ଭୁବନେଶ୍ୱର,(ବ୍ୟୁରୋ)/ ପୁରୁଣା ଭୁବନେଶ୍ୱର,୨୧ା୧୦(ଡି.ଏନ୍.ଏ.) : ଧଉଳି ଥାନା ଅନ୍ତର୍ଗତ ଲିଙ୍ଗିପୁର ବିଜୟବିହାରସ୍ଥିତ ଏକ ଭଡ଼ାଘରୁ ଜଣେ ମହିଳା ଆଇନଜୀବୀଙ୍କ ଝୁଲନ୍ତା ମୃତଦେହକୁ ପୋଲିସ ରବିବାର ଉଦ୍ଧାର କରିଛି। ସେ ହେଲେ ଭଦ୍ରକ ମେରାଇନ ଥାନା ଚୂଡାମଣି ଗଁାର ଦୀପାଳି ପ୍ରିୟଦର୍ଶିନୀ ଜେନା(୨୯)। ପୋଲିସ ମୃତଦେହକୁ ବ୍ୟବଚ୍ଛେଦ ନିମନ୍ତେ କ୍ୟାପିଟାଲ ହସ୍ପିଟାଲ ପଠାଇବା ସହ ଏକ ଅପମୃତ୍ୟୁ ମାମଲା (ନଂ.୧୬/୧୯) ରୁଜୁ କରି ତଦନ୍ତ ଆରମ୍ଭ କରିଛି। ପାରିପାର୍ଶ୍ୱିକ ସ୍ଥିତିରୁ ଏହା ଆତ୍ମହତ୍ୟା ବୋଲି ପୋଲିସ ସନ୍ଦେହ କରୁଛି। ହେଲେ ତାଙ୍କ ସହ ଥିବା ପୁରୁଷ ବନ୍ଧୁ ଫେରାର ହେବା ଓ ଦୀପାଳି ଅବିବାହିତ ଥିବାବେଳେ ହାତରେ ଶଙ୍ଖା ଓ ମଥାରେ ସିନ୍ଦୂର ରହିଥିବାରୁ ଘଟଣାକୁ ରହସ୍ୟାବୃତ୍ତ କରିଦେଇଛି। ଅନ୍ୟପକ୍ଷରେ ପୁରୁଷ ବନ୍ଧୁ ବା ପ୍ରେମିକ ହିଁ ତାଙ୍କୁ ହତ୍ୟା କରିଥାଇପାରନ୍ତି ବୋଲି ପରିବାର ଲୋକେ ସନ୍ଦେହ କରୁଛନ୍ତି।
ପୋଲିସ ସୂଚନାନୁଯାୟୀ, ଦୀପାଳି ଲିଙ୍ଗିପୁର ବିଜୟବିହାରସ୍ଥିତ ପ୍ଲଟ୍ ନଂ.ସି/୩/୨ରେ ଥିବା ଘରକୁ ଭଡ଼ା ନେଇ ମା’ ଓ ସାନଭଉଣୀଙ୍କ ସହ ରହୁଥିଲେ। ସେ ଭୁବନେଶ୍ୱର ବାରର ସଦସ୍ୟ ହୋଇ ନ ଥିଲେ ମଧ୍ୟ ନିୟମିତ କୋର୍ଟକୁ ଆସି ପ୍ରାକ୍ଟିସ୍ କରୁଥିଲେ। ତେବେ ଦୀପାଳି ଭଦ୍ରକରେ ଥିବାବେଳେ ବାଲେଶ୍ୱର ସିମୁଳିଆର ବ୍ୟବସାୟୀ ବିକ୍ରମ କେଶରୀ ମିଶ୍ରଙ୍କ ସହ ତାଙ୍କର ପରିଚୟ ହୋଇଥିଲା। ପରେ ଉଭୟଙ୍କ ମଧ୍ୟରେ ପ୍ରେମସମ୍ପର୍କ ଗଢି ଉଠିଥିଲା। ମଝିରେ ମଝିରେ ବିକ୍ରମ ଦୀପାଳି ରହୁଥିବା ଲିଙ୍ଗିପୁରସ୍ଥିତ ଭଡାଘରକୁ ଆସୁଥିଲେ। ଉଭୟ ପରିବାର ସେମାନଙ୍କ ପ୍ରେମସମ୍ପର୍କ ବିଷୟରେ ଜାଣିବା ପରେ ବିବାହ ପାଇଁ କଥାବାର୍ତ୍ତା ହୋଇଥିଲେ। ନିକଟରେ ଉଭୟଙ୍କ ବିବାହ ହୋଇଥାନ୍ତା। ସେଥିପାଇଁ ଦୀପାଳିଙ୍କ ମା’ ଗାଁକୁ ଯାଇଥିଲେ ଓ ଘରେ ତାଙ୍କ ସହ ସାନଭଉଣୀ ଥିଲେ। ଶନିବାର