ବାଲିଆ,୧୬ା୧୨: ବିରିଡ଼ି ବ୍ଲକ କାର୍ଯ୍ୟାଳୟର ମାତ୍ର ୩୦୦ ମିଟର ଦୂରରେ ରହିଛି ବିରିଡ଼ି ପ୍ରାଥମିକ ବିଦ୍ୟାଳୟ। ଏହାର ସାମ୍ନାରେ ରହିଛି ଏକ ପରିତ୍ୟକ୍ତ ଗୋଦାମ ଗୃହ। ଏହି ଗୋଦାମ ଗୃହଟି ସମ୍ପୂର୍ଣ୍ଣ ବିପଦପୂର୍ଣ୍ଣ ଅବସ୍ଥାରେ ରହିଥିବାବେଳେ ସେଥିରେ ଅନାବନା ଗଛ ମାଡ଼ି ଯାଇଛି। ତେଣୁ ଏହାକୁ ତୁରନ୍ତ ଭାଙ୍ଗିବାକୁ ସ୍ଥାନୀୟ ଗ୍ରାମବାସୀ ପ୍ରଶାସନ ନିକଟରେ ଦାବି କରୁଛନ୍ତି। ମାତ୍ର ପ୍ରଶାସନ ଏ ଦିଗରେ କୌଣସି ପଦକ୍ଷେପ ନେଉ ନ ଥିବାରୁ ସେମାନଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ଆଗାମୀ ଦିନରେ ଯଦି ଏ ଦିଗରେ କୌଣସି ପଦକ୍ଷେପ ନିଆ ନ ଯାଏ ତେବେ ସେମାନେ ଆନ୍ଦୋଳନାତ୍ମକ ପନ୍ଥା ଅବଲମ୍ବନ କରିବେ ବୋଲି ଚେତାବନୀ ଦେଇଛନ୍ତି।
୩୦ ବର୍ଷ ତଳେ ଲକ୍ଷାଧିକ ଟଙ୍କା ବ୍ୟୟରେ ନିର୍ମାଣ ହୋଇଥିବା ଏହି ଗୋଦାମ ଗୃହକୁ ବ୍ଲକ ପ୍ରଶାସନ ପକ୍ଷରୁ ବ୍ୟବହାର କରାଯାଉଥିଲା। ଏପରି କି ବିଭିନ୍ନ ରାଶନ ସାମଗ୍ରୀ ଏଠାରେ ମହଜୁଦ ରହୁଥିଲା। କାଳକ୍ରମେ ଆଉ ରାଶନ ସାମଗ୍ରୀ ରଖାଗଲା ନାହିଁ। ଫଳରେ ଗୃହଟି ବ୍ୟବାହର ନ ହୋଇ ଜରାଜୀର୍ଣ୍ଣ ଅବସ୍ଥାକୁ ଚାଲିଗଲା। ଏବେ ଏହି ଗୃହର କାନ୍ଥରୁ ପ୍ଲାଷ୍ଟର ଖସିବା ସହ ଇଟା ମଧ୍ୟ ଗଳ ପଡ଼ିଲାଣି। ଘର ଉପରେ ପଡିଥିବା ଅଜବେଷ୍ଟ ଭାଙ୍ଗିଗଲାଣି। କେତେବେଳେ ଯେ, ଏହି ଗୃହ ଭୁଶୁଡ଼ିବ ତାହା କେହି କହିପାରିବେ ନାହିଁ। ବିଦ୍ୟାଳୟ ଛାତ୍ରୀଛାତ୍ର ଏହାର ପାର୍ଶ୍ୱ ଦେଇ ଯିବା ଆସିବା କରୁଥିବାରୁ ସେମାନଙ୍କ ପାଇଁ ବିପଦ ସୃଷ୍ଟି ହୋଇଛି। ଯେକୌଣସି ସମୟରେ ଯଦି ଏହି ଗୃହ ଭୁଶୁଡ଼ି ପଡ଼େ ତେବେ ବଡ଼ ଦୁର୍ଘଟଣାକୁ ଏଡ଼ାଇ ଦିଆଯାଇ ନ ପାରେ। ଛାତ୍ରୀଛାତ୍ରଙ୍କ ବ୍ୟତିତ ଜନସାଧାରଣ ମଧ୍ୟ ଏହି ଗୋଦାମ ଗୃହ ଦେଇ ଯାତାୟାତ କରୁଛନ୍ତି। ତେଣୁ ଏହି ବିପଦସଙ୍କୁଳ ଗୃହକୁ ତୁରନ୍ତ ଭାଙ୍ଗିବାକୁ ଅଞ୍ଚଳର ବୀରବର ମାଣିଆ, ଶିଦ୍ଧେଶ୍ୱର ପାତ୍ର, ଗଗନ ସାହୁ, ରାଜକିଶୋର ଭୋଇ, ସନ୍ଦୀପ ଓଝା, ଭାସ୍କର ବେହେରା, ସଞ୍ଜୟ ଭୋଇ, ଆକାଶ ଭୋଇ, କୃଷ୍ଣ ଭୋଇ, କେଳୁଚରଣ ଦାସ, ସଞ୍ଜୟ ସିଂ, ସନ୍ତୋଷ ଦାସ, ମାଧବ ଭୋଇ, ବିକାଶ ଭୋଇ ପ୍ରମୁଖ ଦାବି କରିଛନ୍ତି। ଏ ସମ୍ପର୍କରେ ବିଡିଓ ଜୀବନ ଚନ୍ଦ୍ର ମଲ୍ଲିକଙ୍କୁ ପଚାରିବାରେ ସେ କହିଥିଲେ, ଗୃହ ଭଙ୍ଗାଯିବା ନେଇ ଜିଲାପାଳଙ୍କ ନିର୍ଦ୍ଦେଶ ଅନୁସାରେ ଜିଲା ପ୍ରକଳ୍ପ ଅଧିକାରୀଙ୍କୁ ଅବଗତ କରାଯାଇଛି। ଖୁବ୍ଶୀଘ୍ର ପରବର୍ତ୍ତୀ କାର୍ଯ୍ୟପନ୍ଥା ଗ୍ରହଣ କରାଯିବ। ଏବେ ଦେଖିବାକୁ ବାକି ରହିଲା କେବେ ଏ ଦିଗରେ ପଦକ୍ଷେପ ନିଆଯାଉଛି।
