ମନମୁଣ୍ଡା, ୧୪।୭ (ଡି.ଏନ.ଏ)- ମନମୁଣ୍ଡା ସହର ଦେଇ ଯାଇଥିବା ଏନଏଚ ୫୭ ଅଣ ଓସାରିଆ ହେତୁ ଟ୍ରାଫିକ ସମସ୍ୟା ଦିନକୁ ଦିନ ଉତ୍କଟ ରୂପ ନେଉଛି । ପୋଲିସ ରୀତିମତ ଡ୍ୟୁଟି କରୁଥିବା ସତ୍ତ୍ବେ ଯାନବାହନ ଯାଆସ କରିବାକୁ ଘଣ୍ଟା ଘଣ୍ଟା ସମୟ ଲାଗୁଛି । ଏପରିକି ଜରୁରୀକାଳୀନ ଗାଡି ଆମ୍ବୁଲାନ୍ସ, ଦମକଳ ଗାଡି ମଧ୍ୟ ଦୀର୍ଘ ସମୟ ପର୍ଯ୍ୟନ୍ତ ଅଟକି ରହୁଛି । ସ୍କୁଲ ଗାଡି ଟ୍ରାଫିକରେ ଫସି ରହିବା ହେତୁ ଠିକ ସମୟରେ ଛାତ୍ରୀଛାତ୍ର ବିଦ୍ୟାଳୟରେ ପହଞ୍ଚତ୍ପାରୁ ନାହାନ୍ତି । ସଙ୍କୀର୍ଣ୍ଣ ରାସ୍ତା ହେତୁ ଲୋକମାନେ ସାଇକେଲ, ବାଇକ ରଖି ବଜାର କରିପାରୁ ନ ଥିବା ବେଳେ ବ୍ୟବସାୟୀମାନେ କ୍ଷତିଗ୍ରସ୍ତ ହେଉଛନ୍ତି । ଦୀର୍ଘ ସମୟ ଯାନବାହନ ଅଟକି ରହୁଥିବାରୁ ଗାଡି ଧୂଆଁରେ ପରିବେଶ ଦୂଷିତ ହେଉଛି । ଏହି ରାସ୍ତା ଦେଇ ପଶ୍ଚିମ ଓଡିଶାର ପ୍ରାୟ ଅଧିକାଂଶ ନେତା, ମନ୍ତ୍ରୀ, ଜିଲାପାଳ, ଏସପି ଯାତାୟତ କରୁଥିବା ବେଳେ ସେମାନେ ମଧ୍ୟ ଅସୁବିଧାର ସମ୍ମୁଖୀନ ହେଉଥିବା ଦେଖିବାକୁ ମିଳିଛି । ଏହାକୁ ଦୃଷ୍ଟିରେ ରଖି ବାଇପାସ ରାସ୍ତା ନିର୍ମାଣ କରାଯାଉଛି । କିନ୍ତୁ କାମ ସରିବା ଅବଧିରୁ ଏକ ବର୍ଷରୁ ଊର୍ଦ୍ଧ୍ୱ ସମୟ ବିତିଯାଇଥିବା ବେଳେ କାମ ଅଧାପନ୍ତରିଆ ଭାବେ ପଡି ରହିଛି । ପ୍ରଶାସନିକ ଅବହେଳା ହେତୁ ଜମି ଅଧିଗ୍ରହଣ ଅଦ୍ୟାବଧି ସମ୍ପୂର୍ଣ୍ଣ ହୋଇ ପାରିନାହିଁ। ଗାନ୍ଧୀଛକଠାରେ ଘର ଭଙ୍ଗା ଯାଇଥିବା ବେଳେ ଭଙ୍ଗା ଇଟା, ଲୁହା ଛଡ ପଡି ରହିଛି। ତା ପାଖରେ ଥିବା ବସ୍ତିବାସିନ୍ଦା ଯିବାକୁ ରାସ୍ତା ନ ପାଇ ଅସୁବିଧା ଭୋଗ କରୁଛନ୍ତି। ବାଇପାସ ନିର୍ମାଣ ବିଳମ୍ବକୁ ନେଇ ମନମୁଣ୍ଡାବାସୀ କିଛି ମାସ ତଳେ ବନ୍ଦ ପାଳନ କରିଥିଲେ । କଣ୍ଟାମାଳ ବିଧାୟକ ମହୀଧର ରଣାଙ୍କ ମଧ୍ୟସ୍ଥତାରେ କାମ ତୁରନ୍ତ ହେବାର ପ୍ରତିଶ୍ରୁତି ମିଳିବା ପରେ ଆନ୍ଦୋଳନ ହଟିଥିଲା । ବର୍ତ୍ତମାନ ଉକ୍ତ କାମ ପୂର୍ବଂ ତଥା ପରଂ ହୋଇ ପଡିରହିଛି । ଫଳରେ ଟ୍ରାଫିକ ସମସ୍ୟାରେ ଜନସାଧାରଣ ଛନ୍ଦି ହୋଇପଡିଛନ୍ତି । ତୁରନ୍ତ ବାଇପାସ ନିର୍ମାଣ ସମ୍ପୂର୍ଣ୍ଣ କରିବାକୁ ଦାବି ହୋଇଛି ।
