ବେତନଟୀ,୨୮।୫(ଡି.ଏନ୍.ଏ.): ମୟୂରଭଞ୍ଜ ଜିଲା ବେତନଟୀ ବ୍ଲକ ଅଧୀନ ଏସ୍ଏସ୍ ନହଣ୍ଡାଶୋଲ ପଞ୍ଚାୟତର ଭାଲୁବସା ଗ୍ରାମର ପରେଶ ଚନ୍ଦ୍ର ମହାନ୍ତ(୫୫)ଙ୍କ ବୁଧବାର ବିଳମ୍ବିତ ରାତ୍ରିରେ ନିଜ ଘରେ ମୃତ୍ୟୁ ଘଟିଛି। ତେବେ ତାଙ୍କ ମୃତ୍ୟୁର କାରଣ ଅସ୍ପଷ୍ଟ ଥିଲା ବେଳେ ଏହା କରୋନା ଜନିତ ବୋଲି ସ୍ଥାନୀୟ ଗ୍ରାମବାସୀ ସନ୍ଦେହ କରୁଛନ୍ତି। ଏଥିନେଇ ବେତନଟୀ ପୋଲିସ(ମାମଲା ନଂ-୧୧୯/୨୦)ରୁଜୁ କରିଛି। ସେହିଭଳି ବାରିପଦାରୁ ସାଇଣ୍ଟିଫିକ ଟିମ୍ ତଦନ୍ତ ପାଇଁ ଭାଲୁବସା ଆସୁଥିବାର ସୂଚନା ମିଳିଛି l ବ୍ୟବଚ୍ଛେଦ ରିପୋର୍ଟ ଆସିବା ପରେ ମୃତ୍ୟୁର ପ୍ରକୃତ କାରଣ ଜଣାପଡିବ ବୋଲି ପୋଲିସ କହିଛି l
ସୂଚନାନୁଯାୟୀ, ପରେଶ ଗୁଜୁରାଟର ସୁରଟଠାରେ ଥିବା ଏକ କମ୍ପାନୀରେ ରୋଷେୟା ଭାବେ କାର୍ଯ୍ୟ କରୁଥିଲେ। ସେ ପ୍ରାୟ ୧୦ଦିନ ପୂର୍ବରୁ ସୁରଟରୁ ଫେରି ବେତନଟୀ ବ୍ଲକର ଗରୁଡ଼ବସାଠାରେ ଥିବା ଆଦର୍ଶବିଦ୍ୟାଳୟ ସଙ୍ଗରୋଧ କେନ୍ଦ୍ରରେ ୭ ଦିନ ରହିଥିଲେ l ସେଠାରେ ୭ଦିନ ପୁରିବାପରେ ନିଜ ଘର ଭାଲୁବସା ଗ୍ରାମକୁ ଫେରି ଆସିଥିଲେ l ଫେରିବାର ୩ଦିନ ଅର୍ଥାତ ବୁଧବାର ବିଳମ୍ବିତ ରାତ୍ରିରେ ତାଙ୍କର ମୃତ୍ୟୁ ଘଟିଛି। ନହଣ୍ଡାଶୋଳ ସରପଞ୍ଚଙ୍କ କହିବା ଅନୁସାରେ ସଙ୍ଗରୋଧ କେନ୍ଦ୍ରରେ ତାଙ୍କର କରୋନା ରୋଗର ଲକ୍ଷଣ ଦେଖାଯାଇ ନ ଥିବାରୁ ରକ୍ତ ନମୁନା ମଧ୍ୟ ପରୀକ୍ଷା ପାଇଁ ଯାଇ ନ ଥିଲା l ମାତ୍ର ସୁରଟରୁ ମୟୁରଭଞ୍ଜକୁ ଫେରିଥିବା ଲୋକଙ୍କ କରୋନା ପଜିଟିଭ୍ ବାହାରିଥିବା ବେଳେ ଏହାକୁ ସନ୍ଦେହ କରି ଭାଲୁବସା ଗ୍ରାମବାସୀ ତାଙ୍କ ଘରକୁ ଯିବାକୁ ଭୟ କରୁଥିଲେ। ଏପରିକି ତାଙ୍କ ମୃତ୍ୟୁ ପରେ ମଧ୍ୟ ମୃତଦେହ ନିକଟକୁ ସେମାନେ ଆସି ନ ଥିଲେ l ପରେଶଙ୍କ ସ୍ତ୍ରୀ ସୋମବାରୀ ମହାନ୍ତଙ୍କ ଅଭିଯୋଗକ୍ରମେ ଏବେ ବେତନଟୀ ଥାନାରେ ମାମଲା ହୋଇଅଛି l
