କୋଲକାତା, ୨୭।୬: ପଶ୍ଚିମବଙ୍ଗରେ ଭାଜପାକୁ ମାତ୍ ଦେବା ପାଇଁ ମମତା ବିପକ୍ଷ ଦଳର ସହଯୋଗ ଲୋଡିଛନ୍ତି। କିନ୍ତୁ କଂଗ୍ରେସ ଏବଂ ସିପିଏମ୍ ଏଥିରେ ମମତାଙ୍କୁ ସହଯୋଗ କରିବେ ନାହିଁ ବୋଲି ସ୍ପଷ୍ଟ କରିଛନ୍ତି। ପଶ୍ଚିମବଙ୍ଗ ବିଧାନସଭାରେ ରାଜ୍ୟପାଳ କେଶରୀ ନାଥ ତ୍ରିପାଠୀଙ୍କ ଅଭିଭାଷଣ ଉପରେ ଚର୍ଚ୍ଚାବେଳେ ମମତା ଭାଜପାକୁ ରାଜ୍ୟରୁ ହଟାଇବା ପାଇଁ କଂଗ୍ରେସ, ସିପିଏମ୍ ଆଗେଇ ଆସିବା ଉଚିତ ବୋଲି କହିଥିଲେ। ପରେ କଂଗ୍ରେସ ନେତା ଅବଦୁଲ୍ ମନାନ ପ୍ରତିକ୍ରିୟା ଦେଇ କହିଥିଲେ, ଭାଜପାକୁ ରାଜ୍ୟରୁ କେମିତି ହଟାଯିବ ତାହା ମମତାଙ୍କଠାରୁ ଶିଖିବା କୌଣସି ଆବଶ୍ୟକତା ନାହିଁ। ତାଙ୍କ ନୀତି ଯୋଗୁ ଭାଜପା ପଶ୍ଚିମବଙ୍ଗରେ ମଜଭୁତ ହୋଇଛି ବୋଲି ସେ କହିଛନ୍ତି। ସେହିପରି ସିପିଏମ୍ ବିଧାୟକ ସୁଜନ ଚକ୍ରବର୍ତ୍ତୀ ମଧ୍ୟ ଅନୁରୂପ ମନ୍ତବ୍ୟ ଦେଇ କହିଛନ୍ତି, ମମତାଙ୍କୁ ସିପିଏମ୍ କେବେ ସହଯୋଗ କରିବ ନାହିଁ। ସେପଟେ ମମତା ଏଭଳି ଅପିଲ୍ କରିବା ତାଙ୍କ ଭିତରେ ଥିବା ଭୟକୁ ଦର୍ଶାଉଛି ବୋଲି ରାଜ୍ୟ ଭାଜପା ଅଧ୍ୟକ୍ଷ ଦିଲ୍ଲୀପ ଘୋଷ କହିଛନ୍ତି।
