ଭୁବନେଶ୍ୱର,୨୩।୮(ବ୍ୟୁରୋ): ଶୁକ୍ରବାର ପବିତ୍ର ଜନ୍ମାଷ୍ଟମୀ ଉପଲକ୍ଷେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ରାଜ୍ୟବାସୀଙ୍କୁ ଶୁଭେଚ୍ଛା ଜଣାଇବା ସହ ପୁରୀର ବିକାଶ ପାଇଁ ୫ଶହ କୋଟି ଟଙ୍କାର ପ୍ୟାକେଜ୍ ଘୋଷଣା କରିଛନ୍ତି। ବାତ୍ୟା ଫନୀରେ ଭୁଷୁଡ଼ି ପଡ଼ିଥିବା ବିଭିନ୍ନ ଭିତ୍ତିଭୂମିର ବିକାଶ ସାଙ୍ଗକୁ ଏହାକୁ ବିଶ୍ୱ ଐତିହ୍ୟ ସହର ଭାବେ ଗଢ଼ି ତୋଳିବାକୁ ସେ ସଙ୍କଳ୍ପ ନେଇଥିବା ଏକ ବାର୍ତ୍ତାରେ କହିଛନ୍ତି।
ମୁଖ୍ୟମନ୍ତ୍ରୀ କହିଛନ୍ତି, ପୁରୀ ଓଡ଼ିଆ ଜାତିର ପ୍ରାଣକେନ୍ଦ୍ର। ମହାପ୍ରଭୁ ଆମର ଆତ୍ମା। ଶ୍ରୀମନ୍ଦିର ଓ ମହାପ୍ରଭୁଙ୍କ ସୁରକ୍ଷା ଓଡ଼ିଆ ଜାତିର ଧର୍ମ। ପୂର୍ବରୁ ଏଥିଲାଗି ଓଡ଼ିଆ ଜାତି ଅନେକ ତ୍ୟାଗ କରିଛି। ଅନେକ ବଳିଦାନ ଦେଇଛି। ମହାପ୍ରଭୁଙ୍କୁ ଧରି ଚିଲିକାରୁ ସୋନପୁର ପର୍ଯ୍ୟନ୍ତ ବୁଲିଛି। ବର୍ତ୍ତମାନ ସମଗ୍ର ବିଶ୍ୱ ପାଇଁ ଆତଙ୍କବାଦ ଏକ ବଡ଼ ସମସ୍ୟା ପାଲଟିଛି। ବିଭିନ୍ନ ଧର୍ମାନୁଷ୍ଠାନକୁ ସେମାନେ ଲକ୍ଷ୍ୟ କରୁଥିବା ହେତୁ ଶ୍ରୀମନ୍ଦିରର ନିରାପତ୍ତା ପାଇଁ ଆସୁଥିବା ସୁପାରିଶକୁ କାର୍ଯ୍ୟକାରୀ କରିବା ଜରୁରୀ। ଏଥିରେ କିଛି ପରିବାର ପ୍ରଭାବିତ ହୋଇପାରନ୍ତି। ହେଲେ ମନ୍ଦିରର ସୁରକ୍ଷା ପାଇଁ ଏହି ତ୍ୟାଗ ଗୁରୁତ୍ୱପୂର୍ଣ୍ଣ। ଭବିଷ୍ୟତ ପୀଢ଼ି ପାଇଁ ଶ୍ରୀମନ୍ଦିରକୁ ସୁରକ୍ଷିତ ରଖିବା ଜରୁରୀ। ଏଣୁ ମହାପ୍ରଭୁଙ୍କ ସେବା ଭାବି ଏଥିରେ ସହଯୋଗ କରନ୍ତୁ। ଏହି ତ୍ୟାଗକୁ ଓଡ଼ିଆ ଜାତି ସବୁଦିନ ପାଇଁ ମନେ ରଖିବେ ବୋଲି ସେ କହିଛନ୍ତି।
କ୍ଷତିଗ୍ରସ୍ତ ହେବାକୁ ଥିବା ଘର, ଦୋକାନ ଆଦିର ଥଇଥାନ ନେଇ ମୁଖ୍ୟମନ୍ତ୍ରୀ କହିଛନ୍ତି, ଶ୍ରୀମନ୍ଦିର ସୁରକ୍ଷା ଜୋନ୍ ଅଧୀନରେ ଯେଉଁମାନଙ୍କ ଘର ଅଥବା ଦୋକାନ ଆସୁଛି, ସେମାନଙ୍କର ଥଇଥାନ କରାଯି। ଏପରିକି ଜୋନ୍ରେ ଥିବା ମଠଗୁଡ଼ିକୁ ପୁଣି ଥରେ ଗଢ଼ିବାରେ ସରକାର ସହଯୋଗ କରିବେ। ସହରରେ ଥିବା ମଠଗୁଡ଼ିକୁ ଅଭଡ଼ା ଯୋଜନାରେ ରାଜ୍ୟ ସରକାର ସାହାଯ୍ୟ ଯୋଗାଇ ଦେବେ। ପ୍ରଥମ ପର୍ଯ୍ୟାୟରେ ଏଥିପାଇଁ ୧ଶହ କୋଟି ଟଙ୍କା ରଖାଯାଇଛି। ପୁରୀଧାମର ଗରିମା ବୃଦ୍ଧି ଦିଗରେ କରାଯାଉଥିବା ଉଦ୍ୟମର ସଫଳତା ଲାଗି ସମସ୍ତଙ୍କର ସହଯୋଗ ଲୋଡ଼ୁଛନ୍ତି ବୋଲି ସେ କହିଛନ୍ତି।
