ରସୁଲପୁର/ଧର୍ମଶାଳା,୧୫।୩(ଡିଏନଏ): ଯାଜପୁର ଜିଲାର ଲଘୁ ଖଣିଜ ହବ୍ଭାବେ ଜଣାଶୁଣା ଧର୍ମଶାଳା ବ୍ଲକ ଅନ୍ତର୍ଗତ ବିଛାଖଣ୍ଡିରେ ବିରୋଧୀଙ୍କ ସ୍ବର ଶାଣିତ ହୋଇଛି । ଏହି ଅଞ୍ଚଳର ପାଣିଟାଙ୍କିଠାରେ ଶନିବାରଠାରୁ କଂଗ୍ରେସ ପକ୍ଷରୁ ଅନିର୍ଦ୍ଧିଷ୍ଟ କାଳ ପର୍ଯ୍ୟନ୍ତ ଧାରଣା ଆରମ୍ଭ ହୋଇଛି ।
ଓଡ଼ିଶା କଂଗ୍ରେସ ମୁଖପାତ୍ର ସ୍ମୃତିରେଖା ପହିଙ୍କ ଡାକରାରେ ସ୍ଥାନୀୟ ଅଞ୍ଚଳର ଜନପ୍ରତିନିଧି, ଶତାଧିକ ଜନସାଧାରଣ ଧାରଣାସ୍ଥଳରେ ରୁଣ୍ଡ ହୋଇ ବେଆଇନ ଲଘୁ ଖଣିଜ ଖନନକୁ ବିରୋଧ କରିବା ସହ ଅଦ୍ୟାବଧି ଖନନ ହୋଇଥିବା ଖଣିଜ ସମ୍ପଦର ହିସାବ ମାଗିଛନ୍ତି ା କଂଗ୍ରେସ କର୍ମୀ ଶରତ ସେଠୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ଧାରଣାରେ ଏହି ଅଞ୍ଚଳରୁ ବର୍ଷବର୍ଷ ଧରି ଲଘୁ ଖଣିଜ ସାମଗ୍ରୀ ଲୁଟ୍ ହେଉଛି ବୋଲି ମତ ପ୍ରକାଶ ପାଇଥିଲା। ରାଜନେତା, କ୍ରଶର ମାଲିକ, ଖଣି ମାଲିକ, ଅସାଧୁ ପ୍ରଶାସନିକ ଅଧିକାରୀଙ୍କ ଯୋଗୁ ମୁଷ୍ଟିମେୟ ଲୋକ ମାଲାମାଲ ହୋଇଛନ୍ତି। ସ୍ଥାନୀୟ ଅଞ୍ଚଳର ଜନସାଧାରଣଙ୍କୁ ମୃତ୍ୟୁର କୂଅ ଭିତରକୁ ଠେଲି ଦେଉଛନ୍ତି। ଏହା ବିରୋଧରେ କଂଗ୍ରେସ ଶନିବାର ଆନ୍ଦୋଳନକୁ ଓହ୍ଲାଇଛି। ଖଣି ମାଲିକ, କ୍ରଶର ମାଲିକ ଜବରଦଖଲରେ ଥିବା ବେଆଇନ ଜମିଗୁଡିକୁ ତୁରନ୍ତ ଚିହ୍ନଟ କରାଯାଉ, ଲଘୁ ଖଣିଜ ସମ୍ପଦ ବିଭାଗ ଓ ପ୍ରଦୂଷଣ ବିଭାଗର ମିଳିତ ତଦନ୍ତ କରାଯାଉ, ପ୍ରତ୍ୟେକ ପରିବାରକୁ ବିଶୁଦ୍ଧ ପାନୀୟ ଜଳ ଯୋଗାଇବା ବ୍ୟବସ୍ଥା, ବେଆଇନ ଭୂତଳ ବ୍ଲାଷ୍ଟିଂ ବନ୍ଦ ହେଉ ଆଦି ଦାବି କରିଛି କଂଗ୍ରେସ। ଉକ୍ତ ଧାରଣାରେ ୧୧ନଂ ଜୋନର କଂଗ୍ରେସ ସଭାପତି କାଳନ୍ଦି ପାଣି, ପୂର୍ବତନ ସରପଞ୍ଚ ବନମାଳି ରାଉତ, ଗୋବିନ୍ଦ ଚନ୍ଦ୍ର ସାମଲ, ବାସୁଦେବ ରାଉତ, ପୂର୍ବତନ ସମିତି ସଭ୍ୟ ହିମାଂଶୁ ମହାପାତ୍ର, ସତ୍ୟାନନ୍ଦ ରାଉତ, ଏକନ ମଲିକ, ବିପିନ୍ ସେଠୀ, ଧନେଶ୍ୱର ରାଉତ, ଲକ୍ଷ୍ମୀଧର ବାରିକ, ଅକ୍ଷୟ ସେଠୀ, ନରେଶ ସାହୁ, ସୁରେଶ ପ୍ରଧାନ, ଲକ୍ଷ୍ମୀଧର ରାଉତ, ମଙ୍ଗୁଳି ମଲିକ ପ୍ରମୁଖ ବକ୍ତବ୍ୟ ରଖିଥିଲେ। ଧାରଣା ସ୍ଥଳରେ ଶତାଧିକ କଂଗ୍ରେସ କର୍ମୀ ଯୋଗ ଦେଇଥିଲେ।
