ହାଇଦ୍ରାବାଦ: ପରିବେଶ ଅନୁଯାୟୀ ପରିବର୍ତ୍ତିତ ଗୁଣାବଳୀ କରୋନା ଭାଇରସ୍କୁ ସଂକ୍ରମଣ ଲାଗି ବଳ ଯୋଗାଉଛି। ଚାଇନାରୁ ଆରମ୍ଭ ହୋଇଥିବା ଏହି ଭୂତାଣୁ ଆମେରିକାରେ ଯେଉଁ ପ୍ରତିକ୍ରିୟା ଦେଖାଉଛି, ୟୁରୋପୀୟ ରାଷ୍ଟ୍ରରେ ଏହା ଭିନ୍ନ। ସେହିପରି ଭାରତରେ ମଧ୍ୟ ଭୂତାଣ ଗୁଣରେ ବିବିଧତା ଦେଖିବାକୁ ମିଳିଛି। ତାମିଲନାଡୁ ଏବଂ ତେଲଙ୍ଗାନା ରାଜ୍ୟରେ କୋଭିଡ୍-୧୯ ଭାଇରସ୍ର ଏକ ସମୂହକୁ ବୈଜ୍ଞାନିକମାନେ ଠାବ କରିଛନ୍ତି, ଯାହା ଅନ୍ୟ ରାଜ୍ୟର ସଂକ୍ରମିତଙ୍କ ସ୍ବାବ୍ରେ ଦେଖାଯାଉଥିବା ଭାଇରସ୍ଠାରୁ ଅଲଗା। ଏହି ପ୍ରକାର ଭାଇରସ୍ର ନାମ ଦିଆଯାଇଛି ‘କ୍ଲେଡ୍ ଏ୩-ଆଇ’। ଯେଉଁ କରୋନା ଭାଇରସ୍ ଯୋଗୁ ଦେଶବ୍ୟାପୀ ସଂକ୍ରମଣ ବଢୁଛି, ସେଥିରେ ୪୧ ପ୍ରତିଶତ ‘କ୍ଲେଡ୍ ଏ୩-ଆଇ’ ଥିବା ହାଇଦ୍ରାବାଦସ୍ଥିତ ସେଣ୍ଟର ଫର୍ ସେଲ୍ୟୁଲାର ଆଣ୍ଡ ମଲ୍ଲିକ୍ୟୁଲାର ବାୟୋଲୋଜିର (ସିସିଏମ୍ବି) ବୈଜ୍ଞାନିକମାନେ କହିଛନ୍ତି।
ବିଶେଷଜ୍ଞମାନେ କରୋନା ଭାଇରସ୍ର ୬୪ଟି ଜେନମ୍ ସିକ୍ୱେନ୍ସର ବିଶ୍ଲେଷଣ କରିଛନ୍ତି। ସିସିଏମ୍ବି ପକ୍ଷରୁ ଟୁଇଟ୍ କରି ସୂଚନା ଦିଆଯାଇଛି ଯେ, ଭାରତରେ ବ୍ୟାପୁଥିବା ଉକ୍ତ ଭୂତାଣର ଏହି ସମୂହକୁ ଅଦ୍ୟାବଧି ବିଶ୍ଲେଷଣ କରାଯାଇ ନ ଥିଲା। ତେବେ ଏହି ପ୍ରକାର ଭୂତାଣୁ ବେଶି କି କମ୍ କ୍ଷତିକାରକ ତାହା ଅଦ୍ୟାବଧି ଜଣାପଡ଼ି ନ ଥିବା ଏହା ଉପରେ ଗବେଷଣା ଜାରି ରଖିଥିବା ବୈଜ୍ଞାନିକମାନେ କହିଛନ୍ତି। ସିସିଏମ୍ବି ପକ୍ଷରୁ ଆହୁରି ମଧ୍ୟ କୁହାଯାଇଛି ଯେ, ଏହି ଭାଇରସ୍ର ଉତ୍ପତ୍ତି ଆପାତତଃ ୨୦୨୦ ଫେବୃୟାରୀରେ ହୋଇଥିଲା। ଏହାପରେ ଏହା ଦେଶରେ ବ୍ୟାପିଥିବାର ଅନୁମାନ କରାଯାଉଛି। ଦେଶରୁ ସଂଗୃହୀତ ନମୁନାରେ ଏହି ପ୍ରକାର ଜେନମ୍ ସିକ୍ୱେନ୍ସ ଥିବା ଭାଇରସ୍ ୪୧ ପ୍ରତିଶତ ଯାଏ ମିଳିଛି। ସେହିପରି ଏହା ସାରା ଦୁନିଆରୁ ଠାବ କରାଯାଇଥିବା ଭାଇରସ୍ର ଜେନମ ସିକ୍ୱେନ୍ସର ୩.୫%।
ସିସିଏମ୍ବିର ନିର୍ଦ୍ଦେଶକ ରାକେଶ ମିଶ୍ରା କହିଛନ୍ତି, ତେଲଙ୍ଗାନା ଏବଂ ତାମିଲନାଡୁରୁ ସଂଗୃହୀତ ଅଧିକ ନମୁନା ‘କ୍ଲେଡ୍ ଏ୩-ଆଇ’। ଦିଲ୍ଲୀରୁ ନିଆଯାଇଥିବା ନମୁନା ସହ ଏହା କିଛିମାତ୍ରାରେ ମେଳ ଖାଉଛି। ହେଲେ ମହାରାଷ୍ଟ୍ର ଏବଂ ଗୁଜରାଟର ସାମ୍ପଲଠାରୁ ଏହା ସମ୍ପୂର୍ଣ୍ଣ ଭିନ୍ନ। ମହାମାରୀ ଆରମ୍ଭରେ ଅଧିକାଂଶ ନମୁନା ସଂଗ୍ରହ କରାଯାଇଥିଲା। ସେଥିରୁ ଏହି ତଥ୍ୟ ପଦାକୁ ଆସିଥିବା ନିର୍ଦ୍ଦେଶକ ମିଶ୍ରା ସୂଚନା ଦେଇଛନ୍ତି। ଏ ସମ୍ପର୍କରେ ଅଧିକ ସୂଚନା ଦେଇ ସେ କହିଛନ୍ତି ଯେ, ସିଙ୍ଗାପୁର ଏବଂ ଫିଲିପାଇନ୍ସର ନମୁନାରୁ ‘କ୍ଲେଡ୍ ଏ୩-ଆଇ’ ଠାବ କରାଯାଇଥିଲା। ଭୂତାଣୁକୁ ବୁଝିବାକୁ ଅତିଶୀଘ୍ର ଅଧିକରୁ ଅଧିକ ଜେନମ ସିକ୍ୱେନ୍ସ କରାଯିବ। ଏହାଦ୍ୱାରା ଅନେକ ତଥ୍ୟ ପଦାକୁ ଆସିବ। କରୋନା କ୍ଲଷ୍ଟର ସମ୍ପର୍କରେ ଏପରି ଅଧ୍ୟୟନ ଦେଶରେ ପ୍ରଥମ ବୋଲି ନିର୍ଦ୍ଦେଶକ ମିଶ୍ରା କହିଛନ୍ତି।
