ପୁରୀ ଅଫିସ,୧୬ା୪: ମେ ୩ ତାରିଖ ଯାଏ ଦେଶବ୍ୟାପୀ ଗଡ଼ିବନି ଟ୍ରେନ। କରୋନା ମୁକାବିଲା ପାଇଁ ପ୍ରଧାନମନ୍ତ୍ରୀଙ୍କ ଘୋଷଣା ପରେ ସମସ୍ତ ଯାତ୍ରୀବାହୀ ଟ୍ରେନ ଚଳାଚଳକୁ ବାତିଲ କରାଯାଇଛି। ତେଣୁ ବିଭିନ୍ନ ଷ୍ଟେଶନରେ ଟ୍ରେନ୍ଗୁଡ଼ିକ ଅଟକି ରହିଛି। ପୁରୀ ଷ୍ଟେଶନର ୮ଟି ପ୍ଲାଟଫର୍ମରେ ୨୭ଟି ଇଞ୍ଜିନ ଅଟକି ରହିଛି। ଏଥିସହିତ କରୋନା ଆକ୍ରାନ୍ତଙ୍କ ଚିକିତ୍ସା ଲାଗି ଆଇସୋଲେଶନ କୋଚ ପ୍ରସ୍ତୁତି ଚାଲିଛି। ଏସବୁର ସୁରକ୍ଷା ସହିତ ସନ୍ଦିଗ୍ଧ ବ୍ୟକ୍ତିଙ୍କ ଚଳପ୍ରଚଳ ଉପରେ ନଜର ରଖିଛି ଡ୍ରୋନ। ଅତୀତରେ ଷ୍ଟେଶନରେ କେତେକ ଅସାମାଜିକ କାର୍ଯ୍ୟକଳାପ ଦେଖିବାକୁ ମିଳିଛି। ଅନେକ ଥର ଏଠାରେ ରହିଥିବା ଅବସ୍ଥାରେ ଟ୍ରେନରେ ନିଅଁ। ଲାଗିଛି। ତେଣୁ ବର୍ତ୍ତମାନ ଟ୍ରେନ୍ ଚଳାଚଳ ବନ୍ଦ ରହିଥିବାରୁ ଷ୍ଟେଶନ ପରିସରରେ ଅସାମାଜିକଙ୍କ ଆଡ୍ଡା ଜମିବା ସମ୍ଭାବନା ରହିଛି। ସେହିପରି ଅନ୍ୟ କୌଣସି ଅର୍ନ୍ତଘାତୀ କାର୍ଯ୍ୟକଳାପ ଯେପରି ନ ହେବ ତେଣୁ ବିଭାଗ ପକ୍ଷରୁ ଷ୍ଟେଶନ ଏବଂ ଟ୍ରେନଗୁଡ଼ିକର ସୁରକ୍ଷା, ନିରାପତ୍ତାକୁ ଗୁରୁତ୍ୱ ଦିଆଯାଇଛି। ବୁଧବାରଠାରୁ ଡ୍ରୋନ ସାହାଯ୍ୟରେ ସମ୍ପୂର୍ଣ୍ଣ ଷ୍ଟେଶନ ପରିସର ଉପରେ ନଜର ରଖାଯାଇଛି। ବିଭିନ୍ନ ସ୍ଥାନର ଫଟୋ ମଧ୍ୟ ଉତ୍ତୋଳନ କରୁଛି ଏହି ଡ୍ରୋନ। ଲକ୍ଡାଉନ ଶେଷ ପର୍ଯ୍ୟନ୍ତ ଏମିତି ନିୟମିତ ବ୍ୟବଧାନରେ ଡ୍ରୋନ ମାଧ୍ୟମରେ ସୁରକ୍ଷା ବ୍ୟବସ୍ଥା ଉପରେ ନଜର ରଖାଯିବ ବୋଲି ସୁରକ୍ଷା ଦାୟିତ୍ୱରେ ଥିବା ଅଧିକାରୀଙ୍କଠାରୁ ସୂଚନା ମିଳିଛି।
ସୂଚନାଥାଉ କି, ଗତବର୍ଷ ମାର୍ଚ୍ଚ ୨୨ ହୋଲି ଦିନ ପୁରୀ ଷ୍ଟେଶନରେ ରହିଥିବା ତପସ୍ବିନୀ ଏକ୍ସପ୍ରେସ୍ରେ ଅଗ୍ନିକାଣ୍ଡ ଘଟିଥିଲା। ଏଥିରେ ୩ଟି ସ୍ଲିପର କୋଚ୍ ନଷ୍ଟ ହୋଇଯାଇଥିଲା। ନିଅଁ। ଲଗାଇ ଦେଇଥିବା ସନ୍ଦେହ କରି ଜିଆର୍ପି ୨ ଜଣଙ୍କୁ ଅଟକ ରଖିଥିଲା।
