ନୂଆଦିଲ୍ଲୀ, ୧୨।୯ : କୋଭିଡ୍-୧୯ ସାରା ବିଶ୍ୱର ଅର୍ଥ ବ୍ୟବସ୍ଥାକୁ ଝଟକା ଦେଇଛି। ଭାରତୀୟ ବଜାରରେ ଲାଗୁ ହୋଇଥିବା ଲକ୍ଡାଉନ କାରଣରୁ ଶିଳ୍ପ କ୍ଷେତ୍ରରେ ଉତ୍ପାଦନ ଚଳିତ ବର୍ଷ ଜୁଲାଇ ମାସରେ ୧୦.୪% ଖସିଛି। ମାନୁଫାକ୍ଚରିଂ, ଖଣି ଏବଂ ଶକ୍ତି ଉତ୍ପାଦନ ଉପରେ କୋଭିଡ୍ର ପ୍ରଭାବ ଜାରି ରହିବା ଯୋଗୁ ଏଭଳି ସ୍ଥିତି ଉପୁଜିଥିବା ସରକାର ଶୁକ୍ରବାର ପ୍ରକାଶ କରିଥିବା ଡାଟାରୁ ସାମ୍ନାକୁ ଆସିଛି। ଓଦ୍ୟୋଗିକ ଉତ୍ପାଦନ ସୂଚକାଙ୍କ(ଆଇଆଇପି) ଡାଟା ମୁତାବକ ଦେଶର ମାନୁଫାକ୍ଚରିଂ ଉତ୍ପାଦନ ୧୧.୧% ଖସିଛି। ସେହିଭଳି ଖଣି ଏବଂ ଶକ୍ତି କ୍ଷେତ୍ରରେ ଯଥାକ୍ରମେ ୧୩ ଓ୨.୫% ହ୍ରାସ ପରିଲକ୍ଷିତ ହୋଇଛି।
କୋଭିଡ୍-୧୯ ମହାମାରୀକୁ ନିୟନ୍ତ୍ରଣ କରିବା ଲାଗି ସରକାର ପ୍ରାୟ ୪ ମାସରୁ ଊର୍ଦ୍ଧ୍ୱ ସମୟ ଲକ୍ଡାଉନ ଏବଂ ଶଟ୍ଡାଉନ ଜାରି କରିଥିଲେ। ଏହି ସମୟ ମଧ୍ୟରେ ଶିଳ୍ପ କ୍ଷେତ୍ରର କାର୍ଯ୍ୟକଳାପ ଠପ୍ ହୋଇ ପଡିଥିଲା। ମାର୍ଚ୍ଚ ୨୦୨୦ ପରଠାରୁ ଶିଳ୍ପକ୍ଷେତ୍ରରେ କଳକାରଖାନାଗୁଡିକର କାର୍ଯ୍ୟକଳାପ ଏବେ ଯାଏ ସ୍ଥିତାବସ୍ଥାକୁ ଫେରିପାରିନାହିଁ। ଲକ୍ଡାଉନ ସମୟରେ ଉତ୍ପାଦନ ଉପରେ ପଡିଥିବା ପ୍ରଭାବ ଯୋଗୁ ଏଭଳି ସ୍ଥିତି ଉପୁଜିଛି। ସରକାର ବର୍ତ୍ତମାନ ସୁଦ୍ଧା ପର୍ଯ୍ୟାୟ ଭିତ୍ତିରେ କଟକଣା କୋହଳ କରୁଛନ୍ତି। ଧୀରେ ଧୀରେ ଶିଳ୍ପ କ୍ଷେତ୍ରରେ ଉତ୍ପାଦନରେ ପରିବର୍ତ୍ତନ ଆସିବା ନେଇ ଆଶା ରହିଥିବା ପରିସଂଖ୍ୟାନ ଏବଂ କାର୍ଯ୍ୟକ୍ରମ ରୂପାୟନ ମନ୍ତ୍ରଣାଳୟ ପକ୍ଷରୁ ଏକ ରିପୋର୍ଟରେ ପ୍ରକାଶ ପାଇଛି। ୨୦୨୦ ଜୁଲାଇରେ ସୂଚକାଙ୍କ ୧୧୮.୧% ସ୍ତରରେ ରହିଛି। ଏହା ଏପ୍ରିଲ,ମେ ଏବଂ ଜୁନ୍ ମାସରେ ଯଥାକ୍ରମେ ୫୪.୦%, ୮୯.୫% ଏବଂ ୧୦୮.୯% ସ୍ତରରେ ରହିଥିଲା।
