ଭୁବନେଶ୍ୱର, ୨।୪(ସୁନିତ୍ ମିଶ୍ର):ପୂର୍ବତନ ମୁଖ୍ୟମନ୍ତ୍ରୀ ବିଜୁ ପଟ୍ଟନାୟକଙ୍କ ବାବଦରେ ଭାଜପା ଏମ୍ପି ନିଶିକାନ୍ତ ଦୁବେ ଦେଇଥିବା ବିବାଦୀୟ ବୟାନକୁ ନେଇ ରାଜନୀତି ଥମିବାର ନାଁ ଧରୁନାହିଁ। ସବୁଆଡୁ ସମାଲୋଚନାର ଶିକାର ହେବାପରେ ନିଶିକାନ୍ତ ଆଉ ଏକ ବିବୃତି ବୁଧବାର ଦେଇଛନ୍ତି। ସେ କହିଛନ୍ତି, ଗତ ସପ୍ତାହରେ ଗଣମାଧ୍ୟମ ସହ କଥାହେବା ସମୟରେ ନେହେରୁ ଏବଂ ଗାନ୍ଧୀ ପରିବାରର କାରନାମା ସମ୍ପର୍କିତ ଆଲୋଚନା ମଧ୍ୟରୁ ପୂର୍ବତନ ମୁଖ୍ୟମନ୍ତ୍ରୀ ତଥା ଅଗ୍ରଣୀ ନେତାମାନଙ୍କ ମଧ୍ୟରେ ସ୍ଥାନ ହାସଲ କରିପାରିଥିବା ବିଜୁ ପଟ୍ଟନାୟକଙ୍କ ବାବଦରେ ସେ ଦେଇଥିବା ମନ୍ତବ୍ୟକୁ ଭୁଲ୍ ଭାବେ ଚିତ୍ରଣ କରାଗଲା। ପ୍ରଥମତଃ ଏହି ବକ୍ତବ୍ୟ ତାଙ୍କର ସମ୍ପୂର୍ଣ୍ଣ ନିଜସ୍ବ ଥିଲା। ନେହେରୁଙ୍କ ବାବଦରେ ତାଙ୍କର ଯେଉଁ ବିଚାର ଥିଲା ସେଥିରେ ବିଜୁବାବୁଙ୍କୁ ନେଇ ବୁଝାଗଲା। ବିଜୁବାବୁ ସବୁବେଳେ ସେମାନଙ୍କ ନଜରରେ ଉଚ୍ଚରେ ରହିବେ। ସେ ଜଣେ ଷ୍ଟେଟ୍ସମ୍ୟାନ୍ ଥିଲେ ଓ ରହିବେ। ତାଙ୍କ ବକ୍ତବ୍ୟରେ ଯଦି କାହାର ଭାବନାକୁ କ୍ଷତି ପହଞ୍ଚାଇଛି ତେବେ ନିଃସର୍ତ୍ତ କ୍ଷମା ମାଗୁଛି ବୋଲି ଦୁବେ ଉଲ୍ଲେଖ କରିଛନ୍ତି।