ଅନୁଗୋଳ ସହର, ୧।୨ – ଆବେଦନର ୭ ଦିନ ମଧ୍ୟରେ ଜନ୍ମ କିମ୍ବା ମୃତ୍ୟୁ ପଞ୍ଜୀକରଣ ସାର୍ଟିଫିକେଟ ପ୍ରଦାନ କରାଯିବାର ନିୟମ ରହିଛି। କିନ୍ତୁ ଜଣେ ଦିବ୍ୟାଙ୍ଗ ବୃଦ୍ଧ ବର୍ଷେ ହେଲା ସ୍ତ୍ରୀଙ୍କ ମୃତ୍ୟୁ ସାର୍ଟିଫିକେଟ ପାଇଁ ଦୌଡ଼ୁଥିଲେ ମଧ୍ୟ ତାହା ମିଳିପାରୁ ନାହିଁ। ବାରମ୍ବାର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରୁ ଜିଲା ସ୍ବାସ୍ଥ୍ୟକେନ୍ଦ୍ର ଧାଇଁ ଧାଇଁ ସେ ନୟାନ୍ତ ହୋଇଯାଇଥିବା ଅଭିଯୋଗ କରିଛନ୍ତି।
ସମ୍ପୃକ୍ତ ଦିବ୍ୟାଙ୍ଗ ବୃଦ୍ଧ ଜଣକ ହେଲେ ଅନୁଗୋଳ ଜିଲା ବନ୍ତଳା ଥାନା ପୋକତୁଙ୍ଗା ଗ୍ରାମର ଭଗବାନ ନାଏକ(୬୧)। ଭଗବାନଙ୍କ କହିବା ଅନୁଯାୟୀ, ୨୦୧୮ ଜାନୁୟାରୀ ୨୭ରେ ସ୍ତ୍ରୀ ସାବିତ୍ରୀ ନାଏକ(୫୨)ଙ୍କୁ ସେ ଗୁରୁତର ଅବସ୍ଥାରେ ବନ୍ତଳା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ନେଇଥିଲେ। ଡାକ୍ତର ଫେରାଇ ଦେବାରୁ ସେ ସ୍ତ୍ରୀଙ୍କୁ ଜିଲା ମୁଖ୍ୟ ଚିକିତ୍ସାଳୟକୁ ନେଇଥିଲେ। ହେଲେ ସେଠାରେ ଡାକ୍ତର ସାବିତ୍ରୀଙ୍କୁ ମୃତ ଘୋଷଣା କରିଥିଲେ। ମୃତଦେହ ଘରକୁ ଆଣିବାକୁ ପାଖରେ ଅର୍ଥ ନ ଥିବାରୁ ଏଥିପାଇଁ ତାଙ୍କୁ ବହୁ କଷ୍ଟ କରିବାକୁ ପଡ଼ିଥିଲା। ପରେ ସ୍ତ୍ରୀଙ୍କ ମୃତ୍ୟୁ ପ୍ରମାଣପତ୍ର ପାଇଁ ସେ ବନ୍ତଳା ସ୍ବାସ୍ଥ୍ୟକେନ୍ଦ୍ରରେ ଆବେଦନ କରିଥିଲେ। କିନ୍ତୁ ସେଠାରୁ ତାଙ୍କୁ ଜିଲା ମୁଖ୍ୟ ଚିକିତ୍ସାଳୟକୁ ପଠାଇ ଦିଆଯାଇଥିଲା। ପାରାଲିସିସ୍ରେ ଦୁଇଗୋଡ଼ ଅଚଳ ହୋଇଯାଇଥିବାରୁ ସେ ତିନି ଚକିଆ ସାଇକେଲରେ ବାରମ୍ବାର ବନ୍ତଳା ଓ ଜିଲା ମୁଖ୍ୟ ଚିକିତ୍ସାଳୟ ଯାଇ ପ୍ରମାଣପତ୍ର ପାଇଁ ନେହୁରା ହୋଇଥିଲେ। କିନ୍ତୁ ସାର୍ଟିଫିକେଟ ଦେବା ନଁାରେ ତାଙ୍କ ଠାରୁ ୨ ଶହ ଟଙ୍କା ନିଆଯାଇ ପୁନର୍ବାର ଜିଲା ମୁଖ୍ୟ ଚିକିତ୍ସାଳୟକୁ ପଠାଇ ଦିଆଯାଇଥିଲା। ତାଙ୍କ ନାମ ପଞ୍ଜୀକରଣ ମଧ୍ୟ କରାଯାଇନାହିଁ। ତେଣୁ ସେ ବାଧ୍ୟ ହୋଇ ସ୍ତ୍ରୀଙ୍କ ମୃତ୍ୟୁ ସମ୍ପର୍କରେ ଆଫିଡେଭିଟ୍ କରିଛନ୍ତି ବୋଲି ଭଗବାନ ପ୍ରକାଶ କରିଛନ୍ତି।
ଏ ବିଷୟରେ ଗଣନାକାରୀ ଅଧିକାରୀ ପ୍ରୀତିଲତା ଦେଓ କହିଛନ୍ତି ଭଗବାନଙ୍କ ସ୍ତ୍ରୀଙ୍କ ମୃତ୍ୟୁ ଅନୁଗୋଳ ଜିଲା ମୁଖ୍ୟ ଚିକିତ୍ସାଳୟରେ ହୋଇଛି। ତେଣୁ ଆଶା ଓ ଅଙ୍ଗନୱାଡ଼ି କର୍ମୀ ରିପୋର୍ଟ ଦେବା ପାଇଁ ମନା କଲେ। ପୌରପାଳିକାରେ ତାଙ୍କ ନାମ ଏଣ୍ଟ୍ରି ହୋଇନାହିଁ। ବନ୍ତଳାରୁ ସାର୍ଟିଫିକେଟ ନେବା ପାଇଁ ତାଙ୍କୁ ଆଫିଡେଭିଟ୍ କରି ଦେବା ପାଇଁ କୁହାଯାଇଥିଲା। ଅନୁମତି ପାଇଁ ୧ ମାସ ପୂର୍ବରୁ ଚିଠି କରାଯାଇଛି। ସେ ଡାକ୍ତରଖାନାକୁ ୪ରୁ ୫ ଥର ଆସିଛନ୍ତି ବୋଲି ପ୍ରୀତିଲତା ପ୍ରକାଶ କରିଛନ୍ତି। ବନ୍ତଳା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଅଧିକାରୀ ଘନଶ୍ୟାମ ବେହେରା କହିଛନ୍ତି, ଭଗବାନଙ୍କ ସ୍ତ୍ରୀଙ୍କ ମୃତ୍ୟୁ ଅନୁଗୋଳରେ ହୋଇଥିବା ଯୋଗୁ ଏଡିଏମ୍ଓଙ୍କ ପାଖରୁ ଅନୁମତି ମିଳିବା ପରେ ସାର୍ଟିଫିକେଟ ଦିଆଯିବ।