ଅପରାହ୍ନ ୫ଟାରେ ପ୍ରେମିକ ବିକ୍ରମ ହଠାତ୍ ପହଞ୍ଚତ୍ବାରୁ ସାନଭଉଣୀ ତା’ର ସାଙ୍ଗଙ୍କ ସହ ପଳାଇ ଯାଇଥିଲେ। ରାତି ପ୍ରାୟ ୧୨ଟା ୩୦ରେ ବିକ୍ରମ ସାନଭଉଣୀଙ୍କୁ ଫୋନ୍ କରି ଦୀପାଳି ଘର ଭିତରପଟୁ କବାଟ ବନ୍ଦ କରି ଦେଇଥିବା କହିଥିଲେ। ତୁରନ୍ତ ସେ ଘରେ ପହଞ୍ଚତ୍ବା ବେଳକୁ ବିକ୍ରମ ନ ଥିଲେ। ତେବେ ଭିତରପଟୁ ବନ୍ଦ ଥିବା କବାଟ ବାଡେଇଥିଲେ ମଧ୍ୟ ନ ଖୋଲିବାରୁ ପଡୋଶୀ ଓ ଥାନାକୁ ଜଣାଇଥିଲେ। ପୋଲିସ ପହଞ୍ଚତ୍ବା ପରେ କବାଟକୁ ତଡ଼ାଯାଇଥିଲା। ଦୀପାଳି ବେକରେ କପଡ଼ା ବାନ୍ଧି ଫ୍ୟାନ୍ରେ ଝୁଲୁଥିବା ଦେଖିବାକୁ ମିଳିଥିଲା। ତାଙ୍କ ନାକ ଓ ପାଟିରୁ ରକ୍ତ ବାହାରୁଥିଲ। ପୋଲିସ ମୃତଦେହ ଜବତ କରି ଖୋଳତାଡ଼ ଆରମ୍ଭ କରିଥିଲା।
ଅପରାହ୍ନ ୫ରୁ ରାତି ୧୨ ମଧ୍ୟରେ ଏମିତି କ’ଣ ଘଟିଲା ଯେ ଦୀପାଳି ଆତ୍ମହତ୍ୟା କଲେ। ପ୍ରେମିକ ବିକ୍ରମ ଧରାପଡିଲେ ଘଟଣାର ପ୍ରକୃତ କାରଣ ଜଣାପଡିବ। ଅନ୍ୟପକ୍ଷରେ ବାହାଘର ପୂର୍ବରୁ ଦୀପାଳି କାହିଁକି ସିନ୍ଦୂର ଓ ଶଙ୍ଖା ପିନ୍ଧିଥିଲେ ତାହାକୁ ନେଇ ମଧ୍ୟ ପୋଲିସ ତଦନ୍ତକୁ ଆଗକୁ ବଢ଼ାଇଛି। କିନ୍ତୁ ଦୀପାଳିଙ୍କ ମୃତ୍ୟୁ ଘଟଣାକୁ ପରିବାର ଲୋକେ ସହଜରେ ବିଶ୍ୱାସ କରିପାରୁ ନାହାନ୍ତି। ଭାଇ ବିଶ୍ୱରଞ୍ଜନ ଜେନା କହିଛନ୍ତି, ଭଉଣୀ ଆତ୍ମହତ୍ୟା କରିଥିବେ ବୋଲି ବିଶ୍ୱାସ ହେଉନି। ଠିକ୍ ତଦନ୍ତ କରାଯାଇ ସତ୍ୟାସତ୍ୟ ବାହାର କରାଯାଉ। ଭୁବନେଶ୍ୱର ବାର୍ ଆସୋସିଏଶନ ସମ୍ପାଦକ ବିଶ୍ୱ ନାରାୟଣ ମହାନ୍ତି କହିଛନ୍ତି, ପୋଲିସ ଗୁରୁତ୍ୱର ସହ ଉପଯୁକ୍ତ ତଦନ୍ତ କରୁ। ଯଦି ଦୀପାଳି ଆତ୍ମହତ୍ୟା କରିଛନ୍ତି ବୋଲି ପୋଲିସ କହୁଛି ତାହାର କାରଣ ବି ପଦାକୁ ଆସୁ। ଧଉଳି ଥାନାଧିକାରୀ ଜୟଦେବ ବିଶ୍ୱଜିତ୍ କହିଛନ୍ତି, ଉଭୟଙ୍କ ଫୋନ୍ କଲକୁ ଯାଞ୍ଚ କରାଯାଉଛି। ଫେରାର ଥିବା ପୁରୁଷ ବନ୍ଧୁଙ୍କୁ ଧରିବାକୁ ଉଦ୍ୟମ ଚାଲିଛି। ଶୀଘ୍ର ଘଟଣାର ପର୍ଦ୍ଦାଫାଶ ହେବ ବୋଲି ସେ କହିଛନ୍ତି।
