ଲୋଇସିଂହା, ୮।୭(ଡି.ଏନ୍.ଏ): ବଲାଙ୍ଗୀର ଜିଲା ଲୋଇସିଂହା ବ୍ଲକ ବାଦିବାହାଲ ଗାଁର ବୁରୁଧ୍ ଅମର ଭୋଇ(୯୦)। ମାଏକିନାର ମୁରତୁ ଉତାରୁ ଦୁଇ ଦିବ୍ୟାଙ୍ଗ ଝି’କେ ନେଇ ତାକର ସଁସାର। ଏହେଦେ ବୁରୁଧ୍ ଅମର ଜୀବନ୍ର ଶେଷ୍ ମୁଡ଼ସାକେ ପୁହୁଁଚି ସାରିଛନ୍। ଇଆଡ଼େ ରହିବାକେ ଭଲ ଘରଖଁଡ଼େ ନାଇଁ କି ଖାଏବାକେ ଦାନା ନାଇଁ। ଏନ୍ତାଥି ବୁରୁଧ୍ ଅମର ଚିନ୍ତାରେ ପଡ଼ିଯାଇଛନ୍ ଯେ, ତାକର ମୁରତୁ ଉତାରୁ ଦୁଇ ଦିବ୍ୟାଙ୍ଗ ଝି’ କାଣା କରବେ।
ସୂଚନା ଅନ୍ସାରେ ବାଦିବାହାଲ ପଁଚେତ୍ ସଦର ଗାଁ ବେହେରା ପଡ଼ାରେ ବୁରୁଧ୍ ଅମରକଁର ଘର। ପରିବାର କହେଲେ ଏହେଦେ ଦୁଇ ଦିବ୍ୟାଙ୍ଗ ଝି’ ଚାର(୪୫) ଆର ସୁଦ୍ରା(୪୦)କୁଁ ନେଇ ତାକର ସଁସାର। ଆଏଜ୍କେ ୧୫ ବଛର ତଲେ ଅମରକଁର ମାଏକିନା ଆରପାରକେ ଚାଲିଯାଇଛନ୍। ଏନ୍ତାଥି ଦୁଇ ଦିବ୍ୟାଙ୍ଗ ଝି’ର ସୁରକ୍ଷା ଆର ଭବିଷତ୍ ଚିନ୍ତାରେ ହରମେଶା ବୁରୁଧ୍ ଅମର ଘାରି ହେଉଛନ୍। ଇଆଡ଼େ ଅମର ଅଧାରର ହେଲାରୁ ଆର କାମ୍ବୁତା ନାଇଁ କରିପାରବାର। ସେନ୍ତା ଗାଁରେ ଦିବ୍ୟାଙ୍ଗ ଝି’ମାନକୁ ବି କେହି କୁଲିମଜୁରିର ଲାଗି ନାଇଁ ଡାକ୍ବାର। ଅମରକଁର ଜମିବାଡ଼ି ବଲି ବିଶେଷ କିଛି ନାଇଁ। ପଁଚେତ୍ରୁ ମାସିକ ମିଲୁଥିବାର ୧୫ କେ.ଜି. ଚାଉଲ ଆର ଅମର ପାଉଥିବାର ୫ଶହ ଟଁକା ବୁଢ଼ାବୁଢ଼ି ଭତା ପରିବାରର ସାହାଭରସା। ହେଲେ ଏତ୍କିରେ ମାସେ ଚଲବାରେ ନିଅଁଟ ହେଉଛେ। ମାସର ବାକି ଦିନ୍ ପରିବାରଟା ମାଗିଯାଚି ଚଲୁଥିବାର ବୁରୁଧ୍ ଅମର କହିଛନ୍। ପକାଘର ତାଲିକାରେ ଅମରକଁର ନଁା ରହିଛେ। ହେଲେ ତାଲିକାରେ ତଲେ ଥିବାର ଲୋକ୍ ଘର ପାଇଥିଲାବେଲେ ଅମର ବଁଚିତ୍ ହେଇଥିବାର ଅଭିଯୋଗ କରିଛନ୍। ଇ ଦୁଖି ପରିବାରଟା ପକାଘର ଯୋଜନାରୁ ବାଦ୍ ପଡ଼ଲାରୁ ଗାଁବାସୀକର ଭିତରେ ଅସନ୍ତୋଷ ଦେଖାଦେଇଥିଲା। ଇତାର ପରେ ପଁଚେତ୍ କତୁରପକ୍ଷ ଦରକାରି କାଗଜ୍ପତର ମାଗିଥିବାର ବୁରୁଧ୍ ଅମର କହିଛନ୍। ଏହେଦେ ବରଷାରେ ଘରେ ଦରୋ ଦରୋ ପାଏନ୍ ଗଲୁଥିବାର ଲାଗି ପରିବାରଟା ବଡ଼ଭାରି ଅସ୍ବିଧାର ସାମନା କରୁଛନ୍। ଇଆଡ଼େ ଚାର ଆର ସୁଦ୍ରା ଦିବ୍ୟାଙ୍ଗ ଭତାର ଲାଗି ବାରବାର ବ୍ଲକ ପରଶାସନକେ ଗୁହାରି କରିଆସୁଛନ୍। ହେଲେ ଭିନ୍ନକ୍ଷମ ପରମାନପତର ଅଭାବୁ ଦୁଇ ବହେନ୍ ଭତାରୁ ବଁଚିତ୍ ହେଇଥିବାର ଝନେ ପଡ଼ିଶା କହିଛନ୍। ଏଭେ ଦିନାକେତେ ତଲେ ବ୍ଲକରେ ହେଇଥିବାର ଭୀମଭୋଇ ଭିନ୍ନକ୍ଷମ ସାମର୍ଥ୍ୟ ଶିବିରକେ ଯାଇ ଦୁଇ ବହେନ୍କୁ ନିରାଶ ହେଇଛନ୍। ଇ ଦୁଖି ପରିବାରକେ ଥାନୀୟ ପରଶାସନ ଦୁରୁଷ୍ଟି ଦେଇ ଅତିକମ୍ରେ ୩୫ କେ.ଜି. ଚାଉଲ, ଦୁଇ ବହେନ୍କୁ ଭିନ୍ନକ୍ଷମ ଭତା ଆର କେହେନ୍ସି ବି ଆବାସ ଯୋଜନାରେ ଗୁଟେ ପକାଘର ଯୁଗେଇ ଦେବାକେ ଗାଁବାସୀ ଦାବି କରିଛନ୍।