ରଣପୁର,୨୪ା୭ (ସ୍ବ.ପ୍ର.): ସରକାର ରୋଗୀ ସେବା ପାଇଁ କୋଟି କୋଟି ଟଙ୍କା ଖର୍ଚ୍ଚ କରି ବିଭିନ୍ନ ଯୋଜନା ପ୍ରଚଳନ କରୁଛନ୍ତି। ହେଲେ କେତେକ ଅସାଧୁ ଅଧିକାରୀ ଓ କର୍ମଚାରୀଙ୍କ ଯୋଗୁ ଏହି ସେବାରୁ ଲୋକେ ବଞ୍ଚତ୍ତ ହେଉଛନ୍ତି। ଡାକ୍ତରଖାନାରେ ଚିକିତ୍ସିତ ହେଉଥିବା ପ୍ରତ୍ୟେକ ରୋଗୀ ପାଇଁ ସରକାର ନିରାମୟ ଯୋଜନା ଆରମ୍ଭ କରିଛନ୍ତି। ଏହି ଯୋଜନାରେ ରୋଗୀମାନେ ମାଗଣାରେ ଔଷଧ ନେଇପାରିବେ। ଡାକ୍ତରଖାନା ଭିତରେ ଏହି ସେବା ୨୪ଘଣ୍ଟା ଚାଲୁ ରହିବ ବୋଲି ସରକାରଙ୍କ କଡା ନିର୍ଦ୍ଦେଶ ରହିଛି। କିନ୍ତୁ ରଣପୁର ଡାକ୍ତରଖାନାରେ ଏହାର ବ୍ୟତିକ୍ରମ ପରିଲକ୍ଷିତ ହୋଇଛି। ଏହି ଯୋଜନାରେ ଖୋଲିଥିବା ଔଷଧ ବିତରଣ କେନ୍ଦ୍ର ସକାଳେ ୪ଘଣ୍ଟା ଓ ଅପରାହ୍ନରେ ୨ଘଣ୍ଟା କାର୍ଯ୍ୟ କରୁଛି ା ଆଉ ୧୮ ଘଣ୍ଟା କାଉଣ୍ଟର ବନ୍ଦ ରହୁଛି ା ଫଳରେ ଦୂରଦୂରାନ୍ତରୁ ଆସୁଥିବା ରୋଗୀମାନେ ମାଗଣାରେ ଔଷଧ ନ ପାଇ ବାହାର ଦୋକାନରୁ କିଣି ଖର୍ଚ୍ଚାନ୍ତ ହେଉଛନ୍ତି।
ରଣପୁର ସରକାରୀ ଡାକ୍ତରଖାନା ୧୯୫୭ ମସିହାରେ ପ୍ରତିଷ୍ଠା କରାଯାଇଛି ା ଏହା ଉପରେ ନୟାଗଡ ଜିଲାର ବିଭିନ୍ନ ଅଞ୍ଚଳ ସମେତ ଖୋର୍ଦ୍ଧା ଜିଲାର କିଛି ଗ୍ରାମର ଲୋକେ ଚିକିତ୍ସା ପାଇଁ ନିର୍ଭର କରିଥାନ୍ତି। ପ୍ରତ୍ୟହ ୩ଶହରୁ ଊର୍ଦ୍ଧ୍ୱ ରୋଗୀ ଏଠାକୁ ଚିକିତ୍ସା ପାଇଁ ଆସିଥାନ୍ତି। ଏପରିସ୍ଥଳେ ହାତ ଗଣତି ଡାକ୍ତରଙ୍କୁ ଛାଡିଦେଲେ କୌଣସି ବିଶେଷଜ୍ଞ ଡାକ୍ତର ନିଯୁକ୍ତି ହୋଇନାହାନ୍ତି। ପାଳି କରି ଡାକ୍ତରମାନେ ରୋଗୀସେବା କରିଥାନ୍ତି। ନିରାମୟ ଯୋଜନାରେ ଔଷଧ ବଣ୍ଟନ କରିବା ପାଇଁ ଏଠାରେ ୨ଜଣ କମ୍ପାଉଣ୍ଡର ନିଯୁକ୍ତି ହୋଇଛନ୍ତି। ଉକ୍ତ ଯୋଜନା ଅନୁସାରେ ଔଷଧ ବିତରଣ କେନ୍ଦ୍ର ଦିନ ରାତି ୨୪ଘଣ୍ଟା ଖୋଲା ରଖିବା କଥା। ମାତ୍ର ସକାଳେ ୮ଟାରୁ ୧୨ଟା ଓ ଅପରାହ୍ନରେ ୪ଟାରୁ ୬ଟା ପର୍ଯ୍ୟନ୍ତ ଔଷଧ ପ୍ରଦାନ କରାଯାଉଛି ା ଆଉ ୧୮ଘଣ୍ଟା ଔଷଧ କେନ୍ଦ୍ର ବନ୍ଦ ରହୁଛି। ସରକାର ବାର୍ଷିକ ୬ଶହରୁ ଊର୍ଦ୍ଧ୍ୱ କୋଟି ଟଙ୍କା ଖର୍ଚ୍ଚ କରି ୫୭୦ ପ୍ରକାର ଔଷଧ ଉପଲବ୍ଧ କରିଛନ୍ତି। ହେଲେ ଏହି ସେବାରୁ ରୋଗୀମାନେ ବଞ୍ଚିତ ହେଉଥିବା ଅଭିଯୋଗ ହେଉଛି। ଏ ସମ୍ପର୍କରେ ରଣପୁର ଡାକ୍ତରଖାନାର ମୁଖ୍ୟ ଚିକିତ୍ସା ଅଧିକାରୀ ଦାୟିତ୍ୱରେ ଥିବା ଡାକ୍ତର ବୈଦ୍ୟନାଥ ନନ୍ଦଙ୍କୁ ପଚାରିବାରୁ ସେ କହିଥିଲେ, ନିରାମୟ କେନ୍ଦ୍ରକୁ ୨୪ଘଣ୍ଟା ଖୋଲି କମ୍ପାଉଣ୍ଡର ମେଡିସିନ ବିତରଣ କରିବା କଥା। କିନ୍ତୁ ଷ୍ଟାଫ୍ ଅଭାବରୁ ଏହାକୁ ୬ଘଣ୍ଟା ଖୋଲାଯାଇ ରୋଗୀଙ୍କୁ ଔଷଧ ଦିଆଯାଉଛି।
