ନବରଙ୍ଗପୁର,୧୬।୧(ବି.ପ୍ର.)- ଭାରପ୍ରାପ୍ତ ପ୍ରଧାନଶିକ୍ଷକଙ୍କ ଭୁଲ ଲାଗି ଜଣେ ଛାତ୍ରୀ ପଠାଣି ସାମନ୍ତ ଗଣିତ ସ୍କଲାରଶିପ ଟେଷ୍ଟ- ୨୦୧୯ ପରୀକ୍ଷା ଦେବାରୁ ବଞ୍ଚିତ ହୋଇଛନ୍ତିି। ପୂର୍ବାହ୍ନ ୧୦ଟାରୁ ଗୋଟାଏ ପର୍ଯ୍ୟନ୍ତ ପରୀକ୍ଷା ସମୟ ରହିଥିବା ବେଳେ ବିଦ୍ୟାଳୟର ଶିକ୍ଷକ ସାଢେ ୧୦ଟାରେ ଛାତ୍ରୀଙ୍କୁ ଆଡମିଟ କାର୍ଡ ପ୍ରଦାନ କରିଛନ୍ତି। ପରୀକ୍ଷା କେନ୍ଦ୍ରକୁ ଯିବାର ସମୟ ସୀମା ଅତିକ୍ରମ ହୋଇଯିବାରୁ ଛାତ୍ରୀ ଜଣକ ପରୀକ୍ଷା ଦେଇ ପାରି ନ ଥିଲେ। ନବରଙ୍ଗପୁର ଜିଲା ଡାବୁଗାଁ ବ୍ଲକ ଚାଟିଗୁଡା ଗାଁର ଛାତ୍ରୀ ଭାରତୀ ଗୌଡଙ୍କ କ୍ଷେତ୍ରରେ ଏଭଳି ଘଟଣା ଘଟିଛି।
ଡାବୁଗାଁ ବ୍ଲକ ଚାଟିଗୁଡା ନୂତନ ପ୍ରାଥମିକ ବିଦ୍ୟାଳୟର ଛାତ୍ରୀ ଭାରତୀଙ୍କ ପଠାଣି ସାମନ୍ତ ଗଣିତ ସ୍କଲାରଶିପ ଟେଷ୍ଟ-୨୦୧୯ ପାଇଁ ଆଡମିଟ କାର୍ଡ ଆସିଥିଲା। ତେବେ ବିଦ୍ୟାଳୟ ପକ୍ଷରୁ ଆଡମିଟ କାର୍ଡ ଶିକ୍ଷକ ଦେଇ ନଥିଲେ। ବୁଧବାର ପୂର୍ବାହ୍ନ ୧୦ଟାରୁ ଗୋଟାଏ ପର୍ଯ୍ୟନ୍ତ ପରୀକ୍ଷା ସମୟ ରହିଥିିଲା। ବିଦ୍ୟାଳୟର ଭାରପ୍ରାପ୍ତ ପ୍ରଧାନ ଶିକ୍ଷକ ସୁରେନ୍ଦ୍ର ମେହେରା ପରୀକ୍ଷା ଅଛି କହି ଛାତ୍ରୀଙ୍କ ବାପା ଉଦ୍ଧବ ଗୌଡଙ୍କୁ ବୁଧବାର ପୂର୍ବାହ୍ନ ସାଢେ ୧୦ଟାରେ ଆଡମିଟ କାର୍ଡ ଦେଇଥିଲେ। ଆଡମିଟ କାର୍ଡ ନମ୍ବର ୧୯୧୧୩୯୩୦୫୩ ରହିଥିଲା। ପରୀକ୍ଷା କେନ୍ଦ୍ର ପାପଡାହାଣ୍ଡିସ୍ଥିତ ସରକାରୀ(ନୂଆ) ଏଲ.ବି. ହାଇସ୍କୁଲ ଥିଲା। ବିଦ୍ୟାଳୟରୁ ଆଡମିଟ କାର୍ଡ ଗ୍ରହଣ କରିବା ପରେ ଭାରତୀ ଓ ଉଦ୍ଧବ ସେଠାରୁ ତୁରନ୍ତ ବାହାରି ପରୀକ୍ଷା କେନ୍ଦ୍ରରେ ପୂର୍ବାହ୍ନ ୧୧ଟା ୪୦ରେ ପହଞ୍ଚିଥିଲେ। ତେବେ ପରୀକ୍ଷା ଆରମ୍ଭ ହୋଇଯାଇଥିବାରୁ ଭାରତୀଙ୍କୁ ପରୀକ୍ଷା କେନ୍ଦ୍ର ଭିତରକୁ ଯିବାକୁ ଦିଆ ଯାଇନ ଥିଲା। ଏନେଇ ଚାଟିଗୁଡା ଭାରପ୍ରାପ୍ତ ପ୍ରଧାନ ଶିକ୍ଷକ ସୁରେନ୍ଦ୍ରଙ୍କୁ ପଚାରିବାରୁ ସେ କହିଥିଲେ ଯେ, ପରୀକ୍ଷା ବୁଧବାର ପୂର୍ବାହ୍ନ ୧୦ଟାରେ ଥିଲା। ସେ ସାଢେ ୧୦ଟାରେ ଆଡମିଟ କାର୍ଡ ପ୍ରଦାନ କରିଛନ୍ତି। ଆଡମିଟ କାର୍ଡ ଦେବାରେ ବିଳମ୍ବ କରିଥିବା ସୁରେନ୍ଦ୍ର ସ୍ବୀକାର କରିଛନ୍ତି।
