ନୂଆଦିଲ୍ଲୀ,୧୮-୭: ମାଇକ୍ରୋସଫ୍ଟ ପ୍ରତିଷ୍ଠାତା ବିଲ୍ ଗେଟ୍ସଙ୍କ ଠାରୁ ବିଶ୍ୱର ଦ୍ୱିତୀୟ ଶୀର୍ଷ ଧନୀ ମୁକୁଟ ହଟିଯାଇଛି। ପ୍ରକାଶ ପାଇଥିବା ବ୍ଲୁମ୍ବର୍ଗ ବିଲିୟନେୟାର ଇଣ୍ଡେକ୍ସ ତାଲିକାରେ ସେ ତୃତୀୟ ସ୍ଥାନକୁ ଖସିଯାଇଛନ୍ତି। ତାଙ୍କ ସ୍ଥାନ ନେଇଛନ୍ତି ଫ୍ରାନ୍ସର ବର୍ନାଡ ଆର୍ନଲ୍ଟ। ସେ ତୃତୀୟ ସ୍ଥାନରୁ ଦ୍ୱିତୀୟକୁ ଉଠି ଆସିଛନ୍ତି। ଗତ ୭ ବର୍ଷ ହେବ ଗେଟ୍ସ ଇଣ୍ଡେକ୍ସର ୨ୟ ସ୍ଥାନରେ ରହିଥିଲେ। ଲକ୍ଜରୀ ଗୁଡ଼ସ କମ୍ପାନୀ ଏଲ୍ଭିଏମ୍ଏଚ୍(ଲୁଇ ଭିଟନ ମୋଏଟ ହେନେସୀ)ର ଅଧ୍ୟକ୍ଷ ତଥା ସିଇଓ ଭାବେ ୭୦ ବର୍ଷର ଆର୍ନଲ୍ଟ କାର୍ଯ୍ୟ କରୁଛନ୍ତି। ଏହି କମ୍ପାନୀ ଫ୍ରାନ୍ସରେ ବେଶ ଚର୍ଚ୍ଚିତ। ଫୋବର୍ସ ପତ୍ରିକା ଅନୁଯାୟୀ ଆର୍ନଲ୍ଟ ୧୯୮୪ରେ ଲକ୍ଜରୀ ଗୁଡସ ମାର୍କେଟରେ ପାଦ ଥାପିଥିଲେ। ଏହାପରେ ସେ ଟେକ୍ସଟାଇଲ ଗ୍ରୁପ୍କୁ ଅଧିଗ୍ରହଣ କରିଥିଲେ। ବ୍ଲୁମ୍ବର୍ଗ ଦ୍ୱାରା ବୁଧବାର ଜାରି ତଥ୍ୟ ଅନୁଯାୟୀ, ତାଙ୍କର ମୋଟ ସମ୍ପତ୍ତିର ପରିମାଣ ୧୦୮ ବିଲିୟନ ଡଲାର। ସେହିପରି ବିଲ୍ ଗେଟ୍ସଙ୍କର ୧୦୭ ବିଲିୟନ ଡଲାର ସମ୍ପତ୍ତି ରହିଛି। ଟ୍ୟାଗ୍ ହାୟର, ଡି ବିୟର୍ସ, ବୁଲଗାରୀ, ଥମାସ ପିଙ୍କ, ଫେଣ୍ଡି ଭଳି ନାମୀଦାମୀ କମ୍ପାନୀ ସମେତ ପ୍ରାୟ ୭୦ ବ୍ରାଣ୍ଡର ମାଲିକ ହେଉଛନ୍ତି ଅର୍ନଲ୍ଟ। ସେ ନେଟ୍ଫ୍ଲିକ୍ସ ଓ ବ୍ଲୁ କ୍ୟାପିଟାଲରେ ମଧ୍ୟ ନିବେଶ କରିଛନ୍ତି। ତେବେ ଇ-କମର୍ସ କମ୍ପାନୀ ଆମାଜନ ପ୍ରତିଷ୍ଠାତା ଜେଫ୍ ବେଜୋସ୍ ଶୀର୍ଷରେ ରହିଛନ୍ତି। ତାଙ୍କର ମୋଟ ସମ୍ପତ୍ତି ପରିମାଣ ୧୨୫ ବିଲିୟନ ଡଲାର।
ମୁକେଶ ଅମ୍ବାନୀ ୧୩ ତମ ସ୍ଥାନରେ
ବ୍ଲୁମ୍ବର୍ଗ ବିଲିୟନେୟାର ଇଣ୍ଡେକ୍ସରେ ରିଲାଏନ୍ସ ଇଣ୍ଡଷ୍ଟ୍ରିଜ୍ ଲିମିଟେଡ ମାଲିକ ତଥା ଅଧ୍ୟକ୍ଷ ମୁକେଶ ଅମ୍ବାନୀ ଭାରତୀୟ ଶୀର୍ଷ ଧନୀ ହୋଇଥିବା ବେଳେ ବିଶ୍ୱରେ ସେ ୧୩ ତମ ସ୍ଥାନରେ ରହିଛନ୍ତି। ତାଙ୍କର ମୋଟ ସମ୍ପତ୍ତିର ମୂଲ୍ୟ ୫୧.୮ ବିଲିୟନ ଡଲାର ବୋଲି ଇଣ୍ଡେକ୍ସରୁ ଜଣାପଡିଛି। ଏହି ତାଲିକାରେ ମୁକେଶଙ୍କ ସମେତ ୧୮ ଭାରତୀୟ ଧନୀ ସ୍ଥାନ ପାଇଛନ୍ତି। ମୁକେଶଙ୍କ ପରେ ଓ୍ବିପ୍ରୋ ପ୍ରତିଷ୍ଠାତା ତଥା ସିଏମ୍ଡି ଅଜିମ ପ୍ରେମ୍ଜୀ(୪୮ତମ, ୨୦.୫ ବିଲିୟନ ଡଲାର), ଶିବ ନାଡାର(୯୨ ତମ, ୧୪.୫ ବିଲିୟନ ଡଲାର) ତୃତୀୟ ଓ ଉଦୟ କୋଟାକ(୯୬ତମ, ୧୩.୮ ବିଲିୟନ ଡଲାର)ଚତୁର୍ଥ ସ୍ଥାନରେ ରହିଛନ୍ତି।
