ମୁମ୍ବାଇ୨୮। ୩: କୋଭିଡ-୧୯ ଯୋଗୁ ଦେଶର ଅର୍ଥବ୍ୟବସ୍ଥା ବର୍ତ୍ତମାନ କ୍ଷତିଗ୍ରସ୍ତ ହୋଇଛି। ଏହାର ପ୍ରଭାବକୁ କମ୍ କରିବା ଲାଗି ରିଜର୍ଭ ବ୍ୟାଙ୍କ ଅଫ୍ ଇଣ୍ଡିଆ(ଆର୍ବିଆଇ) ଦେଶର ଅର୍ଥ ବ୍ୟବସ୍ଥାକୁ ମୋଟ ୩.୭୪ ଲକ୍ଷ କୋଟି ଟଙ୍କାର ନଗଦ ଉପଲବ୍ଧ କରାଇ ବୋଲି ଗଭର୍ନର ଶକ୍ତିକାନ୍ତ ଦାସ ଶୁକ୍ରବାର ସୂଚନା ଦେଇଛନ୍ତି। ଦେଶର ପୁଞ୍ଜି ବଜାର ଏବେ ପ୍ରଭାବିତ ସ୍ଥିତିରେ ରହିଛି। ବଜାରରେ ସ୍ଥିତାବସ୍ଥା ଆଣିବା ଏବଂ ଅର୍ଥନୈତିକ ଅଭିବୃଦ୍ଧିକୁ ଫେରାଇ ଆଣିବା ଦିଗରେ କେନ୍ଦ୍ରୀୟ ବ୍ୟାଙ୍କକୁ ପଦକ୍ଷେପ ନେବାର ଆବଶ୍ୟକତା ରହିଛି ବୋଲି ଶୁକ୍ରବାର ମୁଦ୍ରାନୀତି କମିଟି (ଏମ୍ପିସି) ବୈଠକରେ ସେ ବିଭିନ୍ନ ପଦକ୍ଷେପ ଘୋଷଣା କରିବା ସହ ଏଭଳି ସୂଚନା ଦେଇଛନ୍ତି। ବଜାରକୁ ନଗଦ ସୁବିଧା ଯୋଗାଣ ପଦକ୍ଷେପ ସମ୍ପର୍କିତ ସୂଚନା ଦେଇ ସେ କହିଛନ୍ତି ଯେ, ପ୍ରାୟ ୧ ଲକ୍ଷ କୋଟି ଟଙ୍କାର ରେପୋ ଅପରେଶନ ହାତକୁ ନିଆଯାଇଛି। ଏହା ଦ୍ୱାରା ବଜାରରେ ନଗଦ ଉପଲବ୍ଧ କରାଇବା ତ୍ୱରାନ୍ବିତ ହେବ। ଏବେ ରିଜର୍ଭ ବ୍ୟାଙ୍କ କ୍ୟାସ ରିଜର୍ଭ ରେସିଓ (ସିଆର୍ଆର୍) ୧୦୦ ବେସିସ୍ ପଏଣ୍ଟ ଖସାଇବା ଯୋଗୁ ଏହା ୩%କୁ କମିଛି ଏହା ୪% ରହିଥିଲା। ମାର୍ଚ୍ଚ ୨୮ରୁ ଆଗାମୀ ଗୋଟିଏ ବର୍ଷ ଲାଗି ଏଭଳି ଘୋଷଣା କାମ କରିବ। ସିଆର୍ଆର୍ କୋହଳ ହେବା ଦ୍ୱାରା ବଜାରକୁ ୧.୩୭ ଲକ୍ଷ କୋଟି ଟଙ୍କାର ନଗଦ ଆସିବା ନେଇ ଆଶା କରାଯାଉଛି ବୋଲି ଗଭର୍ନର ମତ ରଖିଛନ୍ତି। ସିଆର୍ଆର୍ ହେଉଛି ବ୍ୟାଙ୍କ ଜମାର ସେହି ଅଂଶ ଯାହାକୁ ବ୍ୟାଙ୍କଗୁଡିକ ବାଧ୍ୟତାମୂଳକ ଭାବେ କେନ୍ଦ୍ରୀୟ ବ୍ୟାଙ୍କରେ ଜମା ରଖିଥାନ୍ତି। କେନ୍ଦ୍ରୀୟ ବ୍ୟାଙ୍କ ୨୦୧୩ ଫେବୃୟାରୀରେ ସିଆର୍ଆରକୁ ୨୫ ବେସିସ ପଏଣ୍ଟ ହ୍ରାସ କରିଥିଲେ। ମୋଟାମୋଟି ଭାବେ କହିବାକୁ ଗଲେ ବିଭିନ୍ନ ପଦକ୍ଷେପ ଦ୍ୱାରା ବଜାରକୁ ୩.୭୪ ଲକ୍ଷ କୋଟି ଟଙ୍କା ଉପଲବ୍ଧ ହେବ ବୋଲି ସେ ମତ ରଖିଛନ୍ତି।
