ଭୁବନେଶ୍ୱର,୨ା୭(ଅନିଲ ଦାସ):ଦୀର୍ଘବର୍ଷ ପରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ସୋମବାର ସିଧାସଳଖ ଲୋକଙ୍କ ଅଭିଯୋଗ ଶୁଣିବା ଖବର ପ୍ରସାରିତ ହେବା ପରେ ସାରା ରାଜ୍ୟରୁ ନିଜର ସମସ୍ୟା ନେଇ ବହୁ ଲୋକ ରାଜଧାନୀକୁ ଛୁଟି ଆସିଥିଲେ ।
ସୋମବାର ସକାଳ ୯ଟାରୁ ୧୨ଟା ମଧ୍ୟରେ ପଞ୍ଜୀକରଣ ସମୟ ଧାର୍ଯ୍ୟ ହୋଇଥିବାରୁ ଏହା ପୂର୍ବରୁ ଲୋକଙ୍କ ଆଗମନ ଆରମ୍ଭ ହୋଇଯାଇଥିଲା। ପୂର୍ବାହ୍ନ ୧୦ଟା ସୁଦ୍ଧା ୟୁନିଟ-୫ ସ୍ଥିତ ମୁଖ୍ୟମନ୍ତ୍ରୀଙ୍କ ଅଭିଯୋଗ ପ୍ରକୋଷ୍ଠ ନିକଟରେ ଭିଡ଼ ବଢ଼ିଚାଲିଲା। ୧୧ଟା ୩୦ ବେଳକୁ ଅସମ୍ଭାଳ ଭିଡ଼ ଦେଖିବାକୁ ମିଳିଥିଲା। ସମସ୍ତଙ୍କ ମନରେ ଅସୁମାରି ଭରସା। ମୁଖ୍ୟମନ୍ତ୍ରୀ ସେମାନଙ୍କ ସମସ୍ୟା ଦୂର କରିବେ। ମୁଖ୍ୟମନ୍ତ୍ରୀଙ୍କୁ ଭେଟିବା ପରେ ଅନେକ ବ୍ୟକ୍ତି ଖୁସିବ୍ୟକ୍ତ କରିଛନ୍ତି। ସେମାନେ କହିଛନ୍ତି, ମୁଖ୍ୟମନ୍ତ୍ରୀଙ୍କୁ ଭେଟି ସିଧାସଳଖ ଦୁଃଖ ଜଣାଇବା ହେଉଛି ସବୁଠୁ ବଡ଼ କଥା। ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଲେ ସମସ୍ୟା ସମାଧାନ ହେବ ବୋଲି ଲୋକମାନେ ଆଶା କରିଛନ୍ତି। ଅନ୍ୟ ପକ୍ଷରେ ମୁଖ୍ୟମନ୍ତ୍ରୀ, ଉପମୁଖ୍ୟମନ୍ତ୍ରୀ କନକ ବର୍ଦ୍ଧନ ସିଂଦେଓ ଓ ଅନ୍ୟ ମନ୍ତ୍ରୀମାନେ ପୂର୍ବାହ୍ନ ୧୧ଟାରେ ଅଭିଯୋଗ ପ୍ରକୋଷ୍ଠରେ ପହଞ୍ଚତ୍ ଶୁଣାଣି ଆରମ୍ଭ କରିଥିଲେ। ଦୀର୍ଘ ସମୟ ପର୍ଯ୍ୟନ୍ତ ଲୋକଙ୍କ ସମସ୍ୟା ଶୁଣିବା ସହ ଏହାର ସମାଧାନ ପାଇଁ ବିଭାଗର ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି।
ମୁଖ୍ୟମନ୍ତ୍ରୀ ସମସ୍ତ କଥାକୁ ଭଲ ଭାବେ ଶୁଣୁଛନ୍ତି
ବଲାଙ୍ଗୀର ଜିଲାର ପ୍ରସନ୍ନ ପଟ୍ଟନାୟକ ହେଉଛନ୍ତି ଜଣେ ଅବସରପ୍ରାପ୍ତ ଶିକ୍ଷକ। ସେ ୨୦୧୩ରୁ ବଲାଙ୍ଗୀର ବାଳିକା ଉଚ୍ଚ ବିଦ୍ୟାଳୟରୁ ଚାକିରିରୁ ଅବସର ନେଇଛନ୍ତି। ୧୯୮୨ ମସିହାରୁ ଚାକିରି କରିଥିଲେ ମଧ୍ୟ ତାଙ୍କର ପେନ୍ସନ ୧୯୯୬ରୁ ହିସାବ କରାଯାଇଥିଲା। ବଳକା ୧୪ ବର୍ଷର ହିସାବକୁ ବିଭାଗ ନେଉ ନ ଥିବାରୁ ମୁଖ୍ୟମନ୍ତ୍ରୀଙ୍କୁ ସେ ତାଙ୍କର ଦୁଃଖ ମୁଖ୍ୟମନ୍ତ୍ରୀଙ୍କୁ ଜଣାଇଛନ୍ତି। ଏହାର ସମାଧାନ କରିବାକୁ ମୁଖ୍ୟମନ୍ତ୍ରୀ ନିର୍ଦ୍ଦେଶ ମଧ୍ୟ ଦେଇଥିବା ସେ କହିଛନ୍ତି। ଅନ୍ୟ ପକ୍ଷରେ ସେ କହିଛନ୍ତି, ମୁଖ୍ୟମନ୍ତ୍ରୀଙ୍କୁ ସାକ୍ଷାତ୍ କରି ନିଜର ସମସ୍ୟା ଜଣାଇବା ହେଉଛି ବଡ଼ କଥା। ମୁଖ୍ୟମନ୍ତ୍ରୀ ସମସ୍ତ କଥାକୁ ଭଲଭାବେ ଶୁଣି ସମାଧାନ ପାଇଁ ନିର୍ଦ୍ଦେଶ ଦେଉଛନ୍ତି। ଦୀର୍ଘବର୍ଷର ଏହି ସମସ୍ୟା ସମାଧାନ ହୋଇଯିବ ବୋଲି ଆଶା କରୁଛି।
