ତରୌବ(ତ୍ରିନିଦାଦ ଆଣ୍ଡ୍ ଟବାଗୋ),୯।୮- ଶୁବମନ ଗିଲ୍ ଦେଶର ସର୍ବକନିଷ୍ଠ କ୍ରିକେଟର ଭାବେ ପ୍ରଥମ ଶ୍ରେଣୀ କ୍ରିକେଟରେ ଦ୍ୱିଶତକ ଲଗାଇଛନ୍ତି। ଅଧିନାୟକ ହନୁମା ବିହାରୀଙ୍କ ଶତକ ବଳରେ ଓ୍ବେଷ୍ଟଇଣ୍ଡିଜ ଏ’ ବିପକ୍ଷରେ ଏଠାରେ ଚାଲିଥିବା ତୃତୀୟ ଅନ୍ଅଫିସିଆଲ ଟେଷ୍ଟ ମ୍ୟାଚ୍ରେ ଭାରତ ଏ’ ଦୃଢ଼ ସ୍ଥିତିରେ ପହଞ୍ଚତ୍ଛି। ୧୯ ବର୍ଷୀୟ ଗିଲ୍ ଭାରତୀୟ କ୍ରିକେଟର ଉଦୀୟମାନ ଷ୍ଟାର। ସେ ୨୫୦ ବଲର ସମ୍ମୁଖୀନ ହୋଇ ୨୦୪ ରନ୍ କରିଛନ୍ତି। ଏଥିସହିତ ଗିଲ୍ ପୂର୍ବତନ ଭାରତୀୟ ଓପନର ଗୌତମ ଗମ୍ଭୀରଙ୍କ ରେକର୍ଡ ଭଙ୍ଗ କରିଛନ୍ତି। ୨୦୦୨ରେ ୨୦ ବର୍ଷୀୟ ଗମ୍ଭୀର ଭାରତ ବୋର୍ଡ ଏକାଦଶ ଓ ଜିମ୍ବାଓ୍ବେ ମଧ୍ୟରେ ଖେଳାଯାଇଥିବା ମ୍ୟାଚ୍ରେ ୨୧୮ ରନ୍ର ଇନିଂସ ଖେଳିଥିଲେ।
ଭାରତ ଏ’ ଦଳ ଅସମାପ୍ତ ଦ୍ୱିତୀୟ ଇନିଂସ ସ୍କୋର ୨୩/୨ରୁ ବ୍ୟାଟିଂ ଆରମ୍ଭକରି ୫୦ ରନ୍ ୪ ଉଇକେଟ ହରାଇ ସଙ୍କଟରେ ପଡ଼ିଥିଲା। ଏଭଳି ସ୍ଥିତିରେ ଗିଲ୍ ଓ ଅଧିନାୟକ ବିହାରୀ ୫ମ ଉଇକେଟ ପାଇଁ ୩୧୫ ରନ୍ର ଭାଗୀଦାରି କରିଥିଲେ। ଫଳରେ ଭାରତ ଏ’ ୪ ଉଇକେଟରେ ୩୬୫ ରନ୍ କରିଥିବାବେଳେ ଇନିଂସ ଘୋଷଣା କରିଛି। ଗିଲ୍ ୨୦୪ ଓ ବିହାରୀ ୧୧୮ ରନ୍ କରି ଅପରାଜିତ ଥିଲେ। ଏହାପରେ ୩୭୩ ରନ୍ର ବିଜୟଲକ୍ଷ୍ୟ ପିଛା କରୁଥିବା ଘରୋଇ ଦଳ ବିନା କ୍ଷତିରେ ୩୭ ରନ୍ କରିଛି। ଅନ୍ତିମ ଦିନରେ ଓ୍ବେଷ୍ଟଇଣ୍ଡିଜ ଏ’ ଦଳକୁ ବିଜୟୀ ଲାଗି ୧୦ ଉଇକେଟରେ ୩୩୬ ରନ୍ ଦରକାର। ପୂର୍ବରୁ ପ୍ରଥମ ଇନିଂସରେ ଭାରତ ଏ’ ୨୦୧ କରିଥିବାବେଳେ ଓ୍ବେଷ୍ଟଇଣ୍ଡିଜ ୧୯୪ ରନ୍ କରିଥିଲା। ପ୍ରଥମ ଇନିଂସରେ କ୍ରିଷ୍ଣପା ଗୌତମ ହ୍ୟାଟ୍ରିକ ଉଇକେଟ ନେଇଥିଲେ।
