ନୂଆଦିଲ୍ଲୀ/କୋଲକାତା,୧୨-୯: ଆର୍ଥିକ ମାନ୍ଦାବସ୍ଥା କାରଣରୁ କମ୍ପାନୀଗୁଡ଼ିକ ନିଜ କର୍ମଚାରୀଙ୍କୁ ପାର୍ବଣ ବୋନସ୍ ଦେବେ। ସେମାନେ ଏହାକୁ ବନ୍ଦ ଅଥବା ବିଳମ୍ବ କରିବେ ନାହିଁ ବୋଲି ଜଣାପଡିଛି। ଫଳରେ କଞ୍ଜ୍ୟୁମର ଗୁଡ଼୍ସ ଏବଂ ରିଟେଲର କମ୍ପାନୀ ସ୍ବସ୍ତିର ନିଃଶ୍ୱାସ ମାରୁଛନ୍ତି। ଏହାଦ୍ୱାରା ଗ୍ରାହକଙ୍କ ମନରେ ଉତ୍ସାହ ଆସିବ ଏବଂ ପାର୍ବଣ ଋତୁରେ କିଣାବିକା ଜୋରଦାର ହେବ ବୋଲି ସେମାନେ ମନେକରୁଛନ୍ତି। ହିନ୍ଦୁସ୍ତାନ ୟୁନିଲିଭର, ଆଇଟିସି, ଗୋଦ୍ରେଜ ଗ୍ରୁପ୍, ଆକ୍ସିସ୍ ବ୍ୟାଙ୍କ, ଫ୍ୟୁଚର ଗ୍ରୁପ୍, ହୋଣ୍ଡା ମୋଟରସାଇକେଲ ଆଣ୍ଡ ସ୍କୁଟର ଇଣ୍ଡିଆ, ମାରୁତି ସୁଜୁକି, ଆର୍ପିଜି ଗ୍ରୁପ୍, ବିଗ୍ବାସ୍କେଟ, ଗ୍ରୋଫର୍ସ, ପ୍ୟୁମା, ପାନାସୋନିକ ଏବଂ ଡିକ୍ସନ ଟେକ୍ନୋଲୋଜିସ୍ ଭଳି ବୃହତ୍ କମ୍ପାନୀଗୁଡ଼ିକ ନିଜ କର୍ମଚାରୀଙ୍କୁ ଫେଷ୍ଟିଭ ବୋନସ୍ ଦେବେ ବୋଲି କମ୍ପାନୀ ଏକ୍ଜିକ୍ୟୁଟିଭମାନେ ପ୍ରକାଶ କରିଛନ୍ତି। କଞ୍ଜ୍ୟୁମର ଗୁଡ଼୍ସ କମ୍ପାନୀଙ୍କ କହିବାନୁଯାୟୀ, କେରଳରେ ଓଣମ୍ ପର୍ବ ପାଳନ ପାଇଁ ଚଳିତ ମାସର ପ୍ରଥମ ସପ୍ତାହରେ ଫେଷ୍ଟିଭ ପେମେଣ୍ଟ ପ୍ରଦାନ କରାଯାଇଛି। ଫଳସ୍ବରୂପ, ଗତବର୍ଷ ତୁଳନାରେ ଚଳିତ ବର୍ଷ ବିକ୍ରି ୩-୪% ବଢ଼ିଛି। ଏହି ଫେଷ୍ଟିଭ ପେମେଣ୍ଟକୁ ନେଇ ଆଇଟିସି ଲିମିଟେଡ ଏକ୍ଜିକ୍ୟୁଟିଭ ଡାଇରେକ୍ଟର ବି.ସୁମନ୍ତ କହିଛନ୍ତି ଯେ, ଆଗାମୀ ସିଜନରେ ଉପଭୋଗ ସାମଗ୍ରୀରେ ଖର୍ଚ୍ଚ ବଢ଼ିବ। ତେବେ ଗୋଦ୍ରେଜ ଆପ୍ଲାଏନ୍ସେସ୍ର ବିଜ୍ନେସ୍ ମୁଖ୍ୟ କମଲ୍ ନନ୍ଦୀ କହିଛନ୍ତି ଯେ, କେବଳ ଫେଷ୍ଟିଭ ବୋନସରେ କାମ ଚଳିବ ନାହିଁ। ସରକାରଙ୍କ ପକ୍ଷରୁ ସହାୟତା ପ୍ୟାକେଜ ପ୍ରଦାନ କରାଯିବା ପରେ ଲୋକଙ୍କ ମନୋଭାବ ବଦଳିବ।
