ନୂଆଦିଲ୍ଲୀ,୧୭।୫ : ବେସାମରିକ ବିମାନ ଚଳାଚଳ କ୍ଷେତ୍ରରେ ଦକ୍ଷ ଏୟାରସ୍ପେସ୍ ମ୍ୟାନେଜମେଣ୍ଟ ଲାଗି ସରକାର କେତେକ ପଦକ୍ଷେପ ଗ୍ରହଣ କରିଛନ୍ତି। ଏହାଦ୍ୱାରା କମ୍ପାନୀଙ୍କୁ ପ୍ରାୟ ୧୦୦୦ କୋଟି ଟଙ୍କା ଲାଭ ମିଳିବ ବୋଲି ଜଣାପଡିଛି। ବର୍ତ୍ତମାନ ୬୦% ଭାରତୀୟ ଏୟାରସ୍ପେସ୍ ମାଗଣାରେ ଉପଲବ୍ଧ କରାଯାଇଛି। ଏହି କ୍ଷେତ୍ରରେ ରହିଥିବା କଟକଣାକୁ କୋହଳ କରାଯିବା ଯୋଗୁ ଏହାର ଲାଭ କମ୍ପାନୀଗୁଡିକୁ ମିଳିବ। କମ୍ପାନୀ ଏୟାରସ୍ପେସ୍କୁ ସର୍ବୋତ୍ତମ ଭାବେ ବ୍ୟବହାର କରିପାରିବେ। ଫଳରେ ସେମାନଙ୍କ ଇନ୍ଧନ ଏବଂ ସମୟ ବଞ୍ଚିବ। ବ୍ୟବସାୟ ପାଇଁ ଏହା ଭଲ ବାତାବରଣ ସୃଷ୍ଟି କରିବ ବୋଲି ଜଣାପଡିଛି।
ଅଧିକ ବିଶ୍ୱସ୍ତରୀୟ ବିମାନ ବନ୍ଦର
ବିମାନ ବନ୍ଦର ପରିଚାଳନାରେ ଘରୋଇ ସହଭାଗିତା ବଢ଼ାଇବା ଲାଗି ସରକାର ଦ୍ୱିତୀୟ ପର୍ଯ୍ୟାୟରେ ଅଧିକ ୬ ବିମାନ ବନ୍ଦର ଘରୋଇକରଣ କରିବେ। ଏଥିଲାଗି ଶୀଘ୍ର ପ୍ରକ୍ରିୟା ଜାରି କରାଯିବ। ପ୍ରଥମ ଏବଂ ଦ୍ୱିତୀୟ ପର୍ଯ୍ୟାୟକୁ ମିଶାଇ ଘରୋଇ ଅଂଶୀଦାରମାନେ ପ୍ରାୟ ୧୩ ହଜାର କୋଟି ଟଙ୍କା ନିବେଶ କରିବେ ବୋଲି ଜଣାପଡିଛି। ତୃତୀୟ ପର୍ଯ୍ୟାୟ ନିଲାମରେ ଆଉ ୬ ବିମାନ ବନ୍ଦରକୁ ନିଲାମ କରାଯିବ।
ଏମ୍ଆର୍ଓରେ ବିଶ୍ୱସ୍ତରୀୟ ହେବ ଭାରତ
ବିମାନ ମରାମତି, ପରିଚାଳନା ଏବଂ ଓଭରହଲିଂ (ଏମ୍ଆର୍ଓ) କ୍ଷେତ୍ରରେ ଭାରତକୁ ଗ୍ଲୋବାଲ ହବ୍ରେ ରୂପାନ୍ତରିତ କରିବା ଲାଗି ଲକ୍ଷ୍ୟ ରଖାଯାଇଛି। ଏହି ଇକୋ ସିଷ୍ଟମରେ ଟିକସ ହାର କମ୍ କରାଯିବ। ଗତ ୩ ବର୍ଷରେ ସାରା ଦେଶରେ ଏହି ଶିଳ୍ପ ୮୦୦ କୋଟି ଟଙ୍କାରୁ ୨୦୦୦ କୋଟି ଟଙ୍କାକୁ ବଢିଛି। ବିଶ୍ୱସ୍ତରୀୟ କମ୍ପାନୀଙ୍କୁ ଆକୃଷ୍ଟ କରିବା ଲାଗି ସରକାର ଲକ୍ଷ୍ୟ ରଖିଛନ୍ତି। ଅଧିକ କମ୍ପାନୀ ଆସିଲେ ବିମାନ କମ୍ପାନୀଙ୍କ ପରିଚାଳନା ଖର୍ଚ୍ଚ କମ୍ ହେବ।
