ନୂଆଦିଲ୍ଲୀ,୨୬।୫: କରୋନା ମହାମାରୀକୁ ରୋକିବା ଲାଗି ସାରା ଦେଶକୁ ଲକ୍ଡାଉନ ଘୋଷଣା କରାଯାଇଛି। କଟକଣା ଧୀରେ ଧୀରେ କୋହଳ ହେଉଥିବା ବେଳେ ବଜାର କିନ୍ତୁ କ୍ଷତିଗ୍ରସ୍ତ ହୋଇ ରହିଛି। ଗତ ୬୦ଦିନ ମଧ୍ୟରେ ଦେଶର ରିଟେଲ ବ୍ୟବସାୟୀଙ୍କୁ ପ୍ରାୟ ୯ ଲକ୍ଷ କୋଟି ଟଙ୍କାର କ୍ଷତି ସହିବାକୁ ପଡ଼ିଛି। ଦେଶର ରିଟେଲ ସେକ୍ଟରରେ ଥିବା ୬୦ ଲକ୍ଷ ବ୍ୟବସାୟୀଙ୍କ ମଧ୍ୟରୁ ପ୍ରାୟ ୪୦% ଆଗାମୀ ୪ ମାସରେ ସେମାନଙ୍କ ଜୀବିକା ହରାଇବା ଆଶଙ୍କା ଉପୁଜିଛି। ସରକାର ଏ କ୍ଷେତ୍ର ଲାଗି ଯଦି କୌଣସି ପଦକ୍ଷେପ ନ ନିଅନ୍ତି ତେବେ ସ୍ଥିତି ବିଗିଡ଼ିବ ବୋଲି ବଜାର ବିଶେଷଜ୍ଞମାନେ ମତ ରଖିଛନ୍ତି।
ସର୍ବଭାରତୀୟ ବ୍ୟବସାୟୀ ମହାସଂଘ(ସିଏଆଇଟି) ପକ୍ଷରୁ କୁହାଯାଇଛି ଯେ, ଗତ ୬୦ଦିନରେ କାରବାର ଠପ୍ ହୋଇ ପଡିଛି। ଲକ୍ଡାଉନ ଯୋଗୁ ରହିଥିବା କଟକଣା ଫଳରେ ଲୋକମାନେ କିଣାକିଣି କରିବାକୁ ବାହାରକୁ ଆସୁ ନ ଥିବାରୁ ଏଭଳି ସ୍ଥିତି ସାମ୍ନା କରିବାକୁ ପଡୁଛି। ଫଳରେ ରିଟେଲ ବ୍ୟବସାୟୀଙ୍କୁ ପ୍ରାୟ ୯ ଲକ୍ଷ କୋଟି ଟଙ୍କା କ୍ଷତି ସହିବାକୁ ପଡ଼ିିଛି। ରିଟେଲ କ୍ଷେତ୍ରର ଦୋକାନ ବଜାର ଏବଂ କମର୍ସିଆଲ ମାର୍କେଟରେ ବର୍ତ୍ତମାନ କାରବାର ପ୍ରାୟ ୫% ରହିଛି। ବର୍ତ୍ତମାନ ଶ୍ରମ ଶକ୍ତିର ୮୦% ସେମାନଙ୍କ ଘରକୁ ପଳାଇଯାଇଛନ୍ତି। ଦୋକାନଗୁଡିକରେ କାମ କରୁଥିବା ୮% ଶ୍ରମଶକ୍ତି କାର୍ଯ୍ୟକ୍ଷେତ୍ରକୁ ଫେରିଛନ୍ତି।
ସିଏଆଇଟି ମହାସଚିବ ପ୍ରଭୀନ୍ ଖଣ୍ଡେଲଓ୍ବାଲ କହିଛନ୍ତି, ଲକ୍ଡାଉନ ସମୟରେ ରିଟେଲ ବ୍ୟବସାୟ କ୍ଷତି ହେବାରୁ ଏହାଦ୍ୱାରା ଉଭୟ କେନ୍ଦ୍ର ଏବଂ ରାଜ୍ୟ ସରକାରଗୁଡ଼ିକର ରାଜକୋଷକୁ ପ୍ରାୟ ୧.୫ ଲକ୍ଷ କୋଟି ଟଙ୍କାର ରାଜସ୍ବ କ୍ଷତି ହେବ। ବ୍ୟବସାୟୀମାନେ ଆର୍ଥତ୍କ ସମସ୍ୟା ଦେଇ ଗତି କରୁଛନ୍ତି। ସରକାରଙ୍କ ପକ୍ଷରୁ ମଧ୍ୟ କୌଣସି ସହାୟତା ମିଳୁନାହିଁ। ଭବିଷ୍ୟତକୁ ନେଇ ବ୍ୟବସାୟୀମାନେ ଚିନ୍ତାରେ ରହିଛନ୍ତି। କରୋନା ଆଗକୁ ବଜାର ମାନ୍ଦାବସ୍ଥା ଦେଇ ଗତି କରୁଥିଲା। ଗୋଟିଏ ପଟେ ସବୁ କ୍ଷେତ୍ରରେ ଚାହିଦା ପୂରା ଖସିଯାଇଛି। ଅନ୍ୟପକ୍ଷରେ ସରକାର ଆଣିଥିବା ୨୦ ଲକ୍ଷ କୋଟି ଟଙ୍କା ପ୍ୟାକେଜରେ କୌଣସି ବ୍ୟବସ୍ଥା କଲେ ନାହିଁ। ଘରଭଡ଼ା, କାରବାର ଚଳାଇବା , କର୍ମଚାରୀଙ୍କୁ ବେତନ ଦେବା ବର୍ତ୍ତମାନ କଷ୍ଟକର ହୋଇ ପଡିଛି। ସମସ୍ୟା ସମାଧାନ କରିବା ଲାଗି ସରକାର ହସ୍ତକ୍ଷେପ କରନ୍ତୁ ବୋଲି ସଂଘ ପକ୍ଷରୁ ବାଣିଜ୍ୟ ମନ୍ତ୍ରୀ ପୀୟୂଷ ଗୋୟଲଙ୍କୁ ନିବେଦନ କରାଯାଇଛି। ପୋଷାକ, ଜୁଏଲେରି ସମେତ ଅନ୍ୟ ସାମଗ୍ରୀ ବିକ୍ରି କରୁଥିବା ବ୍ୟକ୍ତି ବ୍ୟବସାୟୀଙ୍କ ରାଜସ୍ବ ପ୍ରାୟ ୭୫% ଖସିଛି। ଫଳରେ ଉକ୍ତ କ୍ଷେତ୍ରଗୁଡ଼ିକରେ ନିଯୁକ୍ତି କମିବା ଆଶଙ୍କା ଉପୁଜିଛି।
