ଭୁବନେଶ୍ୱର,୧୨।୯(ବ୍ୟୁରୋ): ରାଜଧାନୀର ବିଭିନ୍ନ ସ୍କୁଲରେ ବୁଧବାର ସ୍ବତନ୍ତ୍ର ସ୍କ୍ବାଡ୍ ପକ୍ଷରୁ ଅଚାନକ ପରିଦର୍ଶନ ହୋଇଥିଲା। ସ୍କୁଲ ବ୍ୟାଗ୍ ଓଜନ ତଦାରଖ ପାଇଁ ଖୋର୍ଦ୍ଧା ଜିଲାପାଳଙ୍କ ନେତୃତ୍ୱରେ ଗଠିତ ହୋଇଥିବା ଏହି ସ୍କ୍ବାଡ୍ ସ୍କୁଲ ଯାଇ ପିଲାମାନଙ୍କ ବ୍ୟାଗ୍ ଯାଞ୍ଚ କରିଥିଲେ। ଜିଲା ଶିକ୍ଷାଧିକାରୀ ବୃନ୍ଦାବନ ଶତପଥୀ ଓ ଡିପିସି ଅମିତା ପଟ୍ଟନାୟକଙ୍କ ତତ୍ତ୍ୱାବଧାନରେ ୨ଟି ସ୍କ୍ବାଡ୍ର ୧୦ଜଣ ସଦସ୍ୟ ବୁଧବାର ରାଜଧାନୀର ବିଭିନ୍ନ ସ୍କୁଲ ପରିଦର୍ଶନ କରିଥିଲେ। ଅଧିକାଂଶ ସ୍କୁଲରେ ପିଲାମାନଙ୍କ ବ୍ୟାଗ୍ର ଓଜନ ନିର୍ଦ୍ଧାରିତ ଓଜନଠାରୁ ବହୁ ଅଧିକ ଥିବା ଦେଖାଯାଇଥିଲା। ଏଥିସହିତ କୌଣସି ଘରୋଇ ବିଦ୍ୟାଳୟ ଏସ୍ସିଇଆର୍ଟି/ଏନ୍ସିଇଆର୍ଟି ପୁସ୍ତକ ବ୍ୟବହାର କରୁନାହାନ୍ତି। ଏ ସମ୍ପର୍କରେ ଓଡ଼ିଶା ଅଭିଭାବକ ମହାସଂଘ ଅଧ୍ୟକ୍ଷ ବାସୁଦେବ ଭଟ୍ଟ କହିଛନ୍ତି ଯେ, ଭୁବନେଶ୍ୱର ବ୍ଲକ୍ରେ ୫୦୦ସ୍କୁଲକୁ ୨ଟି ସ୍କ୍ବାଡ୍ ଗଠନ କରିବା ଧର୍ମକୁ ଆଖିଠାର ମାରିବା ଭଳି। ଏତେ ସଂଖ୍ୟକ ସ୍କୁଲ ପାଇଁ ଅତି କମ୍ରେ ୬ଟି ସ୍କ୍ବାଡ୍ ଆବଶ୍ୟକ। ନ ହେଲେ ଆସନ୍ତା ୩୦ତାରିଖ ସୁଦ୍ଧା ସମସ୍ତ ସ୍କୁଲକୁ ପରିଦର୍ଶନ କରି ରିପୋର୍ଟ ଦେଇ ହେବନି ବୋଲି ସେ କହିଛନ୍ତି। ତେବେ ଗୁରୁତ୍ୱପୂର୍ଣ୍ଣ କଥା ହେଉଛି କୌଣସି ବିଦ୍ୟାଳୟ ଏନ୍ସିଇଆର୍ଟିର ପୁସ୍ତକ ବ୍ୟବହାର କରୁନାହାନ୍ତି। ତେଣୁ ଏହା ବିରୋଧରେ ସରକାର ତୁରନ୍ତ ପଦକ୍ଷେପ ନେବା ଉଚିତ ବୋଲି ଅଭିଭାବକ ମହାସଂଘ ପକ୍ଷରୁ ଦାବି କରାଯାଇଛି।
