ଭଟଲି,୨୪ା୪(ଡି.ଏନ୍.ଏ.): କାରୋନା (କୋଭିଡ-୧୯) ମୁକାବିଲା ଲାଗି ସମଗ୍ର ଭାରତରେ ଲକ୍ଡାଉନ୍ ଜାରି ରହିଛି। ଏପରି ସ୍ଥଳେ ଲକ୍ଡାଉନକୁ ଉଲ୍ଲଂଘନ କରି କେତେକ ଅସାଧୁ ବ୍ୟବସାୟୀ ଜଙ୍ଗଲ ତଥା ନିଜ ଘରେ ମହୁଲ ପୋଚକୁ ବ୍ୟବହାର କରି ଦେଶୀ ରନ୍ଧା ମଦ ପ୍ରସ୍ତୁତ କରି ବିକ୍ରି କରୁଥିବା ବେଳେ ଭଟଲି ପୋଲିସ ହାତରେ ଧରାପଡ଼ିଛି।
ଗୁରୁବାର ଭଟଲି ପୋଲିସ କୋଭିଡ଼-୧୯ ସଚେତନତା ପାଇଁ ପାଟ୍ରୋଲିଂ କରୁଥିବାବେଳେ ସନ୍ଦେହକରି ଭଟଲି ନିକଟସ୍ଥ ସୁକୁଡ଼ା ପାଖରେ ଏକ ବୋଲେରୋକୁ ଅଟକାଇଥିଲା। ପରେ ସେଥିରେ ୧୩୦ ଲିଟର ଦେଶୀ ରନ୍ଧା ମଦ ଥିବା ଜାଣିପାରି ଉଭୟ ଗାଡ଼ି ଓ ମଦକୁ ଜବତ କରିଥିଲା। ଏହି କାରବାରରେ ସମ୍ପୃକ୍ତ ୪ଜଣଙ୍କୁ ପୋଲିସ ଗିରଫ କରିଛି। ଗିରଫ ଅଭିଯୁକ୍ତମାନେ ହେଲେ ଗଣେଶ ସ୍ବାଇଁ, ଜିତେନ୍ଦ୍ର ବାରିକ, ସୁବ୍ରତ ଭୁଏ ଏବଂ ସାଗର ମେହେର। ଏ ନେଇ ଥାନାରେ କେସ ନଂ. ୭୮/୨୦ ରେ ଏକ ମାମଳା ରୁଜୁ ହୋଇଛି।
ସେହିପରି ଅନ୍ୟ ଦୁଇଜଣ ଏକ ବାଇକ ଯୋଗେ ୨୦ ଲିଟର ଦେଶୀ ରନ୍ଧା ମଦ ଆଣୁଥିବାବେଳେ ପୋଲିସ ହାତରେ ଧରା ପଡ଼ିଛନ୍ତି। ସେମାନେ ହେଲେ ଖଗେଶ୍ୱର ଭୁଏ ଏବଂ ମଦନ ଭୁଏ। ସେମାନଙ୍କ ନିକଟରୁ ବାଇକ ଏବଂ ମଦ ଜବତ କରାଯାଇଛି। ଏ ନେଇ ଥାନା କେସ ନଂ. ୭୭/୨୦ରେ ମାମଳା ରୁଜୁ ହୋଇଛି।
