ନୟାଗଡ଼ ଅଫିସ,୧୬ା୯: ରାଜ୍ୟରେ ବିଭିନ୍ନ ସମୟରେ ମଧ୍ୟାହ୍ନଭୋଜନରେ ଛାତ୍ରୀଛାତ୍ରଙ୍କୁ ଭାତ ସହିତ ପାଣିଆ ଡାଲି ଦିଆଯାଉଥିବା ଅଭିଯୋଗ ହୋଇଥାଏ। ପିଲାଙ୍କୁ ଯେପରି ସୁଷମ ଓ ପୁଷ୍ଟିକର ଖାଦ୍ୟ ଦିଆଯିବ ସେ ଲକ୍ଷ୍ୟ ନେଇ ରାଜ୍ୟ ସରକାର ବିଦ୍ୟାଳୟରେ କିଚେନ ଗାର୍ଡେନ (ନ୍ୟୁଟ୍ରିଶନ୍ ଗାର୍ଡ଼େନ) ବ୍ୟବସ୍ଥା କରିବାକୁ ନିର୍ଦ୍ଦେଶ ଦେଇଥିଲେ। ନୟାଗଡ଼ ଜିଲାରେ ୨୨୮ ବିଦ୍ୟାଳୟରେ ଏହି ବ୍ୟବସ୍ଥା କାର୍ଯ୍ୟକାରୀ ହେବ ବୋଲି ଚିହ୍ନଟ କରାଯାଇଛି। ତନ୍ମଧ୍ୟରୁ ୧୮୫ ବିଦ୍ୟାଳୟରେ ଏହା କାର୍ଯ୍ୟକ୍ଷମ ହେଉଛି। ଅବଶିଷ୍ଟ ୪୩ ବିଦ୍ୟାଳୟ କୌଣସି ରିପୋର୍ଟ ଦେଇ ନ ଥିବା ଜିଲା ଶିକ୍ଷା କାର୍ଯ୍ୟାଳୟ ପକ୍ଷରୁ ସୂଚନା ମିଳିଛି। ଏହି ବ୍ୟବସ୍ଥା ଅନୁଯାୟୀ ବିଦ୍ୟାଳୟ ପରିସରରେ ଥିବା ଖାଲି ଜାଗାରେ ପିଲାମାନେ ଅମୃତଭଣ୍ଡା, କଦଳୀ, ଲେମ୍ବୁ, ବାଇଗଣ ଆଦି ପନିପରିବା ଗଛ ଲଗାଇ ଏଥିରୁ ଉତ୍ପାଦିତ ପରିବା ମଧ୍ୟାହ୍ନଭୋଜନ ରୋଷେଇରେ ବ୍ୟବହାର କରିବେ।
୨୬ ନଭେମ୍ବର ୨୦୧୮ରେ ବିଦ୍ୟାଳୟ ଓ ଗଣଶିକ୍ଷା ବିଭାଗ ପକ୍ଷରୁ ସମସ୍ତ ଜିଲାପାଳଙ୍କୁ ନିଜ ଜିଲାରେ ଥିବା ବିଭିନ୍ନ ବିଦ୍ୟାଳୟରେ କିଚେନ ଗାର୍ଡ଼େନ ତିଆରି କରାଇବା ପାଇଁ ନିର୍ଦ୍ଦେଶ ଦିଆଯାଇଥିଲା। ସେଥିରେ ଦର୍ଶାଯାଇଥିଲା ଯେ ବିଦ୍ୟାଳୟରେ ପ୍ରସ୍ତୁତ କରାଯାଉଥିବା ମଧ୍ୟାହ୍ନଭୋଜନରେ ପନିପରିବା ଆବଶ୍ୟକ ରହିଥିବା ବେଳେ ଏହା ଖାଦ୍ୟକୁ ପୋଷଣରେ ଭରି ଦେଇଥାଏ। ଯେଉଁ ବିଦ୍ୟାଳୟରେ ପାଚେରୀ ବ୍ୟବସ୍ଥା ସହ ଖାଲି ଜାଗା ଓ ପାନୀୟ ଜଳ ବ୍ୟବସ୍ଥା ଥିବ ସେଠାରେ କିଚେନ ଗାର୍ଡ଼େନ କରାଯିବା ପାଇଁ କୁହାଯାଇଥିଲା। ନୟାଗଡ଼ ଜିଲାରେ ମୋଟ ୧୧୬୦ ବିଦ୍ୟାଳୟରେ ମଧ୍ୟାହ୍ନ ଭୋଜନ କାର୍ଯ୍ୟକ୍ଷମ ହେଉଥିବା ବେଳେ ୨୨୮ଟି ସ୍କୁଲରେ ମଧ୍ୟାହ୍ନ ଭୋଜନ ଲାଗି ନ୍ୟୁଟ୍ରିଶନ୍ ଗାର୍ଡ଼େନ ପାଇଁ ଚିହ୍ନଟ କରାଯାଇଥିଲା। ଗଣିଆ ବ୍ଲକରେ ୧୭, ଦଶପଲ୍ଲାରେ ୨୨, ଭାପୁରରେ ୧୪, ଖଣ୍ଡପଡ଼ାରେ ୨୪, ନୟାଗଡ଼ରେ ୪୦, ନୂଆଗାଁରେ ୨୫, ଓଡ଼ଗାଁରେ ୪୨ ଓ ରଣପୁରରେ ୪୪ ବିଦ୍ୟାଳୟକୁ ଚିହ୍ନଟ କରାଯାଇଥିଲା। ଦଶପଲ୍ଲା ବ୍ଲକର ୫, ଭାପୁରର ୫, ନୟାଗଡ଼ର ୧୯, ନୂଆଗାଁର ୧୧ ଓ ରଣପୁରର ୩ ଏହିଭଳି ୪୩ ବିଦ୍ୟାଳୟ ଏ ନେଇ ରିପୋର୍ଟ ଦାଖଲ କରିନାହାନ୍ତି। ନ୍ୟୁଟ୍ରିଶନ୍ ଗାର୍ଡ଼େନ ବ୍ୟବସ୍ଥା ଦ୍ୱାରା ପିଲାମାନେ ନିଜେ ପନିପରିବା ଗଛକୁ ବଢ଼ାଇ ଏହାରି ଫଳକୁ ମଧ୍ୟାହ୍ନ ଭୋଜନରେ ରୋଷେଇ କରି ଖାଉଛନ୍ତି। ବିଦ୍ୟାଳୟ ପରିସରରେ ଥିବା ଖାଲି ଜାଗାରେ ବିଭିନ୍ନ ପନିପରିବା ଗଛ ଲଗାଇ ଏଥିରେ ଛାତ୍ରୀଛାତ୍ର ଓ ଶିକ୍ଷୟିତ୍ରୀଶିକ୍ଷକ ପ୍ରତିଦିନ ଖେଳ ପିରିୟଡ଼ରେ ପାଣି ଦେଉଥିବା ଦେଖିବାକୁ ମିଳୁଛି। ଜିଲାରେ ଏଭଳି କାର୍ଯ୍ୟକ୍ରମକୁ ବିଭିନ୍ନ ମହଲରେ ପ୍ରଶଂସା କରାଯାଉଛି।
