ପିଲାମାନଙ୍କୁ ବିଦ୍ୟାଳୟାଭିମୁଖୀ କରିବା ପାଇଁ ସରକାର ବିଭିନ୍ନ ପଦକ୍ଷେପ ହାତକୁ ନେଉଛନ୍ତି। ଫଳରେ ବିଦ୍ୟାଳୟ ଯିବାକୁ ପିଲା ଆଗ୍ରହୀ ହେଉଛନ୍ତି। ଖାଲି ଯେ, ପିଲାମାନେ ଏହାକୁ ଅନୁକରଣ କରୁଛନ୍ତି ତା’ନୁହେଁ, ଏକ ମାଙ୍କଡ଼ ମଧ୍ୟ ପ୍ରତିଦିନ ବିଦ୍ୟାଳୟ ଯାଉଛି ପାଠ ପଢ଼ିବାକୁ। ଆଶ୍ଚର୍ଯ୍ୟ ଲାଗୁଥିଲେ ମଧ୍ୟ ସତ। ଏମିତି ଏକ ଦୃଶ୍ୟ ଦେଖିବାକୁ ମିଳିଛି, ଆନ୍ଧ୍ରପ୍ରଦେଶର ଏକ ବିଦ୍ୟାଳୟରେ। ଆନ୍ଧ୍ରର ପିପୁଲ ବ୍ଲକ ବେଙ୍ଗଲମପଲ୍ଲୀ ଗଁାରେ ଥିବା ଏକ ବିଦ୍ୟାଳୟକୁ ଗୋଟିଏ ମାଙ୍କଡ଼ ପାଠ ପଢ଼ିବାକୁ ଆସୁଛି। ପିଲାମାନେ ଯେତେବେଳେ ବହିବସ୍ତାନୀ ଧରି ଶ୍ରେଣୀ ଗୃହକୁ ପ୍ରବେଶ କରିଥା’ନ୍ତି ମାଙ୍କଡ଼ଟି ସେମାନଙ୍କ ସହିତ ଯାଇ ଶ୍ରେଣୀରେ ବସିପଡୁଛି।
ଖାଲି ଏତିକି ନୁହେଁ, ଶିକ୍ଷକ ପଢ଼ାଉଥିବାବେଳେ ଧ୍ୟାନର ସହିତ ସେ ବସି ଶୁଣୁଛି। ପ୍ରଥମେ ଯେଉଁଦିନ ମାଙ୍କଡ଼ଟି ଶ୍ରେଣୀଗୃହରେ ପ୍ରବେଶ କଲା, ଶିକ୍ଷକଙ୍କ ସମେତ ପିଲାମାନେ ମଧ୍ୟ ଭୟଭୀତ ହୋଇ କବାଟ ଝରକା ବନ୍ଦ କରିଦେଲେ। କିନ୍ତୁ ଝରକା ନିକଟରେ ବସି ସେ ପାଠ ଶୁଣୁଥାଏ। ଏହାପରଠାରୁ ପ୍ରତିଦିନ ମାଙ୍କଡ଼ଟି ପିଲାଙ୍କ ବିଦ୍ୟାଳୟ ଆସିବା ସମୟରେ ଶ୍ରେଣୀଗୃହକୁ ଆସି ଧୀରସ୍ଥିର ହୋଇବସିଲା। ମାଙ୍କଡ଼ଟି କିଛି କ୍ଷତି କରୁ ନ ଥିବା ଦେଖି ଶିକ୍ଷକ ଏବଂ ପିଲାମାନେ ମଧ୍ୟ ତାକୁ ଆଉ ଘଉଡ଼ାଇଲେ ନାହିଁ। ଶିକ୍ଷକ ମାଙ୍କଡ଼ର ନାଁ ଲକ୍ଷ୍ମୀ ଦେଇଛନ୍ତି। ଉପସ୍ଥାନ ଡାକିବା ସମୟରେ ପିଲାଙ୍କ ପରି ମଧ୍ୟ ସେ ଠିଆ ହୋଇପଡ଼ୁଛି। ଏହା ବ୍ୟତୀତ ପ୍ରାର୍ଥନା କରିବା, ଖେଳିବା, ପିଲାଙ୍କ ସହ ମିଶି ମଧ୍ୟାହ୍ନଭୋଜନ କରୁଛି । ଶିକ୍ଷକ କୁହନ୍ତି, ଲକ୍ଷ୍ମୀ ବିଦ୍ୟାଳୟକୁ ଆସିବା ଦିନୁ ପିଲାଙ୍କ ଉପସ୍ଥାନ ମଧ୍ୟ ବଢ଼ିଯାଇଛି। ଲକ୍ଷ୍ମୀର ପାଠ ପଢ଼ିବା ଆଗ୍ରହ ଦେଖି ଶିକ୍ଷକ ଖୁସି ବ୍ୟକ୍ତ କରିଛନ୍ତି।
