ଭୁବନେଶ୍ୱର,୭।୫(ବ୍ୟୁରୋ): ରାଜ୍ୟ ସରକାର ବାହାର ରାଜ୍ୟରେ ଫସି ରହିଥିବା ପ୍ରବାସୀଙ୍କୁ ଫେରାଇ ଆଣିବା ଲାଗି ବିଭିନ୍ନ ବ୍ୟବସ୍ଥା କରିଛନ୍ତି। ସ୍ବତନ୍ତ୍ର ଅନ୍ଲାଇନ୍ ରେଜିଷ୍ଟ୍ରେଶନ୍ ସହ ବସ୍ ଏବଂ ଟ୍ରେନ୍ଯୋଗେ ସେମାନଙ୍କୁ ଅଣାଯାଉଛି। ଏସବୁ ସତ୍ତ୍ୱେ କିଛି ଶ୍ରମିକ ବିନା ରେଜିଷ୍ଟ୍ରେଶନରେ ବସ୍ ଯୋଗେ ଫେରିବାକୁ ଚେଷ୍ଟା କରୁଥିବା ଦେଖାଯାଉଛି। ଏହାକୁ ଦୃଷ୍ଟିରେ ରଖି ବାହାର ରାଜ୍ୟରୁ ଫେରୁଥିବା ଶ୍ରମିକଙ୍କ ଲାଗି ଏସ୍ଓପିରେ ସଂଶୋଧନ କରାଯାଇଛି। ଶ୍ରମିକଙ୍କୁ ନେଇ ଫେରୁଥିବା ବସ୍ଗୁଡ଼ିକୁ ଯାଞ୍ଚ ଲାଗି ସୀମା ଚେକ୍ ପଏଣ୍ଟରେ ଅପରେଶନ୍ ପାଇଁ ଏସ୍ଓପିରେ ସଂଶୋଧନ କରାଯାଇଥିବା ସୂଚନା ମିଳିଛି।
ସଂଶୋଧିତ ଏସ୍ଓପି ଅନୁଯାୟୀ, ରେଜିଷ୍ଟ୍ରେଶନ କରି ନ ଥିଲେ ଚେକ୍ ପଏଣ୍ଟରେ ଗାଡ଼ି ଡ୍ରାଇଭର ତଥ୍ୟ ଦେବେ। ଡ୍ରାଇଭରଙ୍କ ନାଁ ସହ ଲାଇସେନ୍ସ ନମ୍ବର ଦେବା ବାଧ୍ୟତାମୂଳକ କରାଯାଇଛି। ସେହିଭଳି ଯାତ୍ରୀଙ୍କ ସଂଖ୍ୟା ଓ କେଉଁ ଜିଲାକୁ ଯିବେ ସେ ନେଇ ମଧ୍ୟ ତଥ୍ୟ ଦେବେ। ଆସୁଥିବା ବ୍ୟକ୍ତିଙ୍କ ନାଁ ପଞ୍ଜୀକରଣ ଯାଞ୍ଜ କରିବାକୁ ନିର୍ଦ୍ଦେଶ। ଯଦି କେହି କରି ନ ଥିଲେ ତୁରନ୍ତ ପଞ୍ଜୀକରଣ କରିବେ। ସୀମା ଚେକ୍ ପଏଣ୍ଟରୁ ଗନ୍ତବ୍ୟସ୍ଥଳକୁ ସିଧା ଆସିବ ବସ୍। ଏନେଇ ସମସ୍ତ ଜିଲାପାଳ ଓ ମ୍ୟୁନିସିପାଲିଟି କମିଶନରଙ୍କୁ ସ୍ବତନ୍ତ୍ର ରିଲିଫ କମିଶନ ଚିଠି ଲେଖି ଅବଗତ କରାଯାଇଛି।