-ପ୍ରସନ୍ନ ପଟ୍ଟନାୟକ ଶିକ୍ଷକ, ବଲାଙ୍ଗୀର
ମୁଖ୍ୟମନ୍ତ୍ରୀଙ୍କୁ ଭେଟିଲି, ଦୁଃଖ ଦୂର ହେବ
ସ୍ବାମୀ ଚାଲିଗଲା ପରେ ୩ ଝିଅ ଓ ପୁଅକୁ ନେଇ ରହୁଛି। ନିଜର ମଧ୍ୟ ସ୍ବାସ୍ଥ୍ୟ ଭଲ ନାହିଁ। ପରିବାର ଚଳାଇବା କଷ୍ଟକର ହେଉଛି। ପକ୍କାଘର ଖଣ୍ଡେ ନାହିଁ। ମୁଖ୍ୟମନ୍ତ୍ରୀଙ୍କୁ ନିଜର ଗୁହାରି ଜଣାଇବା ସହ କିଛି ସହାୟତା ପାଇବା ଆଶାରେ ଏତେଦୂରରୁ ଆସିଛି। ଆମ କଥା କେହି ତ’ ଶୁଣୁ ନାହାନ୍ତି। ମୁଖ୍ୟମନ୍ତ୍ରୀଙ୍କୁ ଭେଟିଲେ ଦୁଃଖ ଦୂର ହେବ ବୋଲି ଆଶା ରହିଛି।
– ସୀତା ପାତ୍ର, ତେଲକୋଇ, କେନ୍ଦୁଝର
ପୁଅ ଚାକିରି ସ୍ଥାୟୀ କରିବାକୁ ମୁଖ୍ୟମନ୍ତ୍ରୀଙ୍କୁ କହିଲି
ପୁଅର ଚାକିରି ସ୍ଥାୟୀ କରିବା ପାଇଁ କେନ୍ଦ୍ରାପଡ଼ା ଜିଲା ପଟ୍ଟାମୁଣ୍ଡାଇରୁ ଧାଇଁଆସିଥିଲେ ସଚିବାଳା ପ୍ରଧାନ। ସାଧାରଣ ପ୍ରଶାସନ ବିଭାଗରେ ତାଙ୍କ ପୁଅ ଡାଟା ଏଣ୍ଟ୍ରିି ଅପରେଟର ଭାବେ ଦୀର୍ଘ ବର୍ଷ କାମ କରିବା ପରେ ନିୟମିତ ହୋଇନାହାନ୍ତି। ମୁଖ୍ୟମନ୍ତ୍ରୀଙ୍କୁ ଭେଟି ପୁଅର ଚାକିରି ପାଇଁ ଗୁହାରି କରିଛି। ଏକଥା ବୁଝିବାକୁ ମୁଖ୍ୟମନ୍ତ୍ରୀ ଅଫିସରମାନଙ୍କୁ କହିଛନ୍ତି। ମୁଖ୍ୟମନ୍ତ୍ରୀଙ୍କୁ ଏତେ ପାଖରୁ ପାଇ ଖୁସି ଲାଗୁଛି। ବଡ଼ ଦୁଃଖ କଷ୍ଟରେ ଚଳୁଛୁ। ଭଗବାନ୍ଙ୍କୁ ଡାକୁଛି ପୁଅର ଚାକିରି କେମିତି ସ୍ଥାୟୀ ହୋଇଯାଉ।
– ସଚିବାଳା ପ୍ରଧାନ, ପଟ୍ଟାମୁଣ୍ଡାଇ
ଭିଡ଼ଥିଲା ଆର ସୋମବାରକୁ ଆସିବି
ଢେଙ୍କାନାଳର ଏକ ଭିନ୍ନକ୍ଷମ ସ୍କୁଲରେ ଶିକ୍ଷକତା କରୁଥିବା ଦିବ୍ୟାଙ୍ଗ ଦିବାକର ସାହୁ ନିଜର ସମସ୍ୟା ନେଇ ମୁଖ୍ୟମନ୍ତ୍ରୀଙ୍କୁ ଭେଟିବାକୁ ଆସିଥିଲେ। ତେବେ ଭିଡ଼ ବହୁତ ଥିବାରୁ ସେ ନିଜର ସମସ୍ୟା ଜଣାଇ ନ ପାରି ଫେରି ଯାଇଛନ୍ତି। ସେ କହିଛନ୍ତି, ମୋର ଆସିବା ବିଳମ୍ବ ହେବାରୁ ନାମ ପଞ୍ଜୀକରଣ କରିପାରିଲି ନାହିଁ। ଆସନ୍ତା ସପ୍ତାହରେ ଆସିବି। ଦୀର୍ଘ ବର୍ଷ ହେବ ଶିକ୍ଷକତା କରୁଥିଲେ ମଧ୍ୟ ଚାକିରି ସ୍ଥାୟୀ ହୋଇ ପାରି ନାହିଁ। ମୁଖ୍ୟମନ୍ତ୍ରୀଙ୍କୁ ଗୁହାରି ଜଣାଇବି ବୋଲି ସେ କହିଛନ୍ତି।
-ଦିବାକର ସାହୁ,
ଭିନ୍ନକ୍ଷମ ସ୍କୁଲ ଶିକ୍ଷକ, ଢେଙ୍କାନାଳ
