ଖୁଣ୍ଟା,୧୨ା୯(ଡି.ଏନ୍.ଏ.)- ମୟୂରଭଞ୍ଜ ଜିଲା ଖୁଣ୍ଟା ବ୍ଲକର ବଡଫେଣି ପଞ୍ଚାୟତ ଅଧୀନ ଛତ୍ରମା ଓ ବଡ଼ ସାତଶୋଲ ଗ୍ରାମ ମଧ୍ୟବର୍ତ୍ତୀ ଆରଡି ରାସ୍ତାର ଗଙ୍ଗାହାର ନଦୀ ଉପରେ ଥିବା ଏକ ପୁରୁଣା ପୋଲ ବୁଧବାର ପୂର୍ବାହ୍ନରେ ଭୁଶୁଡି ପଡିଛି। ଫଳରେ ପୋଲର ଅପର ପାଶ୍ୱର୍ର୍ରେ ଥିବା ୩ ପଞ୍ଚାୟତ ବାହ୍ୟ ଜଗତରୁ ବିଛିନ୍ନ ହୋଇପଡିଛି। ଖୁଣ୍ଟା-ବାରିପଦା ରାଜ୍ୟ ରାଜପଥର ସାହାଡାଗ କେନାଲ ଛକଠାରୁ କୁସୁମଘାଟି ପର୍ଯ୍ୟନ୍ତ ଲମ୍ବିଥିବା ପ୍ରଧାନମନ୍ତ୍ରୀ ସଡକକୁ ବଡ଼ଫେଣି, ବଡ଼ପଥରା ଓ ବାହାନଡା ପଞ୍ଚାୟତ ବାସିନ୍ଦାଙ୍କ ପାଇଁ ଲାଇଫ ଲାଇନ ବୋଲି କୁହାଯାଏ। ମାତ୍ର ଏହି ରାସ୍ତାରେ ଥିବା ପୁରୁଣା ପୋଲଟି ଭୁଶୁଡି ପଡିିବା ଯୋଗୁଁ ଯାତାୟାତ ସମ୍ପୂର୍ଣ୍ଣ ବନ୍ଦ ହୋଇଯାଇଛି। ବୁଧବାର ଛତ୍ରମା ଅଙ୍ଗନଓ୍ବାଡି କେନ୍ଦ୍ରରେ ଟୀକାକରଣ କାର୍ଯ୍ୟକ୍ରମ ଥିବାବେଳେ ଉକ୍ତ ପୋଲର ଅପର ପାର୍ଶ୍ୱରୁ ତାପସ କୁମାର ବେହେରା ନାମକ ଜଣେ ପୁରୁଷ ସ୍ବାସ୍ଥ୍ୟକର୍ମୀ ପୂର୍ବାହ୍ନ ୧୦ଟା ସମୟରେ ବାଇକ ଯୋଗେ ଏହି କାର୍ଯ୍ୟକ୍ରମକୁ ଯାଉଥିଲେ। ତେବେ ଉକ୍ତ ପୋଲଟି ପୂର୍ବରୁ ଭୁଶୁଡି ପଡ଼ିଥିଲେ ହେଁ ଅତ୍ୟଧିକ ବର୍ଷା ଓ ସେ ହେଲମେଟ ପିନ୍ଧିଥିବା ଯୋଗୁ ଜାଣି ନ ପାରି ନଦୀ ମଧ୍ୟକୁ ବାଇକ ସହିତ ଖସି ପଡ଼ିଥିଲେ। ସ୍ଥାନୀୟ ଲୋକେ ଦଉଡି ପକାଇ ବାଇକ ସହିତ ତାଙ୍କୁ ଉଦ୍ଧାର କରିଥିଲେ। ଏସମ୍ପର୍କରେ ବଡଫେଣି ପଞ୍ଚାୟତର ସରପଞ୍ଚ ଶ୍ରୀନିବାସ ନାଏକଙ୍କୁ ପଚାରିବାରୁ ଆରଡି ବିଭାଗ ସହିତ ଯୋଗାଯୋଗ କରିବା ପାଇଁ ଚେଷ୍ଟା କରି ବିଫଳ ହେବା ପରେ ସେ ବାରିପଦା ବିଧାୟକ ପ୍ରକାଶ ସୋରେନଙ୍କୁ ଜଣାଇଥିବା କହିଛନ୍ତି। ତେବେ ଲୋକଙ୍କ ଯାତାୟତ ପାଇଁ ବିଭାଗ ପକ୍ଷରୁ ଖୁବଶୀଘ୍ର ଅସ୍ଥାୟୀ ଭାବେ ବ୍ୟବସ୍ଥା କରାଯିବ ବୋଲି ବିଭାଗୀୟ ଅଧିକାରୀ ପ୍ରତିଶ୍ରୁତି ଦେଇଥିତ୍ବା ସରପଞ୍ଚ ନାଏକ ସୂଚନା ଦେଇଛନ୍ତି।