ସୋଲାପୁର,୩୦।୩: ଦେଶରେ କରୋନା ସଂକ୍ରମିତଙ୍କ ସଂଖ୍ୟା ଦିନକୁ ଦିନ ବଢ଼ିବାରେ ଲାଗିଛି। ଏହାକୁ ଦୃଷ୍ଟିରେ ରଖି ଭାରତ ସରକାରଙ୍କ ପକ୍ଷରୁ ୨୧ ଦିନିଆ ଲକ୍ଡାଉନ୍ ଜାରି କରାଯାଇଛି। ଏହି ସମୟରେ ଯାନବାହନ ଚଳାଚଳ କରୁ ନ ଥିବାରୁ ଲୋକେ ହନ୍ତସନ୍ତ ହେଉଛନ୍ତି। ମହାରାଷ୍ଟ୍ର ସୋଲାପୁର ଜିଲାରେ ଜଣେ ବୃଦ୍ଧ ସ୍ତ୍ରୀଙ୍କ ପାଇଁ ଔଷଧ ଆଣିବାକୁ ୭୦ କିମି ଘୋଡ଼ାରେ ଯାଇଛନ୍ତି। ଏବେ ଏହାର ଫଟୋ ଏବଂ ଭିଡ଼ିଓ ସୋସିଆଲ୍ ମିଡ଼ିଆରେ ଭାଇରାଲ ହେବାରେ ଲାଗିଛି। ସ୍ଥାନୀୟ ଅକ୍କଲକୋଟ ଅଞ୍ଚଳର ଦର୍ଶନାଲ ଗାଁରେ ବାସ କରୁଥିବା ବୃଦ୍ଧ ଅଜମୋଦ୍ଦିନ୍ ପଠାନ ସାହେବ ଏଭଳି କରିଛନ୍ତି। ୬୭ ବର୍ଷ ବୟସ୍କା ସ୍ତ୍ରୀ ମମତାଜ୍ଙ୍କ ପାଇଁ ସେ ବ୍ଲଡ୍ ପ୍ରେସର ଔଷଧ ଆଣିବା ଲାଗି ସହରକୁ ଘୋଡ଼ାରେ ଯାଇଥିଲେ। ବାଟରେ ତାଙ୍କୁ ପୋଲିସ ପଚରାଉଚରା କରିଥିଲା। ତେବେ ଅଜମୋଦ୍ଦିନ ସ୍ତ୍ରୀଙ୍କ ପାଇଁ ଔଷଧ ଆଣିବାକୁ ଯାଉଥିବା କହିଥିଲେ। ପରେ ପୋଲିସ ତାଙ୍କୁ ଯିବାକୁ ଦେଇଥିଲେ।
