ବାଲିଗୁଡ଼ା,୨୨।୭(ଡି.ଏନ୍.ଏ.): ଶ୍ରାବଣ ମାସ ପ୍ରଥମ ସୋମବାରରେ ମହାଦେବଙ୍କୁ ଜଳାଭିଷେକ ଲାଗି ବିଭିନ୍ନ ଶୈବପୀଠରେ କାଉଡ଼ିଆଙ୍କ ଭିଡ଼ ଜମିଛି। ପ୍ରତ୍ୟୁଷରୁ ଖଡ଼ଗ ନଦୀ ନିକଟରେ କାଉଡ଼ିଆଙ୍କ ଭିଡ଼ ଲାଗିଥିଲା। ବାଲିଗୁଡ଼ା ତଥା ଏହାର ଆଖପାଖ ଅଞ୍ଚଳ ଏବଂ ରାଜ୍ୟ ତଥା ରାଜ୍ୟ ବାହାରୁ ମଧ୍ୟ ଶତାଧିକ ଶିବଭକ୍ତ ଆସି ଜଳଲାଗି କରିଛନ୍ତି। ନଦୀକୂଳରେ ବାଲିରେ ଶିବଲିଙ୍ଗ ପ୍ରତିଷ୍ଠା ସହ ରୀତିନୀତିରେ ପୂଜାର୍ଚ୍ଚନା ପୂର୍ବକ କାଉଡ଼ିଆମାନେ ଜଳଭାର ନେଇ ଏକମୁହଁା ହୋଇ ବିଭିନ୍ନ ଶୈବପୀଠ ଅଭିମୁଖେ ଯାଇଥିଲେ। ଯୁବତୀଯୁବକଙ୍କ ସମେତ ମହିଳା ଓ ଛୋଟ ଛୋଟ ପିଲାମାନେ ମଧ୍ୟ ଜଳଭାର ନେଇ ଯାଉଥିବା ଦେଖିବାକୁ ମିଳିଥିଲା। ଟାଉନ୍ ନିକଟରେ ଥିବା ଖଡ଼ଗ ନଦୀ ଭଳି ବିଭିନ୍ନ ନଦୀରୁ ଘଟ ଉତ୍ତୋଳନ ପୂର୍ବକ ବାଲିଗୁଡ଼ା ନିକଟସ୍ଥ ରେବିଙ୍ଗିଆର ବିରୁପାକ୍ଷେଶ୍ୱର, ଜାଲେଶପଟ୍ଟାର ଜଳେଶ୍ୱର, ଚକାପାଦର ବିରୁପାକ୍ଷ, ଟିକାବାଲି ନିକଟସ୍ଥ ଡୁଙ୍ଗି ଗ୍ରାମରେ ଥିବା ଭୋଳେଶ୍ୱର, ଗୁପ୍ତେଶ୍ୱର, ଯୋଗେଶ୍ୱର, ଦଣ୍ଡପଦର ଗ୍ରାମର ବାବା ଧବଳେଶ୍ୱର, ବାଲିଗୁଡ଼ାର ରାମେଶ୍ୱର, ବିରୁପାକ୍ଷ ଭଳି ବିଭିନ୍ନ ଶୈବପୀଠରେ ଶତାଧିକ କାଉଡ଼ିଆ ଲମ୍ବା ଲାଇନକରି ଜଳଲାଗି କରିଥିଲେ। ଜଳଭାର ନେଇ ରାସ୍ତାରେ ଯାଉଥିବା ସମୟରେ କାଉଡ଼ିଆଙ୍କ ମୁହଁରୁ ବାହାରୁଥିବା ଅଖଣ୍ଡ ‘ବୋଲ୍ବମ୍, ହରହର ବମ୍’, ‘ଭୋଲାବାବା ପାର କରେଗା’ ଇତ୍ୟାଦି ଶବ୍ଦରେ ସମଗ୍ର ଅଞ୍ଚଳ ପ୍ରକମ୍ପିତ ହେବା ସହ ଏକ ଆଧ୍ୟାମତ୍ିକ ପରିବେଶ ସୃଷ୍ଟି କରିଥିଲା। ମନ୍ଦିର ପରିଚାଳନା କମିଟି, ବୋଲବମ୍ କମିଟି ଓ ପୋଲିସ ପ୍ରଶାସନ ପକ୍ଷରୁ ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଥିଲା।