ନିୟମାନୁସାରେ ପ୍ରଥମରୁ ଦ୍ୱିତୀୟ ଶ୍ରେଣୀ ପିଲାଙ୍କ ବ୍ୟାଗ୍ ଓଜନ ୧.୫ କେଜି ରହିବ। ସେହିପରି ତୃତୀୟରୁ ପଞ୍ଚମ ଶ୍ରେଣୀ ପିଲାଙ୍କ ୨.୩କେଜି, ଷଷ୍ଠରୁ ସପ୍ତମ ଶ୍ରେଣୀର ୪କେଜି, ଅଷ୍ଟମ ଓ ନବମ ଶ୍ରେଣୀର ୪.୫କେଜି ଓ ଦଶମ ଶ୍ରେଣୀ ପିଲାଙ୍କ ସ୍କୁଲ ବ୍ୟାଗ୍ ୫କେଜି ରହିବ। ପ୍ରଥମରୁ ଦଶମ ଶ୍ରେଣୀ ପର୍ଯ୍ୟନ୍ତ ପିଲାଙ୍କ ସ୍କୁଲ ବ୍ୟାଗ୍ର ଓଜନ ହ୍ରାସକୁ କଡ଼ାକଡ଼ି ପାଳନ କରିବାକୁ ପୂର୍ବରୁ ସବୁ ଜିଲାପାଳ, ପ୍ରାଥମିକ ଓ ମାଧ୍ୟମିକ ଶିକ୍ଷା ନିର୍ଦ୍ଦେଶାଳୟକୁ ବିଦ୍ୟାଳୟ ଓ ଗଣଶିକ୍ଷା ବିଭାଗ ଚିଠି ଲେଖିଥିଲା। ପିଲାଙ୍କ ସ୍କୁଲ ବ୍ୟାଗ୍ର ଧାର୍ଯ୍ୟ ଓଜନ ଏବଂ ନିର୍ଦ୍ଧାରିତ ବହି ଯାଞ୍ଚ କରିବାକୁ ନିର୍ଦ୍ଦେଶ ଦିଆଯାଇଥିଲା। ସିବିଏସ୍ଇ ଓ ଆଇସିଏସ୍ଇ ବୋର୍ଡ ଦ୍ୱାରା ପରିଚାଳିତ କିଛି ସ୍କୁଲରେ ପିଲାମାନେ ଅତ୍ୟଧିକ ଓଜନର ବ୍ୟାଗ୍ ଧରି ସ୍କୁଲ ଯାଉଛନ୍ତି ଏବଂ ଏସ୍ସିଇଆର୍ଟି/ଏନ୍ସିଇଆର୍ଟି ପୁସ୍ତକ ପଢ଼ିବାକୁ କୁହାଯାଉଥିଲେ ବି ଏହି ନିୟମ ପାଳନ କରାଯାଉନି। ତେଣୁ ନିୟମକୁ କଡ଼ାକଡ଼ି କରିବାକୁ ଜିଲାସ୍ତରରେ ସ୍ବତନ୍ତ୍ର ସ୍କ୍ବାଡ୍ ଗଠନ କରି ଅଚାନକ ଚଢ଼ାଉ ପାଇଁ ବିଭାଗ ନିର୍ଦ୍ଦେଶ ଦେଇଥିଲା। ଏହି ପରିପ୍ରେକ୍ଷୀରେ ମଙ୍ଗଳବାର ଖୋର୍ଦ୍ଧା ଜିଲାପାଳ ସ୍କୁଲ ବ୍ୟାଗ୍ ଯାଞ୍ଚ କରିବା ପାଇଁ ୩ ଜିଲାସ୍ତରୀୟ ସ୍କ୍ବାଡ୍ ଗଠନ କରିଥିଲେ।
