ନୂଆଦିଲ୍ଲୀ,୧୬।୭: ରିଲାଏନ୍ସ ଇଣ୍ଡଷ୍ଟ୍ରିଜ ଲିମିଟେଡ୍(ଆର୍ଆଇଏଲ୍) ଏହାର ଅଏଲ୍ ଟୁ କେମିକାଲ (ଓଟୁସି) କାରବାରର ୨୦% ଅଂଶଧନ ସାଉଦି ଆରାମ୍କୋ ନାମକ କମ୍ପାନୀକୁ ବିକ୍ରି କରିବାକୁ ଯୋଜନା ରଖାଯାଇଥିଲା। ଏ ନେଇ ଦୁଇ କମ୍ପାନୀ ମଧ୍ୟରେ ଆଲୋଚନା ଜାରି ରହିଥିଲା। ହେଲେ ଏହି ଡିଲ୍ ବର୍ତ୍ତମାନ ଅଟକିଯାଇଥିବା ଜଣାପଡିଛି। ପ୍ରକ୍ରିୟା ସହ ଜଡ଼ିତ ୪ ବରିଷ୍ଟ ଅଧିକାରୀ ରଏଟର୍ସକୁ କହିଛନ୍ତି ଯେ, କୋଭିଡ୍ କାରଣରୁ ଏନର୍ଜି ମାର୍କେଟ ଉପରେ ବଡ଼ ପ୍ରଭାବ ପଡିଛି। ଏଥିଲାଗି ଡିଲ୍ ଲାଗି ଆଲୋଚନା ଆଗକୁ ନ ବଢ଼ିପାରି ଅଟକିଯାଇଛି। ଅନ୍ୟ ଏକ ସୂତ୍ର ମୁତାବକ ଅନ୍ତର୍ଜାତୀୟ ବଜାରରେ ଅଶୋଧିତ ତୈଳ ଦର ହ୍ରାସ ହେବା ଯୋଗୁ ଅଏଲ ଆସେଟ୍ସ ଗ୍ଲୋବାଲ ଭାଲ୍ୟୁଏଶନରେ ହ୍ରାସ ଦେଖାଯାଇଛି। ଏଭଳି ସ୍ଥିତିରେ ରିଲାଏନ୍ସ ଡିଲ୍କୁ ନେଇ ପୁଣି ଥରେ ତର୍ଜମା କରୁ ବୋଲି ସାଉଦି ଆରାମ୍କୋ ଚାହୁଁଛି। ଅନ୍ୟ ଜଣେ ଅଧିକାରୀ କହିଛନ୍ତି ଯେ, ଡିଲ୍କୁ ପୁନଃ ଭାଲ୍ୟୁଏଶନ କରିବା ଲାଗି ସାଉଦି ଆରାମ୍କୋ ଇଚ୍ଛା ପ୍ରକଟ କରିଛି। ଯଦି ଏପରି ହୁଏ ତେବେ ଏହା ରିଲାଏନ୍ସ ପାଇଁ ଝଟକା ସଦୃଶ ହେବ ବୋଲି କୁହାଯାଉଛି। ଏହି ଡିଲ୍ ୧୫ ବିଲିୟନ ଡଲାର ବିଶିଷ୍ଟ ହେବ ବୋଲି ଗତବର୍ଷ ନିଷ୍ପତ୍ତି ହୋଇଥିଲା।
