ତେଲକୋଇ, ୨୧।୭(ଡି.ଏନ.ଏ.)-ତେଲକୋଇ ବ୍ଲକ ଅନ୍ତର୍ଗତ ଶିବନାରାୟଣପୁର ଗୋଡା ପଞ୍ଚାୟତରେ ରହିଛି ମାଙ୍କଡଖଳି ଗ୍ରାମ। ଏହି ଗ୍ରାମର ଲୋକେ ମୌଳିକ ସୁବିଧାରୁ ବଞ୍ଚିତ ହୋଇ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ପାହାଡ଼ଘେରା ଏହି ଗ୍ରାମରେ ୪୫ ପରିବାରର ୬ଶହରୁ ଊର୍ଦ୍ଧ୍ୱ ଲୋକେ ବସବାସ କରନ୍ତି। ଶତପ୍ରତିଶତ ଭୂୟାଁ ଜନଜାତିର ସମସ୍ତ ବିପିଏଲ ପରିବାର ଅତ୍ୟାବଶ୍ୟକ ସାମଗ୍ରୀ ପାଇଁ ପାହାଡ଼ ଚଢି ୩କି.ମି. ଆସିଥାନ୍ତି ପଞ୍ଚାୟତ ମୁଖ୍ୟାଳୟକୁ ।
ଶିକ୍ଷା, ସ୍ବାସ୍ଥ୍ୟ, ପାନୀୟଜଳ ସମସ୍ୟା ଥିବାବେଳେ ବିଦ୍ୟୁତ ଏମାନଙ୍କ ପାଇଁ ସାତ ସପନ। ପ୍ରାଥମିକ ଶିକ୍ଷା ବ୍ୟବସ୍ଥା ନ ଥିବା ଯୋଗୁ ଗ୍ରାମରେ ୩୦ରୁ ଊର୍ଦ୍ଧ୍ୱ ଛୁଆଙ୍କ ପାଠପଢାରେ ଡୋରି ବନ୍ଧା ହୋଇଛି । ତେବେ ଗତ ବର୍ଷ ମିନି ଅଙ୍ଗନୱାଡ଼ି କେନ୍ଦ୍ର କରାଯାଇ ଥିବା ସତ୍ତ୍ୱେ ଗୃହର ଅଭାବ ଯୋଗୁ ଗ୍ରାମ ମଣ୍ଡପରେ ଅଙ୍ଗନୱାଡି ଦିଦି ମଝିରେ ମଝିରେ ଛୁଆ ଏକାଠି କରି ଯଥାକଥା ପାଠପଢା କାର୍ଯ୍ୟ କରୁଥିବା ପ୍ରକାଶ କରିଛନ୍ତି ଗ୍ରାମବାସୀ । ସ୍ବାସ୍ଥ୍ୟସେବା ଅପହଞ୍ଚ ହୋଇଥିବା ଯୋଗୁ ଝଡାଫୁଙ୍କାକୁ ଗ୍ରାମବାସୀ ଗୁରୁତ୍ୱ ଦେଇଛନ୍ତି। ପାନୀୟଜଳ ପାଇଁ ସୋଲାର ବ୍ୟବସ୍ଥା ହୋଇଥିଲେ ହେଁ ଏହା ଅଚଳ ହେବାପରେ ଝରଣା ପାଣି ଉପରେ ଲୋକେ ଭରସା କରିଛନ୍ତି। ଜଙ୍ଗଲଜାତ ଦ୍ରବ୍ୟ ଓ ମୂଲ ମଜୁରି କରି ଚଳିଥାନ୍ତି ପରିବାର ଲୋକେ। ତେବେ ବିଦ୍ୟୁତ ବ୍ୟବସ୍ଥା ହୋଇପାରି ନ ଥିବା ଯୋଗୁ ସନ୍ଧ୍ୟା ହେଲେ ଜାଳକାଠ ଏମାନଙ୍କର ସାହା ଭରସା। ଏକ ବର୍ଷ ପୂର୍ବରୁ ବିପିଏଲ ପରିବାର ପାଇଁ ପ୍ରତିଘରେ ମିଟର ଓ ତାର ଲଗାଯାଇଛି। ଖୁଣ୍ଟ ପଡି ନ ଥିବା ଯୋଗୁ ବିଜୁଳି ସେବା ମଧ୍ୟ ପାଇପାରିନାହାନ୍ତି। ବିଭିନ୍ନ ସମୟରେ ଗାଁ ଲୋକେ ପ୍ରଶାସନକୁ ଗ୍ରାମର ସମସ୍ତ ସମସ୍ୟା ଅବଗତ କରି ବିଫଳ ହୋଇଥିବା ୱାର୍ଡମେମ୍ବର ଭାବଗ୍ରାହୀ ଦେହୁରୀ, ଶୈଳ ଦେହୁରୀ, ରନତ୍ାକର ଦେହୁରୀ, ଗୁରୁଚରଣ ଦେହୁରୀ, ହର୍ଷ ଦେହୁରୀ, ଜଲି ରାଣୀ ଦେହୁରୀଙ୍କ ସମେତ ବହୁ ଗ୍ରାମବାସୀ ପ୍ରକାଶ କରିଛନ୍ତି। ସ୍ଥାନୀୟ ସରପଞ୍ଚ ଶିରପାଣି ଦେହୁରୀଙ୍କୁ ଏ ସମ୍ପର୍କରେ ପଚାରିବାରୁ ଉକ୍ତ ଗ୍ରାମ ପାଇଁ ଶିକ୍ଷା, ସ୍ବାସ୍ଥ୍ୟସେବା, ବିଦ୍ୟୁତ ସଂଯୋଗ ପାଇଁ ଉଦ୍ୟମ ଜାରି ରହିଛି । ବିଡିଓ ଦିଲୀପ କୁମାର ବାରା କହିଛନ୍ତି ଯେ, ଗ୍ରାମବାସୀଙ୍କ ଅଭିଯୋଗ ଅବଗତ ହୋଇଛି। ଆବଶ୍ୟକ ସହାୟତା ପାଇଁ ପ୍ରତି ବିଭାଗକୁ କୁହାଯାଇଛି। ତେବେ ବିଦ୍ୟୁତ ବିଭାଗର ଏସଡିଓ ସର୍ବେଶ୍ୱର ସାହୁଙ୍କ କହିବା ଅନୁଯାୟୀ ବିଦ୍ୟୁତ ଖୁଣ୍ଟ ପଡ଼ିସାରିଛି। ଖୁବ କମଦିନ ଭିତରେ ବିଦ୍ୟୁତ ସଂଯୋଗର ବ୍ୟବସ୍ଥା କରାଯିବ।
