ଘଟଗାଁ,୨୧।୩(ଡି.ଏନ୍.ଏ.)- କେନ୍ଦୁଝର ଜିଲାର ପ୍ରସିଦ୍ଧ ମା’ ତାରିଣୀଙ୍କ ପୀଠରେ ଭକ୍ତଙ୍କ ଦର୍ଶନ ଉପରେ କଟକଣା ଲାଗୁ କରାଯାଇଛି। କରୋନା ଭାଇରସ ସଂକ୍ରମଣରୁ ରକ୍ଷା ପାଇଁ ରାଜ୍ୟ ସରକାରଙ୍କ ନିର୍ଦ୍ଦେଶକ୍ରମେ ଜିଲା ପ୍ରଶାସନ ତରଫରୁ ଜିଲାର ସମସ୍ତ ମଠ ମନ୍ଦିରରେ ପୂଜାର୍ଚ୍ଚନା ପାଇଁ ସାଧାରଣ ଭକ୍ତଙ୍କୁ ଆଜିଠାରୁ ବାରଣ କରାଯାଇଛି। ତଦନୁଯାୟୀ ମା’ ତାରିଣୀଙ୍କ ମନ୍ଦିରରେ ଭକ୍ତଙ୍କ ଦର୍ଶନ ବନ୍ଦ ରହିବାରୁ ବିଭିନ୍ନ ସ୍ଥାନରୁ ଆସିଥିବା ଶ୍ରଦ୍ଧାଳୁ ଭକ୍ତ ଗେଟ୍ ସମ୍ମୁଖରୁ ମା’ଙ୍କୁ ପ୍ରଣାମ ଜଣାଇ ଫେରିଛନ୍ତି। ଭୋଗ ଦୋକାନ ଓ ପ୍ରସାଦଳୟ ବନ୍ଦ ରହିଛି। ପୀଠ ପରିସର ଏଥିଲାଗି ଖାଁଖାଁ ଲାଗୁଛି।
ପ୍ରଶାସନ ତରଫରୁ ଜାରି ନିର୍ଦ୍ଦେଶାନାମା ତାରିଣୀ ମନ୍ଦିର ପ୍ରଶାସନ ତରଫରୁ କିଭଳି ପାଳନ କରାଯାଇଛି ତାହା ତଦାରଖ ଲାଗି କେନ୍ଦୁଝର ଉପଜିଲାପାଳ ରାମଚନ୍ଦ୍ର କିସ୍କ, ସହକାରୀ କଲେକ୍ଟର ସୁବୋଧକାନ୍ତ ଦାସ ଅଚାନକ ମଧ୍ୟାହ୍ନ ବେଳେ ଘଟଗାରେ ପହଞ୍ଚିଥିଲେ। ସେମାନେ ମନ୍ଦିର ମୁଖଶାଳା ଗେଟ୍ ଓ ପ୍ରସ୍ଥାନ ଦ୍ୱାର ବନ୍ଦ ଅଛିକି ନାହିଁ ଦେଖିଥିଲେ। ଏହାକୁ କଡ଼ାକଡ଼ି କରିବା ସହ ପୀଠ ପରିସରକୁ ପରିସ୍କାର ପରିଚ୍ଛନ୍ନ ରଖିବାକୁ ସେମାନେ ଗୁରୁତ୍ୱାରୋପ କରିଥିଲେ।
ବିଶ୍ୱବ୍ୟାପୀ ଆତଙ୍କ ଖେଳାଇଥିତ୍ବା କରୋନା ଭାଇରସର ମୁକାବିଲା ଲାଗି ସରକାର ଯେଉଁ ପ୍ରତିଷେଧକ ବ୍ୟବସ୍ଥା ଗ୍ରହଣ କରିଛନ୍ତି, ତାହାକୁ ଅଞ୍ଚଳବାସୀ ଓ ଶ୍ରଦ୍ଧାଳୁଗଣ ସ୍ବାଗତ କରିଛନ୍ତି। ଭକ୍ତଙ୍କ ଦର୍ଶନ ବାରଣ କରାଯାଇଥିଲେ ମଧ୍ୟ ମା’ ତାରିଣୀଙ୍କ ମନ୍ଦିରରେ ପାରମ୍ପରିକ ଦୈନନ୍ଦିନ ପୂଜାନୀତି ଯେପରି ଚାଲେ ତାହା ସୂଚାରୁରୂପେ କରାଯାଇଥିଲା। ବରିଷ୍ଠ ପୂଜକ ଶ୍ୟାମସୁନ୍ଦର ଦେହୁରୀ, ରମେଶ ଚନ୍ଦ୍ର ଦେହୁରୀ ସକାଳ ମାର୍ଜ୍ଜନା, ଷୋଡ଼ଶ ଉପଚାର, ବଡ଼ସିଂହାର ପୂଜା କରିଥିଲେ। ସକାଳ ଆଳତି ପରେ ପୂର୍ବାହ୍ନ ୧୦ଟା ବେଳେ ମାଙ୍କ ଶଙ୍ଖୁଡ଼ି ଭୋଗ ଲାଗି କରାଯାଇଥିଲା। ସନ୍ଧ୍ୟାରେ ଚକୁଳି ଭୋଗ ଓ ରାତି ସାଢେ ୭ଟାରେ ଆଳତି କରାଯାଇଥିଲା। ମନ୍ଦିର ଭିତରକୁ କେବଳ ପୂଜକ ତଥା ସେବାୟତମାନଙ୍କୁ ଯିବାକୁ ଅନୁମତି ଦିଆଯାଇଥିଲା। ଏଭଳି ସ୍ଥିତି ଦେଖି କେହି କେହି ଏହାକୁ ପୂର୍ବରୁ ଏଭଳି ପରିସ୍ଥିତି କେବେ ଦେଖିନ ଥିବା କହିଛନ୍ତି।
କେବଳ ମନ୍ଦିର ପରିସର ନୁହେଁ, ସମସ୍ତ ଘଟଗାଁର ସମସ୍ତ ଦୋକାନ ବଜାର ବନ୍ଦ ହୋଇଯାଇଛି। ଭକ୍ତଙ୍କ ସମାଗମ ନ ଥିବାରୁ ସେମାନଙ୍କ ବ୍ୟବସାୟ ଠପ୍ ହୋଇଯାଇଛି। ଘଟଗାଁ ସ୍ଥିତ ହୋଟେଲ ଶିଳ୍ପ ମଧ୍ୟ ପ୍ରଭାବିତ ହୋଇଛି।
