ଲକ୍ଷ୍ନୌ,୧।୯: ଡାକ୍ତର ଲୋକଙ୍କୁ ବିଭିନ୍ନ ରୋଗ ସମସ୍ୟାରୁ ମୁକ୍ତ କରିଥାନ୍ତି। ତେଣୁ ଡାକ୍ତରଙ୍କୁ କେତେକ ଭଗବାନ ବୋଲି କହିଥାନ୍ତି। ଜଣେ ଡାକ୍ତର ରୋଗୀଙ୍କ ଚିକିତ୍ସା ପାଇଁ ସମସ୍ତ ପ୍ରୟାସ କରିଥାନ୍ତି। ଏହାର ସଦ୍ୟତମ ଉଦାହରଣ ଉତ୍ତରପ୍ରଦେଶ ଶିକୋହାବାଦ୍ରେ ଦେଖିବାକୁ ମିଳିଛି। ଏଠାରେ କେତେକ ଡାକ୍ତର ବିଦ୍ୟୁତ୍ ଆଲୁଅ ନ ଥିବାରୁ ନିଜ ମୋବାଇଲ୍ ଫ୍ଲାଶ୍ ଲାଇଟରେ ରୋଗୀଙ୍କ ଅପରେଶନ୍ କରିଛନ୍ତି। ସ୍ଥାନୀୟ ସରକାରୀ ହସ୍ପିଟାଲରେ ଦୁର୍ଘଟଣାରେ ଖଣ୍ଡିଆ ଖାବରା ହୋଇ ଜଣେ ବ୍ୟକ୍ତି ପହଞ୍ଚିଥିଲେ। ତେବେ ହସ୍ପିଟାଲରେ ସେତେବେଳେ ଲାଇନ୍ କଟିଯାଇଥିଲା। ମାତ୍ର ରୋଗୀଙ୍କ ଖଣ୍ଡିଆରେ ଷ୍ଟିଚ୍ ପକାଇବା ଆବଶ୍ୟକ ଥିଲା। ଡାକ୍ତରମାନେ ମିଳିମିଶି ମୋବାଇଲ୍ ଫ୍ଲାଶ୍ ଲାଇଟ୍ରେ ଷ୍ଟିଚ୍ ପକାଇବାକୁ ସ୍ଥିର କରିଥିଲେ। ଶେଷରେ ଏପରି କରାଯାଇଥିଲା। ସୋସିଆଲ ମିଡ଼ିଆରେ ଏବେ ଏହାର ଭିଡ଼ିଓ ଭାଇରାଲ ହେବାରେ ଲାଗିଛି। ଡାକ୍ତରଙ୍କୁ ସଭିଏଁ ପ୍ରଶଂସା କରି କମେଣ୍ଟ ଦେଇଛନ୍ତି।
