ମ୍ୟୁଜିକ ଭିଡ଼ିଓ ଜଗତରେ ରାଜା ଡି ଏବେ ବେଶ୍ ପରିଚିତ ଓ ଚର୍ଚ୍ଚିତ ଚେହେରା। କ୍ରମାନ୍ବୟରେ ରାଜା ଡିଙ୍କ ନିର୍ଦ୍ଦେଶିତ ଗୋଟିଏ ପରେ ଗୋଟିଏ ମ୍ୟୁଜିକ ଭିଡ଼ିଓ ମିଲିୟନ ଦର୍ଶକଙ୍କ ମନକୁ ଛୁଇଁବା ସହ ଓଡ଼ିଆ ଜଗତରେ ସୁପରହିଟ୍ ବୋଲି ଗଣା ହେଉଛି। ଓଲିଉଡ୍ର ବରିଷ୍ଠ କଷ୍ଟ୍ୟୁମ ଡିଜାଇନର ନିର୍ମଳ ଦାସଙ୍କ ପୁଅ ରାଜା ଇତି ମଧ୍ୟରେ ୫୦ରୁ ଉର୍ଦ୍ଧ୍ୱ ମ୍ୟୁଜିକ ଭିଡ଼ିଓରେ ନିର୍ଦ୍ଦେଶନା ଦେଇ ସାରିଲେଣି। ଏହାଛଡ଼ା ୧୬ଟି ଚଳଚ୍ଚିତ୍ରରେ ସହକାରୀ ନିର୍ଦ୍ଦେଶକ ଦାୟିତ୍ୱ ମଧ୍ୟ ସେ ତୁଲାଇଛନ୍ତି। ଏବେ ତାଙ୍କ ଦ୍ୱାରା ନିର୍ଦ୍ଦେଶିତ ଦୁଇଟି ଚଳଚ୍ଚିତ୍ର ମୁକ୍ତିଲାଭ ଅପେକ୍ଷାରେ ରହିଛି। ରାଜା ଡି ଙ୍କ ଅନୁଭୂତିରୁ କିଛି….
୨୦୦୯ ମସିହାରୁ ମନୋରଞ୍ଜନ ଦୁନିଆ ସହ ସିଧାସଳଖ ଯୋଡ଼ି ହେଲି। ବାପା ୨୦୦ରୁ ଅଧିକ ଚଳଚ୍ଚିତ୍ରରେ କଷ୍ଟ୍ୟୁମ ଡିଜାଇନର ଦାୟିତ୍ୱ ତୁଲାଇ ସାରିଲେଣି। ଏଣୁ ପିଲାଟିବେଳୁ କଳାକାର ଜଗତ ସହ ଅଳ୍ପବହୁତେ ଜଡ଼ିତ ଥିଲି। ୨୦୦୯ରେ ‘ଡନ୍’ ଚଳଚ୍ଚିତ୍ରରେ ଆସିଷ୍ଟାଣ୍ଟ ଡିରେକ୍ଟର ଭାବେ କାର୍ଯ୍ୟ କରିବାକୁ ବାପାଙ୍କ ପରାମର୍ଶ ଥିଲା। ୧୦ବର୍ଷର ଯାତ୍ରା ଭିତରେ ଅନେକ ଅନୁଭୂତି ରହିଛି। ୨୦୧୪ ମସିହାରେ ସୁଶାନ୍ତ ମଣିଙ୍କ ନିର୍ଦ୍ଦେଶିତ ‘ମୋତେ ପାଗଳ କରିଛୁ ତୁ’ ଚଳଚ୍ଚିତ୍ର ଶୁଟିଂ ହେଉଥାଏ। ମାସ କି ଦିନ ମନେ ନାହିଁ। ହେଲେ ସେଦିନ ଶୁଟିଂର ଅନ୍ତିମ ଦିବସ ଥିଲା। ମୁନା ଭାଇ ତଥା ସିଦ୍ଧାନ୍ତ ମହାପାତ୍ରଙ୍କର କିଛି ଶଟ୍ ବାକି