ଜୟପୁର,୨୬ା୧: ନାଗରିକତ୍ୱ ସଂଶୋଧନ ଆଇନ(ସିଏଏ)କୁ ବିରୋଧ କରି ରାଜସ୍ଥାନ ବିଧାନସଭାରେ ଶନିବାର ଧ୍ୱନିମତରେ ପ୍ରସ୍ତାବ ଗୃହୀତ ହୋଇଛି। ଭାଜପା ପକ୍ଷରୁ ଏଭଳି ପ୍ରକ୍ରିୟାକୁ ବିରୋଧ କରାଯାଇ କଂଗ୍ରେସ ତୁଷ୍ଟୀକରଣ ରାଜନୀତି କରୁଛି ବୋଲି ଅଭିଯୋଗ କରାଯାଇଛି। ପ୍ରଥମେ କେରଳ ପରେ କଂଗ୍ରେସ ଶାସିତ ରାଜ୍ୟ ପଞ୍ଜାବ ଓ ରାଜସ୍ଥାନରେ ସିଏଏକୁ ଖୋଲାଖୋଲି ଭାବେ ବିରୋଧ କରାଯାଇ ଏଭଳି ପ୍ରସ୍ତାବ ଗୃହୀତ କରାଯାଇଛି। ରାଜସ୍ଥାନରେ ଏହି ପ୍ରସ୍ତାବ ପାସ୍ କରାଯିବା ସହ କେନ୍ଦ୍ର ସିଏଏର ପୁନଃସମୀକ୍ଷା କରିବା ଉଚିତ ବୋଲି କୁହାଯାଇଛି। ସିଏଏ ସମ୍ବିଧାନର ନିୟମକୁ ଉଲ୍ଲଂଘନ କରୁଛି ଓ ନାଗରିକତ୍ୱ ଲାଗି ଧର୍ମକୁ ଆଧାର କରି କେନ୍ଦ୍ର ଆଣିଥିବା ପ୍ରସ୍ତାବ ଭେଦଭାବ ବଢ଼ାଉଛି ବୋଲି ଅଭିଯୋଗ କରାଯାଇଛି। ତେଣୁ ସିଏଏକୁ ପ୍ରତ୍ୟାହାର କରିନେବା ଲାଗି କେନ୍ଦ୍ରକୁ ଅନୁରୋଧ କରାଯାଇଛି। ଗୃହରେ ପ୍ରସ୍ତାବ ଆଗତ କରିବାବେଳେ ମନ୍ତ୍ରୀ ଶାନ୍ତି ଧରିଓ୍ବାଲ କହିଥିଲେ, ସମସ୍ତ ଧର୍ମ ଲାଗି ଗୋଟିଏ ଆଇନ ଅଣାଯାଇ ପାତରଅନ୍ତର ଦୂର କରିଯିବା ଉଚିତ। ବିଧାନସଭାରେ ଏଭଳି ପ୍ରସ୍ତାବ ଅଣାଯିବା ଅଧିକାରକୁ ନେଇ ବିରୋଧୀ ଦଳର ନେତା ଗୁଲାବ ଚାନ୍ଦ କଟାରିଆ ପ୍ରଶ୍ନ ଉଠାଇଛନ୍ତି। ନାଗରିକତ୍ୱ ପ୍ରଦାନକରିବା କେନ୍ଦ୍ର ଆଇନ ପରିସରଭୃକ୍ତ ଓ ଏଥିରେ ରାଜ୍ୟର କୌଣସି କ୍ଷମତା ନାହିଁ। ତୁଷ୍ଟୀକରଣ ଓ ଭୋଟବ୍ୟାଙ୍କ ରାଜନୀତି ଛାଡ଼ି କେନ୍ଦ୍ରୀୟ ଆଇନ ବିରୋଧରେ ଯିବା ଠିକ୍ ନୁହେଁ ବୋଲି ସେ ପ୍ରକାଶ କରିଛନ୍ତି।
