କୋଲକାତା,୩।୨: ଦିଲ୍ଲୀ ପୋଲିସ ଦ୍ୱାରା ଲଗାଯାଇଥିବା କଡ଼ା ସୁରକ୍ଷା ବଳୟ ସତ୍ତ୍ୱେ ମୁଖ୍ୟମନ୍ତ୍ରୀ ମମତା ବାନାର୍ଜୀ କୋଲକାତାରୁ ଦିଲ୍ଲୀକୁ ସ୍ବତନ୍ତ୍ର ବାହିନୀ ଡକାଇଛନ୍ତି। ବଙ୍ଗଳା ପୋଲିସର ଏକ ସ୍ବତନ୍ତ୍ର ଦଳ, ଜଣେ ଡିଏସ୍ପି-ର଼୍ୟାଙ୍କ ଅଧିକାରୀ ଏବଂ ୨୨ ଜଣିଆ ଆରଏଏଫ ଦଳ ସହିତ ଦିଲ୍ଲୀ ଅଭିମୁଖେ ଉଡ଼ାଣ ଭରୁଛନ୍ତି। ଏବେ ପ୍ରଶ୍ନ ଉଠୁଛି ମମତା ବାନାର୍ଜୀ ଏତେ ଭୟଭୀତ କାହିଁକି। ତାଙ୍କୁ ହଠାତ୍ ବଙ୍ଗ ଭବନରେ ସୁରକ୍ଷାକୁ ‘ବୁଲେଟ୍ଫୁପ୍’ କରିବାକୁ ପଡୁଛି।
ସୂତ୍ର ଅନୁସାରେ, ସମସ୍ତ ଟିଏମ୍ସି ଏମ୍ପିଙ୍କୁ ଆସନ୍ତାକାଲି ଅପରାହ୍ନ ୪ଟାରେ ୧୮୧ ଦକ୍ଷିଣ ଆଭେନ୍ୟୁରେ ମମତା ବାନାର୍ଜୀଙ୍କ ଦ୍ୱାରା ଆୟୋଜିତ ଏକ ହାଇ ଟି ପାର୍ଟିକୁ ନିମନ୍ତ୍ରଣ କରାଯାଇଛି। ଏହା ପୂର୍ବରୁ, ମମତା ବାନାର୍ଜୀ ଅପରାହ୍ନ ୩ଟାରେ ବଙ୍ଗ ଭବନରେ ଏସଆଇଆର ପୀଡିତଙ୍କ ସହିତ ଏକ ସାମ୍ବାଦିକ ସମ୍ମିଳନୀ କରିବେ।
ମମତା ବାନାର୍ଜୀ ଏବଂ ନିର୍ବାଚନ କମିଶନଙ୍କ ମଧ୍ୟରେ ଉତ୍ତେଜନା ରାଜଧାନୀ ଦିଲ୍ଲୀରେ ପହଞ୍ଚିଛି। ସୋମବାର ମମତା SIR ପ୍ରସଙ୍ଗରେ ମୁଖ୍ୟ ନିର୍ବାଚନ କମିଶନର (CEC) ଜ୍ଞାନେଶ କୁମାରଙ୍କ ସହ ଏକ ବୈଠକ ମଝିରୁ ଛାଡି ପଳାଇଥିଲେ। ମମତା କମିଶନର ଅଧିକାରୀମାନଙ୍କୁ ଅହଂକାରୀ ଏବଂ ତାଙ୍କ ପ୍ରତିନିଧିମଣ୍ଡଳକୁ ଅପମାନିତ କରୁଥିବା ଅଭିଯୋଗ କରିଥିଲେ।
ଦିଲ୍ଲୀରେ ବଙ୍ଗ ଭବନ ଏବଂ ଅନ୍ୟାନ୍ୟ ପଶ୍ଚିମବଙ୍ଗ ସରକାରୀ ଅତିଥି ଗୃହଗୁଡ଼ିକର ସୁରକ୍ଷା ବୃଦ୍ଧି କରିବା ପାଇଁ ନିଷ୍ପତ୍ତି ନିଆଯାଇଛି। ଏହି ମିଶନ ପାଇଁ ୨୦ ରୁ ୨୫ ଜଣିଆ ଏକ ସ୍ବତନ୍ତ୍ର ଦଳ ଆଜି ବିଳମ୍ବିତ ରାତିରେ ଦିଲ୍ଲୀ ଅଭିମୁଖେ ଯାତ୍ରା କରିବ।
ମମତା ବାନାର୍ଜୀ ନିର୍ବାଚନ କମିଶନ ବୈଠକ ବର୍ଜନ କରିବା ଏବଂ କମିଶନଙ୍କୁ ଭାଜପା ଏଜେଣ୍ଟ ବୋଲି କହିବା ପରେ ରାଜନୈତିକ ପରିବେଶ ବହୁତ ଉଷ୍ମ ହୋଇଯାଇଛି। ସୂତ୍ର ଅନୁସାରେ, ମମତା ସମ୍ଭାବ୍ୟ ପ୍ରତିବାଦ କିମ୍ବା କୌଣସି ଅପ୍ରୀତିକର ପରିସ୍ଥିତିକୁ ଏଡାଇବା ପାଇଁ ଦିଲ୍ଲୀରେ ତାଙ୍କ ସୁରକ୍ଷାକୁ ବିପଦରେ ପକାଇବାକୁ ଚାହାଁନ୍ତି ନାହିଁ। ଏହି କାରଣରୁ ସେ ଦିଲ୍ଲୀ ପୋଲିସ ଉପରେ ନିର୍ଭର କରିବା ପରିବର୍ତ୍ତେ ବଙ୍ଗଳାରୁ ତାଙ୍କର ବିଶ୍ୱସ୍ତ ବାହିନୀ ମୁତୟନ କରିବାକୁ ନିଷ୍ପତ୍ତି ନେଇଛନ୍ତି।
Dharitri – Odisha’s No.1 Odia Daily
