ବାରିପଦା ଅଫିସ,୧୯ା୧୦- ବାରିପଦା ଟାଉନ ଥାନା ପୋଲିସ ଗୁରୁବାର ରାତିରେ ମଞ୍ଚାବନ୍ଧା ଜଙ୍ଗଲରେ ଚଢ଼ାଉ କରି ୪ ଜୁଆଡିଙ୍କୁ ଗିରଫ କରିଛି। ତେବେ ପୋଲିସର ଅବହେଳା କାରଣରୁ ୮ ରୁ ଊଦ୍ଧ୍ୱର୍ର୍ ଜୁଆଡି ଲକ୍ଷାଧିକ ଟଙ୍କା ଓ ଜୁଆଖେଳ ସାମଗ୍ରୀ ନେଇ ଫେରାର ହେବାରେ ସକ୍ଷମ ହୋଇଛନ୍ତି।
ସୂଚନା ଅନୁଯାୟୀ, ବାରିପଦା ସହର ପାଲବଣୀ ବାଇପାସ୍ ତଥା ଜାତୀୟ ରାଜପଥକୁ ଲାଗିରହିଥିବା ମଞ୍ଚାବନ୍ଧା ଜଙ୍ଗଲରେ ଏକ ବଡ଼ ଧରଣର ଜୁଆ ଖେଳ ଚାଲିଥିବା ନେଇ ପୋଲିସକୁ ସୂଚନା ମିଳିଥିଲା। ପରେ ପୋଲିସର ଏକ ଟିମ୍ ସେଠାରେ ଚଢ଼ାଉ କରିଥିଲା। ଚଢ଼ାଉ ବେଳେ ତକତପୁର ଅଞ୍ଚଳର ଗୋବିନ୍ଦ ପାଲ, ଝିିରି ବନ୍ଧ ଅଞ୍ଚଳର ପାଗଲୁ ଖମାରୀ, ଚିପଟ ଅସ୍ତିଆ ଅଞ୍ଚଳର ସେଖ ଇଲତାଫ ଓ କାଳିକାପୁର ଅଞ୍ଚଳର କୌଶିିକ ବେହେରାଙ୍କୁ ଧରିବାରେ ସକ୍ଷମ ହୋଇଥିଲା। ସେଠାରୁ ୨୨ ହଜାର ୯ଶହ ଟଙ୍କା, ୭ଟି ମୋଟରସାଇକେଲ ମଧ୍ୟ ପୋଲିସ ଜବତ କରିଛି। ଘଟଣାସ୍ଥଳରୁ ୮ରୁ ଊର୍ଦ୍ଧ୍ୱ ଜୁଆଡ଼ିି ଫେରାର ହୋଇଯାଇଥିଲେ ମଧ୍ୟ ପୋଲିସ ପକ୍ଷରୁ କେବଳ ୩ଜୁଆଡ଼ି ଖସି ଯାଇଥିବା ସୂଚନା ଦିଆଯାଇଛି। ଉଲ୍ଲେଖଯୋଗ୍ୟ ଯେ, ଏଠାରେ ଲକ୍ଷ ଲକ୍ଷ ଟଙ୍କାର ଜୁଆ ଖେଳ ସହିତ ଅସାମାଜିକ କାର୍ଯ୍ୟକଳାପ ପ୍ରତିଦିନ ଚାଲୁଥିବା ବେଳେ ପୋଲିସ ବିଳମ୍ବରେ ଖବର ପାଇ ଚଢ଼ାଉ କରିଥିଲା। ଏଥିନେଇ ବାରିପଦା ଟାଉନ ଥାନାରେ ଏକ ମାମଲା (ନଂ.୨୯୫/୧୯) ରୁଜୁ ହୋଇଛି।