ବିନିଶ୍,୨୮ା୭: ଉତ୍ତର ସିରିଆରେ ଯୁଦ୍ଧବିମାନରୁ ଆକ୍ରମଣ ବେଳେ ଏକ ବିଲ୍ଡିଂ ଉପରେ ବୋମାମାଡ଼ ହୋଇଛି। ୫ ବର୍ଷର ଝିଅଟି ଝୁଲନ୍ତା ଅବସ୍ଥାରେ ଥିବା ତା’ର କୁନି ଭଉଣୀକୁ ଉଦ୍ଧାର ଲାଗି ଉଦ୍ୟମ କରି ତା’ର ଟି-ସାର୍ଟକୁ ଟାଣିଧରିଛି। ଏହି ସମୟରେ ବିଲ୍ଡିଂ ଭୁଶୁଡ଼ିପଡିବାରୁ ଭଗ୍ନାବଶେଷ ତଳେ ଚାପିହୋଇ ଝିଅର ଜୀବନ ଯାଇଛି। ସେମାନଙ୍କ ବାପା ଭଗ୍ନାବଶେଷ ଉପରେ ଛିଡ଼ାହୋଇ ଚିତ୍କାର କରିବା ସହ ମୁଣ୍ଡରେ ହାତ ଦେଇଛନ୍ତି। ଏଭଳି ହୃଦୟ ବିଦାରକ ଫଟୋ ସୋସିଆଲ ମିଡିଆରେ ଭାଇରାଲ ହେବା ପରେ ହଇଚଇ ସୃଷ୍ଟି କରିଛି। ଏହା ସିରିଆ ଯୁଦ୍ଧ ସମୟର ସ୍ମୃତିକୁ ମନେପକାଇଦେଉଛି।
ସ୍ଥାନୀୟ ନ୍ୟୁଜ୍ ଓ୍ବେବ୍ସାଇଟ ଏସ୍ଓ୍ବାଇ୨୪ରେ କାର୍ଯ୍ୟ କରୁଥିବା ବଶାର ଅଲ୍-ଶେଖ୍ ବୁଧବାର ଏହି ଫଟୋ ଉଠାଇଛନ୍ତି। ସିରିଆର ଉତ୍ତରପଶ୍ଚିମାଞ୍ଚଳରେ ଅବସ୍ଥିତ ଇଦ୍ଲିବ୍ ପ୍ରଦେଶର ଅରିହା ସହରରେ ଯୁ୍ଦ୍ଧବିମାନରୁ ବୋମାମାଡ଼ ହୋଇଥିଲା। ଜେହାଦୀମାନଙ୍କ ଅକ୍ତିଆରରେ ଥିବା ଉକ୍ତ ଅଞ୍ଚଳକୁ ଦାମାସ୍କସ୍ ଓ ଏହାର ସହଯୋଗୀ ରୁଷିଆ ଏପ୍ରିଲ ମାସରୁ ନିୟମିତ ଟାର୍ଗେଟ କରିଆସୁଛି। ରୁଷିଆ ସମର୍ଥତ୍ତ ସରକାର ବିଦ୍ରୋହୀ ଓ ଜେହାଦୀଙ୍କ କବଳରୁ ଇଦ୍ଲିବ୍ ସହରକୁ ମୁକ୍ତକରିବା ଲାଗି ଉଦ୍ୟମ ଜାରି ରଖିଛି। ଏପ୍ରିଲ ୨୯ରୁ ଉତ୍ତର ସିରିଆରେ ସରକାରଙ୍କ ସାମରିକ କାର୍ଯ୍ୟାନୁଷ୍ଠାନ ବୃଦ୍ଧି ପାଇଥିବାବେଳେ ୩୫୦ରୁ ଊର୍ଦ୍ଧ୍ୱ ସାଧାରଣ ଜନତା ପ୍ରାଣ ହରାଇବା ସହ ୩ ଲକ୍ଷ ୩୦ ହଜାର ଲୋକ ଘରଦ୍ୱାର ଛାଡ଼ି ପଳାଇଲେଣି ବୋଲି ଗତ ସପ୍ତାହରେ ଜାତିସଂଘ ପକ୍ଷରୁ କୁହାଯାଇଥିଲା।
ଭଗ୍ନାବଶେଷ ତଳୁ ଉଦ୍ଧାର କରାଯାଇ ରିହାମ୍ (୫) ଓ ତାଙ୍କ ସାନଭଉଣୀ ତୁକାଙ୍କୁ ସ୍ଥାନୀୟ କ୍ଲିନିକ୍କୁ ନିଆଯାଇଥିଲା। ପରେ ଇଦ୍ଲିବ୍ର ଏକ ବଡ଼ ହସ୍ପିଟାଲକୁ ସ୍ଥାନାନ୍ତର କରାଯାଇଥିଲା। ସେଠାରେ ଡାକ୍ତର ରିହାମଙ୍କୁ ମୃତ ଘୋଷଣା କରିଥିଲେ। ତୁକା ହସ୍ପିଟାଲର ଆଇସିୟୁରେ ମୃତ୍ୟୁ ସହ ସଂଗ୍ରାମ କରୁଛନ୍ତି। ସେମାନଙ୍କର ବାପା ଅମଜାଦ୍ ଅଲ୍-ଅବ୍ଦୁଲ୍ଲା ବୋଲି ଜଣାପଡିଛି। ଏହି ଆକ୍ରମଣରେ ତାଙ୍କ ସ୍ତ୍ରୀ ଆସ୍ମା ନାକୁଲ୍ଙ୍କର ଘଟଣାସ୍ଥଳରେ ମୃତ୍ୟୁ ହୋଇଛି। ଭଗ୍ନାବଶେଷ ମଧ୍ୟରୁ ଜଣେ ଯୁବକଙ୍କୁ ସିରିଆ ସିଭିଲ୍ ଡିଫେନ୍ସ ବାହିନୀ ହ୍ବାଇଟ୍ ହେଲମେଟ୍ସ ଉଦ୍ଧାର କରିଥିବା କହିଛି। ବୁଧବାର ଉକ୍ତ ପ୍ରଦେଶର ୩ଟି ସ୍ଥାନରେ ଏୟାରଷ୍ଟ୍ରାଇକ୍ ହୋଇଥିଲା। ଏଥିରେ ୫ ଶିଶୁଙ୍କ ସମେତ ୨୦ ଜଣ ନିହତ ହୋଇଥିବା ବ୍ରିଟେନର ଅବ୍ଜରଭେଟୋରି ଫର ହ୍ୟୁମାନ ରାଇଟ୍ସ ପକ୍ଷରୁ କୁହାଯାଇଛି।
