ଖୋର୍ଦ୍ଧା ଅଫିସ, ୧୪।୩: ଖୋର୍ଦ୍ଧା ଜିଲା ସଦର ମହକୁମାରେ ଗତ ୨୦୧୯ ଏପ୍ରିଲ ୧୪ରେ ଭାଜପା ନେତା ମଙ୍ଗୁଳି ଜେନାଙ୍କୁ ଅତି ନିର୍ମମ ଭାବେ ହତ୍ୟା କରାଯାଇଥିଲା। ତେବେ ଏହି ଘଟଣା ଆଜକୁ ୧୧ ମାସ ବିତି ଯାଇଥିଲେ ମଧ୍ୟ ପୋଲିସ ପ୍ରଶାସନ ନୀରବଦ୍ରଷ୍ଟା ସାଜିଛି। ତଦନ୍ତ ଚାଲିଛି କହି ଫାଇଲରେ ଡୋରି ବାନ୍ଧି ଦେଇ ଚୁପ୍ ହୋଇ ବସିପଡିଛି। ଏ ନେଇ ଜେନାଙ୍କ ପରିବାର ଲୋକଙ୍କୁ ନ୍ୟାୟ ମିଳିବାର ତ ଦୂରର କଥା ତାଙ୍କୁ ମାନସିକ ନିର୍ଯାତନା ଆଘାତ ଦେଇଛି। ତେବେ ତାଙ୍କ ପରିବାର ଲୋକେ ଓ ସମର୍ଥକମାନେ ମିଶି ଗଣ ଆନ୍ଦୋଳନକୁ ଓହ୍ଲେଇବେ ବୋଲି ଚେତାବନୀ ଦେଇସାରିଲେଣି। ପ୍ରଥମ ପର୍ଯ୍ୟାୟରେ ସେମାନେ ଜିଲାପାଳ କାର୍ଯ୍ୟାଳୟ ସମ୍ମୁଖରେ ୩ ଦିନ ହେଲା ନ୍ୟାୟ ଦାବିରେ ଆନ୍ଦୋଳନ ଜାରି ରଖିଛନ୍ତି। ଗ୍ରୀଷ୍ମର ପ୍ରକୋପରେ ଜାତୀୟ ରାଜପଥ କଡରେ ପ୍ରତିଦିନ ସକାଳୁ ସନ୍ଧ୍ୟା ଯାଏ ପଡି ରହିଛନ୍ତି। ସେହି ରାସ୍ତା ଦେଇ ଜିଲାର ପ୍ରମୁଖ ଅଧିକାରୀ, ପୋଲିସ ବିଭାଗ ଅଧିକାରୀମାନଙ୍କଠାରୁ ଆରମ୍ଭ କରି ବହୁ ନେତା ଓ ମନ୍ତ୍ରୀ ଯାତାୟାତ କରୁଛନ୍ତି। ହେଲେ ଆନ୍ଦୋଳନକାରୀଙ୍କୁ କେହି ଜଣେ ମଧ୍ୟ ଏଯାଏ ଭେଟି ନାହାନ୍ତି। ଅନ୍ୟପକ୍ଷରେ ମୃତକଙ୍କ ପରିବାର ଲୋକଙ୍କୁ ନ୍ୟାୟ ମିଳିବା ତ ଦୂରର କଥା ଏତେବଡ ଘଟଣାରେ ପୋଲିସ୍ କିଭଳି ନୀରବ ଦ୍ରଷ୍ଟା ସାଜୁଛି ତାହା ଅଞ୍ଚଳରେ ନାନା ପ୍ରଶ୍ନବାଚୀ ସୃଷ୍ଟି କରୁଛି।
ପ୍ରାପ୍ତ ସୂଚନା ଅନୁସାରେ, ଖୋର୍ଦ୍ଧା ସହରରେ ନବୀନବାଗଠାରେ ୨୦୧୯ ଏପ୍ରିଲ ୧୪ ରାତିରେ ଭାଜପାର ପ୍ରମୁଖ ନେତା ମଙ୍ଗୁଳିଙ୍କୁ ଗୁଳିକରି ହତ୍ୟା କରାଯାଇଥିଲା। ଏହାର ପ୍ରତିବାଦରେ ମଙ୍ଗୁଳିଙ୍କ ସମର୍ଥକମାନେ ଖୋର୍ଦ୍ଧା ଆଦର୍ଶ ଥାନା ସମ୍ମୁଖରେ ଧାରଣା ଦେଇଥିଲେ। ସେତେବେଳେ ପୋଲିସ ପ୍ରଶାସନ ପକ୍ଷରୁ ଜଡିତ ଥିବା ଅଭିଯୁକ୍ତମାନଙ୍କୁ ଶୀଘ୍ର ଗିରଫ କରାଯିବ ବୋଲି ପ୍ରତିଶ୍ରୁତି ଦିଆଯାଇଥିଲା। ପରେ ରାଜ୍ୟ ସରକାର ଏହାର ତଦନ୍ତ ଭାର କ୍ରାଇମ୍ବ୍ରାଞ୍ଚକୁ ଦେଇଥିଲେ। କ୍ରାଇମ୍ବ୍ରାଞ୍ଚ ପକ୍ଷରୁ ବିଭିନ୍ନ ସମୟରେ ବହୁ ବ୍ୟକ୍ତି ବିଶେଷଙ୍କ ନିକଟରୁ ବୟାନ ରେକର୍ଡ କରାଯାଇଥିଲା। ପରେ ଏହି ହତ୍ୟା ଘଟଣାକୁ ପ୍ରଭାବଶାଳୀ ବ୍ୟକ୍ତିଙ୍କ ଚାପରେ ପଡି ଚାପି ଦିଆଯାଇଛି ବୋଲି ବଡପୋଖରିଆ ଗ୍ରାମର ୯ ନଂ. ଜୋନର ଜିଲାପରିଷଦ ସଭ୍ୟା ମମତା ଜେନା, ଜୋତ୍ସ୍ନାରାଣୀ ଜେନା, ଛେତ ଜେନା, ଅନୁପମା ବଇରିଗଞ୍ଜନ, ଜମୁନା ଜେନା ଓ ସରୋଜିନୀ ଦଳସିଂହରାୟଙ୍କ ସହ ଗ୍ରାମର ଶତାଧିକ ଲୋକଙ୍କ ଦସ୍ତଖତ ଥାଇ ଏକ ଦାବିପତ୍ର ଖୋର୍ଦ୍ଧା ଏସ୍ପି ଓ ଜିଲାପାଳଙ୍କୁ ଦିଆଯାଇଛି।
