ଭୁବନେଶ୍ୱର,୧୨।୯(ବ୍ୟୁରୋ): ରାଜ୍ୟ ସରକାର ଅକ୍ଟୋବର ୨ରୁ ‘ମୋ ସରକାର’ କାର୍ଯ୍ୟକ୍ରମ ଆରମ୍ଭ କରିବାକୁ ଯାଉଛନ୍ତି। ଏହି କାର୍ଯ୍ୟକ୍ରମରେ ସବୁ ଜିଲାରେ ରହିଥିବା ଥାନା ଓ ମେଡିକାଲକୁ ଆସୁଥିବା ଜନସାଧାରଣଙ୍କ ସହ ଫୋନ ଜରିଆରେ ମୁଖ୍ୟମନ୍ତ୍ରୀ କଥାହୋଇ ସମସ୍ୟା ସମ୍ପର୍କରେ ଅବଗତ ହେବେ। କଟକ-ଭୁବନେଶ୍ୱର କମିଶନରେଟ୍ ପୋଲିସ ପକ୍ଷରୁ ଏ ନେଇ ପ୍ରସ୍ତୁତି ଚାଲିଥିବା ପୋଲିସ କମିଶନର ସୁଧାଂଶୁ ଷଡ଼ଙ୍ଗୀ କହିଛନ୍ତି। ମୁଖ୍ୟମନ୍ତ୍ରୀଙ୍କ ୫-ଟିକୁ କାର୍ଯ୍ୟକାରୀ କରିବାସହ ପୋଲିସ କର୍ମଚାରୀଙ୍କ ଆଚରଣ ଏବଂ ବ୍ୟବହାର ଉପରେ ରିପୋର୍ଟ କାର୍ଡ ପ୍ରସ୍ତୁତ କରାଯାଇଥିବା ସେ କହିଛନ୍ତି। କମିଶନର ଷଡ଼ଙ୍ଗୀ ଏତଲାକାରୀଙ୍କୁ ସିଧାସଳଖ ଫୋନ କରି ଥାନାର ରିପୋର୍ଟ କାର୍ଡ ନେଇଛନ୍ତି। ୮ ପ୍ରସଙ୍ଗରେ ପଚାରି ବୁଝିଛନ୍ତି। ବିଭିନ୍ନ ପ୍ରଶ୍ନର ଉତ୍ତର ଜାଣିବା ସହ ଏ ବାବଦରେ ଥାନାକୁ କେତେ ମାର୍କ ଦେବାକୁ ଚାହାନ୍ତି ତାହା ମଧ୍ୟ ଜାଣିବାକୁ ଚାହିଁଛନ୍ତି। ତେବେ ଏତଲାକରୀଙ୍କ ମାର୍କ ଉପରେ ଥାନା ଓ କର୍ମଚାରୀଙ୍କର ମାନଦଣ୍ଡ ନିର୍ଦ୍ଧାରଣ କରାଯିବ ବୋଲି କମିଶନର ସୂଚନା ଦେଇଛନ୍ତି।
ବୁଧବାର କମିଶନର ଷଡ଼ଙ୍ଗୀ ନିଜ କାର୍ଯ୍ୟାଳୟ କଲ୍ ସେଣ୍ଠ୍ଟରରୁ କଟକ ଏବଂ ଭୁବନେଶ୍ୱରର ୩ଜଣ ଏତଲାକରୀଙ୍କୁ କଲ୍ କରିଥିଲେ। ତିନିଜଣଙ୍କ ଭିତରୁ ଜଣଙ୍କୁ ଛାଡ଼ି ଅନ୍ୟ ଦୁଇଜଣ ଫୋନ୍ ଉଠାଇଥିଲେ। କଟକ ମଧୁପାଟଣା ଅଞ୍ଚଳର ଜଣେ ଏତଲାକାରୀଙ୍କୁ କମିଶନର କହିଥିଲେ, ରାଜ୍ୟ ସରକାରଙ୍କ ‘ମୋ ସରକାର’ କଲ୍ ସେଣ୍ଟରରୁ କହୁଛି। ରାଜ୍ୟ ସରକାରଙ୍କ ପକ୍ଷରୁ ଆରମ୍ଭ ହେବାକୁ ଥିବା ମୋ ସରକାର କାର୍ଯ୍ୟକ୍ରମ ପୂର୍ବରୁ ପୋଲିସ କର୍ମଚାରୀମାନେ ଅଭିଯୋଗକାରୀଙ୍କ ସହ କିଭଳି ବ୍ୟବହାର କରୁଛନ୍ତି ସେ ସମ୍ପର୍କରେ ଆପଣଙ୍କର ମତାମତ ନିଆଯିବ। ଆପଣଙ୍କ ନାମ ଏବଂ ପରିଚୟ ଗୁପ୍ତ ରଖାଯିବ। ଏତଲାକାରୀ ସମ୍ମତି ଜଣାଇବା ପରେ କମିଶନର ପଚାରିଥିଲେ, ଥାନାରେ ଆପଣଙ୍କ ଅଭିଯୋଗକୁ ଗ୍ରହଣ କରାଗଲା ନା ବାରମ୍ବାର ହଇରାଣ କରାଗଲା। ଥାନାର ବ୍ୟବହାର ଭଲ ରହିଥିଲା ନା ଠିକ୍ ନ ଥିଲା। ଅଭିଯୋଗ ଗ୍ରହଣର କପି ମେସେଜ ଯୋଗେ ଦିଆଯାଇଛି କି ନାହିଁ, ପୁଲିସ ତୁରନ୍ତ କାଯର୍ୟାନୁଷ୍ଠାନ ନେଇଛନ୍ତି ନା ନାହିଁ। ଅଭିଯୋଗ ସଂକ୍ରାନ୍ତରେ ପୋଲିସ କର୍ମଚାରୀଙ୍କ ବ୍ୟବହାର ଓ ଆଚରଣ କିଭଳି ରହିଥିଲା। ପ୍ରତି ପ୍ରଶ୍ନ ପାଇଁ ୫ ମାର୍କ ଥିବାବେଳେ ଅଭିଯୋଗକାରୀ ଥାନାଠାରୁ ପାଇଥିବା ସେବା ଅନୁଯାୟୀ ନିିର୍ଦ୍ଦିଷ୍ଟ ମାର୍କ ଦେଇଥିଲେ।
