ବନ୍ତଳା,୧୬।୯(ଡି.ଏନ.ଏ.) ୨ ନୀରିହ ଶିଶୁଙ୍କୁ ଛାଡି ମା’ କେଉଁଆଡେ ପଳାଇଥିବାବେଳେ ଏବେ ହାତ ଛାଡିଦେଇଛନ୍ତି ବାପା। ଫଳରେ ସମବାୟ ବ୍ୟାଙ୍କ ବାରଣ୍ଡାରେ ୫ ଦିନ ହେଲା ଅସହାୟ ଅବସ୍ଥାରେ ଅଖିଆ ଅପିଆ ପଡିରହିଛନ୍ତି ଦୁଇ ଶିଶୁ। ଅନୁଗୋଳ ଜିଲା ପୁରୁଣାକୋଟ ଥାନା ଶରଧାପୁର ପଞ୍ଚାୟତ ଗୁରୁଧି ଗ୍ରାମରେ ଏପରି ଦୃଶ୍ୟ ଦେଖିବାକୁ ମିଳିଛି। ତୁରନ୍ତ ଶିଶୁ ମଙ୍ଗଳ ଅଧିକାରୀ ସେମାନଙ୍କୁ ଉଦ୍ଧାର କରିବାକୁ ଗ୍ରାମବାସୀ ଦାବି କରିଛନ୍ତି।
ଗୁରୁଧି ଗ୍ରାମବାସୀଙ୍କ କହିବା ମୁତାବକ, ପ୍ରାୟ ୬ ମାସ ପୂର୍ବରୁ ଜଣେ ମା’ ବାପାଙ୍କ ସହ ୫ ବର୍ଷର ଶିଶୁପୁତ୍ର, ୪ ବର୍ଷର ଶିଶୁକନ୍ୟା ଆଠମଲ୍ଲିକ ଅଞ୍ଚଳରୁ ଗୁରୁଧିକୁ ଆସିଥିଲେ। ସେଠାରେ ଦମ୍ପତି କେନ୍ଦୁପତ୍ର ଫଡିରେ କାମ କରୁଥିଲେ। କିଛି ଦିନ ପୂର୍ବରୁ ହଠାତ୍ ମା’ ସେମାନଙ୍କୁ ଛାଡି ଘରୁ କେଉଁଆଡେ ପଳାଇଥିଲେ। ଏବେ ପ୍ରାୟ ୫ ଦିନ ହେଲା ଶିଶୁ ଦ୍ୱୟଙ୍କ ବାପା ଉଭୟଙ୍କୁ ଗୁରୁଧି ସେବା ସମବାୟ ବ୍ୟାଙ୍କ ବାରଣ୍ଡାରେ ଛାଡି ପଳାଇଛନ୍ତି। ଫଳରେ ଅସହାୟ ଅବସ୍ଥାରେ ଶିଶୁ ଦୁଇଜଣ ସେହି ବାରଣ୍ଡାରେ ପଡି ରହିଛନ୍ତି। ତୁରନ୍ତ ପୋଲିସ ଓ ଶିଶୁ ମଙ୍ଗଳ ବିଭାଗ ଅଧିକାରୀ ପହଞ୍ଚି ସେମାନଙ୍କୁ ଉଦ୍ଧାର କରିବା ପାଇଁ ଦାବି ହୋଇଛି। ଏ ବିଷୟରେ ଜିଲା ଶିଶୁ ମଙ୍ଗଳ ଅଧିକାରୀ ଗୋରୀ ଶଙ୍କର ବେହେରା କୁହନ୍ତି, ଏ ନେଇ ଆମ ପାଖକୁ କେହି ଖବର ଦେଇନାହାନ୍ତି। ତୁରନ୍ତ ଶିଶୁ ଦୁଇଜଣଙ୍କୁ ସେଠାରୁ ଉଦ୍ଧାର କରିବା ପାଇଁ ପୁରୁଣାକୋଟ ଥାନା ଅଧିକାରୀଙ୍କୁ ଜଣାଇଛି।
