନେକ ଲୋକ୍ ପିଲାଛୁଆ ବିହାଚୁରା କରିସାଏଲେ, ଚାକରିରୁ ଅବସର ନେଲେ ଘରେ ବସି ରହୁଛନ୍। ଯେନ୍ଥିରଲାଗି ବିନା କାମ୍ଧଁଦାରେ ସେମାନେ ଅନେକ ସମିଆରେ ମାନସିକ୍ ଚାପ୍ରେ ରହେବାର ସଂଗେ ତାହାକୁ ନାନା ରୁଗ୍ଦୁଖ୍ ମାଡ଼ି ବସୁଛେ। ହେଲେ ସମାଜରେ ଏନ୍ତା ବି ଲୋକ୍ ଅଛନ୍ ଯେନ୍ମାନେ ଫିଦିନ କାମ୍ ନାଇଁ କଲେ ତାକର ମନ୍ ପଏରଛା ନାଇଁଲାଗେ। ଏନ୍ତା ଗୁଟେ ଉଦାହରନ୍ ଦେଖ୍ବାକେ ମିଲିଛେ ବରଗଡ଼ ଜିଲା ଭେଡ଼େନ ବ୍ଲକ ଦେଶଭଟିଲି ପଁଚେତ୍ ଅଧୀନ ଉଦେପୁର ଗଁାରେ।
ଉଦେପୁର ଗଁାର ଦୁଇ ବୁରୁଧ୍ ରାତ୍ର ସେଟ(୭୫) ଆର ହଳ ଝାଙ୍କର(୮୦)। ଦୁଇ ବୁରୁଧ୍ ନିଜର ନିଜର ଛୁଆପିଲା ବିହାଚୁରା କରି ନାତି ନାତେନ୍ ଦେଖ୍ଲେନ। ଏହେଦେ ସେମାନେ ନାତି ନାତେନକର ସଂଗେ ମଜାମଜଲିସ କରବାର ସଂଗେ ପୁଓ ବହରନୁ ସେବା ଯତନର ଆଶ୍ କରବାର କଥା। ହେଲେ ଦୁଇ ବୁରୁଧ୍ ଘରେ ବସି ରହିବାର ଜାଗାରେ ମହାନଦୀରୁ ମାଛ୍ ମାରି ଦୁଇ ପଏସା ରୁଜଗାର କରୁଛନ୍। ସେନ୍ତା ମାଛ୍ମରାରୁ ଫୁରସତ୍ ପାଏଲେ ଦୁଇ ବୁରୁଧ୍ ପିଁଢ଼ାରେ ବସି ମାଛ୍ମରା ଜାଲ ଗୁଁଥ୍ବାରେ ବାଇ ରହୁଛନ୍। ବଜାରରୁ ଇ ମାଛ୍ମରା ଜାଲ ଘିନ୍ଲେ ୧୫ଶହରୁ ୩ ହଜାର ଟଁକା ତକ୍ ପଡ଼ୁଛେ। ହେଲେ ଦୁଇ ବୁରୁଧ୍ ଅବଛର ସମିଆକେ କାମେ ଲଗେଇ ଦୁଇ ପଏସା କମାବାର ସଂଗେ ନିଜର ମନ୍ ପଏରଛା କରୁଛନ୍। ଇ ବାବ୍ଦେ ସେମାନକୁ ପଚରାଲାରୁ ଘରେ ବସି ରହେଲେ ଜାଂଗଲ ପଡ଼ିଯିବା, ନାନା ରୋଗ୍ ମାଡ଼ି ବସବା। କାମ୍ କଲେ ଦିହିପା ପଏରଛା ଲାଗବାର ସଂଗେ ମନ୍ଟା ବି ସବୁବେଲେ ପରଫୁଲ ରହୁଛେ ବଲି ସେମାନେ କହିଥିଲେ।
