ବନ୍ତଳା, ୧୫।୩(ଡ଼ି.ଏନ୍.ଏ) – ୪ ବର୍ଷ ହେଲା ଟ୍ରାନ୍ସଫର୍ମର ଚୋରି ହୋଇଯାଇଛି। ସେବେଠାରୁ ନୂଆ ଟ୍ରାନ୍ସଫର୍ମର ଲାଗିନି କି ବିଦ୍ୟୁତ୍ ସଂଯୋଗ ହୋଇନି। ତଥାପି ବିଦ୍ୟୁତ୍ ବିଭାଗ ପକ୍ଷରୁ ଚାଷୀଙ୍କ ପାଖକୁ ପଠାଯାଇଛି ବିଲ୍। ଏ ନେଇ ଅନୁଗୋଳ ଜିଲା ନୂଆମୌଜା ପଞ୍ଚାୟତ ଶରଧାପୁର ନିକଟ ବଳରାମପୁର-୨ ଅଞ୍ଚଳବାସୀ ଆଶ୍ଚର୍ଯ୍ୟ ହେବା ସହ ବିଭାଗ ନିକଟରେ ପ୍ରତିବାଦ କରିଛନ୍ତି। ସାଧାରଣ ଉପଭୋକ୍ତାଙ୍କୁ ଏପରି ଭାବେ ଲୁଟ୍ କରାଯାଉଥିବା ସେମାନେ ଅଭିଯୋଗ କରିିଛନ୍ତି।
ଅଭିଯୋଗରୁ ଜଣାଯାଏ, ଅନୁଗୋଳ ବିଦ୍ୟୁତ୍ ଉପଖଣ୍ଡ ସବ୍ଷ୍ଟେଶନ ଅଧୀନ ୧ ନମ୍ବର ସେକ୍ସନ ନୂଆମୌଜା ପଞ୍ଚାୟତ ଶରଧାପୁର ନିକଟ ବଳରାମପୁର-୨ରେ ୨୦୧୬ ଜୁନ୍ ୧ରେ ଅଞ୍ଚଳକୁ ଚାଷ ପାଇଁ ଲଗାଯାଇଥିବା ୨୫ କେଭିର ଟ୍ରାନ୍ସଫର୍ମରଟି ଚୋରି ହୋଇଯାଇଥିଲା। ଚାଷୀମାନଙ୍କ ଅଭିଯୋଗ ପରେ ୨୦୧୬ ଜୁନ ୨୨ରେ ସେସୁ ୧ ନମ୍ବର ସେକ୍ସନର ଜୁନିୟର ମ୍ୟାନେଜର ତପନ କୁମାର ନାୟକ ଥାନାରେ ଅଭିଯୋଗ କରିଥିଲେ। ପୋଲିସ ମାମଲା ରୁଜୁ କରି ତଦନ୍ତ ଚଲାଇଥିଲା। ସେବେଠାରୁ ଉକ୍ତ ସ୍ଥାନରେ ନୂତନ ଟ୍ରାନ୍ସଫର୍ମର ଲଗାଯାଇ ନ ଥିବାରୁ ଚାଷୀମାନେ ଚାଷ କାର୍ଯ୍ୟରେ ଅସୁବିଧାର ସମ୍ମୁଖୀନ ହେଉଛନ୍ତି। ବିଦ୍ୟୁତ ବିଭାଗ ଓ ଏନ୍ଜେଏନ୍ ପକ୍ଷରୁ ମନମୁଖି କାମ କରାଯାଉଥିବା ଯୋଗୁ ଏପରି ହୋଇଥିବା ଉପଭୋକ୍ତା ଚାଷୀମାନେ ଅଭିଯୋଗ କରିଛନ୍ତି। ୪ ବର୍ଷ ମଧ୍ୟରେ କେବେ ବିଦ୍ୟୁତ ବିଲ୍ ଆସି ନ ଥିବାବେଳେ ଗତ ୫ ତାରିଖରେ ହିତାଧିକାରୀ ବଳରାମପୁର-୨ର ଅଶୋକ ରାଏଙ୍କ ନାମରେ ୧୬ ହଜାର ୨୬ ଟଙ୍କାର ଏକ ବିଲ୍ ଆସିଛି। ଅଶୋକଙ୍କ ସହିତ ଅନ୍ୟ ୫ ଜଣ ଉପଭୋକ୍ତାଙ୍କ ନିକଟକୁ ମଧ୍ୟ ବିଲ୍ ଆସିଛି। ଗୋଟିଏ ବିଲ୍ ଫାର୍ମହାଉସ୍ ପାଖରେ ଦିଆଯାଇଥିବାବେଳେ ଅନ୍ୟ ଏକ ନକଲ ବିଲ୍ ଘରେ ଦିଆଯାଇଛି। ହଠାତ ଏଭଳି ବିଲ୍ ଆସିବା ଦେଖି ହିତାଧିକାରୀମାନେ ଅସନ୍ତୋଷ ବ୍ୟକ୍ତ କରିଛନ୍ତି।
ଏ ସମ୍ପର୍କରେ ୧ ନମ୍ବର ବିଦ୍ୟୁତ ସେକ୍ସନ୍ର ଜେଇ ତପନ କୁମାର ନାଏକ କହିଛନ୍ତି, ଭୁଲରେ ବିଲ୍ ପଳାଇଯାଇଛି। ଅଧିକାରୀଙ୍କୁ କହି କାଟି ଦିଆଯିବ। ଏନ୍ଜେନ୍ ଏସ୍ଡିଓ ସତ୍ୟବ୍ରତ ସାମଲ କହିଛନ୍ତି, ଯଦି ବିଲ୍ ପହଞ୍ଚତ୍ଛି ତେବେ ଏହାକୁ ରଦ୍ଦ କରିଦିଆଯିବ। ସେସୁ ଅନୁଗୋଳ ସବ୍ଡିଭିଜନ୍ ଏସ୍ଡିଓ ଶିବ ପ୍ରସାଦ ବଳିୟାରସିଂ କହିଛନ୍ତି, ଏଭଳି ହେବା କଥା ନୁହେଁ। ଏହାର ଅନୁଧ୍ୟାନ କରାଯିବ। ଅନୁଗୋଳ ସେସୁ ଏକ୍ଜିକ୍ୟୁଟିଭ ଇଞ୍ଜିନିୟର ସୁବ୍ରତ ସାହୁ କହିଛନ୍ତି, ଘଟଣାର ତର୍ଜମା କରାଯିବ। ଯଦି ଏଭଳି ହୋଇଛି ତେବେ ଉପଭୋକ୍ତା ବ୍ୟସ୍ତ ହେବାର ଆବଶ୍ୟକତା ନାହିଁ। ବିଲ୍କୁ ରଦ୍ଦ କରାଯିବ। ନୂତନ ଟ୍ରାନ୍ସଫର୍ମର ପାଇଁ ଅଭିଯୋଗ ପତ୍ର ଦାଖଲ କଲେ ତାହା ମଧ୍ୟ ଦିଆଯିବ।
