ଡେରାଡୁନ୍,୧୩।୯: ୨୦୧୯ ଲୋକ ସଭା ନିର୍ବାଚନ ଶେଷ ପର୍ଯ୍ୟାୟ ଭୋଟ ପାଇଁ ପ୍ରଚାର ଶେଷ ହେବାର ଗୋଟିଏ ଦିନ ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କେଦାରନାଥ ଯାଇ ପୂଜାର୍ଚ୍ଚନା କରି ସେଠାରେ ଥିବା ଏକ ଗୁମ୍ଫାରେ ଧ୍ୟାନରେ ବସିଥିଲେ। ଏହି ଗୁମ୍ଫାକୁ ଏବେ ପ୍ରତିଦିନ ଲୋକଙ୍କ ସୁଅ ଛୁଟୁଛି। ଏପରିକି ଆସନ୍ତା ଅକ୍ଟୋବର ପର୍ଯ୍ୟନ୍ତ ଗୁମ୍ଫାକୁ ଯିବା ପାଇଁ ସମସ୍ତ ଟିକେଟ ବୁକିଂ ଶେଷ ହୋଇଛି ବୋଲି ଜଣାପଡିଛି। ଦେଶରେ ଏବେ ଏହି ସ୍ଥାନ ଏକ ସ୍ବତନ୍ତ୍ର ପର୍ଯ୍ୟଟନସ୍ଥଳୀ ଭାବେ ପରିଣତ ହୋଇଛି। ସୂଚନାଯୋଗ୍ୟ, ମୋଦି ମେ ୧୮ରେ କେଦାରନାଥ ଦର୍ଶନ ପାଇଁ ଯାଇଥିଲେ। ସେଠାରେ ଏକ ଗୁମ୍ଫାରେ ସାରା ରାତି ଧ୍ୟାନରେ ବସିଥିଲେ ମୋଦି। ସେତେବେଳେ ଏହାକୁ ନେଇ ଗଣମାଧ୍ୟମରେ ଖୁବ୍ ଚର୍ଚ୍ଚା ହୋଇଥିଲା। ପରେ ଏହି ଗୁମ୍ଫାକୁ ଦେଖିବା ପାଇଁ ଶ୍ରଦ୍ଧାଳୁଙ୍କ ଭିଡ ଜମିଥିଲା। ଗତ ୬୫ ଦିନରେ ୪୬ଜଣ ଶ୍ରଦ୍ଧାଳୁ ଏଠାରେ ଧ୍ୟାନରେ ବସିସାରିଲେଣି। ଏହି ଗୁମ୍ଫାରେ ଗୋଟିଏ ରାତି ଧ୍ୟାନରେ ବସିବାକୁ ହେଲେ ୧୫୦୦ ଟଙ୍କା ଏବଂ ଦିନସାରା ବସିବାକୁ ୯୯୦ ଟଙ୍କା ଶୁଳ୍କ ନିଆଯାଏ।