ରହିଥିଲା। ମୁନା ଭାଇ ଏମପି ଥିବାରୁ ସେ କାମ ସାରି ଦିଲ୍ଲୀ ଯିବାକୁ ବ୍ୟସ୍ତ ହେଉଥିଲେ। ନିର୍ଦ୍ଦେଶକଙ୍କ ନିର୍ଦ୍ଦେଶ ଅନୁସାରେ ଆମେ କିଛି ପ୍ଲାନ କରିଥାଉ। ସଟ କିପରି ନିଆଯିବ ସେ ସବୁରୁ ଗୋଟେ ବ୍ଲୁପ୍ରିଣ୍ଟ ପ୍ରସ୍ତୁତ କରିଥିଲୁ। ମୁନା ଭାଇ ସେଟ୍ରେ ପହଞ୍ଚିବା ପରେ ପ୍ଲାନ ସବୁ ବଦଳିଗଲା। ତରବର ଭାବେ ଶଟ୍ ନିଆ ଚାଲିଥାଏ। ଏଗୁଡ଼ିକ ଦେଖିବା ପରେ ମୁଁ ନିର୍ଦ୍ଦେଶକ ସୁଶାନ୍ତ ସାର୍ଙ୍କୁ ଯାଇ ଏଗୁଡ଼ା ପ୍ଲାନ ଅନୁସାରେ ହେଉନି ବୋଲି କହିଥିଲି। ସେ ହଠାତ୍ ମୋ ଉପରେ ଚିଲାଇବା ଆରମ୍ଭ କରିଥିଲେ। ଏଠାରୁ ଶୀଘ୍ର ପଳା ବୋଲି କହିଥିଲେ। ସମସ୍ତଙ୍କ ସାମ୍ନାରେ ଏଭଳି ବ୍ୟବହାର ଯୋଗୁ ମୁଁ କାନ୍ଦି ପକେଇଥିଲି ଆଉ ଅଳ୍ପ ଦୂରରେ ଆସି ବସିଥିଲି। ଶୁଟିଂ ସରିଲା। ସୁଶାନ୍ତ ସାର୍ ସିଧାସଳଖ ମୋ ପାଖକୁ ଆସିଥିଲେ। ଭାବିଥିଲି ଗାଳି କରିବେ, ହେଲେ ସମୟ କମ୍ ରହିଲେ କିପରି କାମ ସାରିବାକୁ ହୁଏ ସେସବୁର ଜ୍ଞାନ ରଖିବାକୁ ପରାମର୍ଶ ଦେଇଥିଲେ। ସ୍ବଳ୍ପ ସମୟରେ ସ୍ଥାନ, କାଳ, ପାତ୍ରର ଠିକ ବ୍ୟବହାର କରିବାକୁ ସେ ଯେଉଁ ପରାମର୍ଶ ଦେଇଥିଲେ ତାହା ଆଜି ପର୍ଯ୍ୟନ୍ତ ମୋ କାମରେ ଲାଗୁଛି।
ନିଜ ସାଙ୍ଗିଆକୁ ଦାସ ବଦଳରେ ‘ଡି’ ରଖିବା ସମ୍ପର୍କରେ ସେ କୁହନ୍ତି, ଆଗରୁ ରାଜା ଦାସ ନାମରେ ଯେତିକି କାମ କରିଛି ତାହା କେବଳ ହିଟ୍ ହେଉଥିଲା। ସାଙ୍ଗିଆକୁ ଶର୍ଟକଟ୍ କରିବା ପରେ ପ୍ରୋଜେକ୍ଟ ଗୁଡ଼ିକ ସୁପରହିଟ୍ ହେଉଛି ବୋଲି ଏହି ଯୁବ ନିର୍ଦ୍ଦେଶକଙ୍କର ମତ।
