ଠାକୁରମୁଣ୍ଡା,୩।୫(ଡି.ଏନ୍.ଏ.): ମୟୂରଭଞ୍ଜ ଜିଲା ଠାକୁରମୁଣ୍ଡା ବ୍ଲକ ଅଧୀନ ଚମକପୁର ଗ୍ରାମରେ ରବିବାର ବିଷାକ୍ତ ଜଙ୍ଗଲି ଛତୁ ଖାଇ ଗୋଟିଏ ପରିବାରର ୧୦ ଜଣ ଅସୁସ୍ଥ ହୋଇ ପଡିଛନ୍ତି। ସେମାନଙ୍କୁ ଠାକୁରମୁଣ୍ଡା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଚିକିତ୍ସା ନିମନ୍ତେ ଭର୍ତ୍ତି କରାଯାଇଛି। ଅସୁସ୍ଥଙ୍କ ମଧ୍ୟରୁ ଜଣେ ଶିଶୁ ଓ ଜଣେ ବାଳିକାଙ୍କ ଅବସ୍ଥା ଗୁରୁତର ହେବାରୁ ଉଭୟଙ୍କୁ କରଞ୍ଜିଆ ଉପଖଣ୍ଡ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି।
ସୂଚନା ଅନୁଯାୟୀ, ଗ୍ରାମର ଆଶ୍ରମ ନାୟକଙ୍କ ପରିବାର ଲୋକେ ସକାଳେ ନିକଟସ୍ଥ ଜଙ୍ଗଲରୁ ଛତୁ ଆଣି ରୋଷେଇ କରି ଖାଇଥିଲେ। ପରେ ସେମାନେ ଜଣକ ପରେ ଜଣେ ବାନ୍ତି କରିବା ସହ ଅସୁସ୍ଥ ହୋଇ ପଡ଼ିଥିଲେ। ଅପରାହ୍ନ ୪ଟା ସମୟରେ ୧୦ ଜଣ ଅସୁସ୍ଥଙ୍କୁ ଗ୍ରାମର ଆଶା କର୍ମୀ ରିନୁ ସେଠୀଙ୍କ ସହାୟତାରେ ଠାକୁରମୁଣ୍ଡା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଚିକିତ୍ସା ନିମନ୍ତେ ଭର୍ତ୍ତି କରାଯାଇଥିଲା। ଅସୁସ୍ଥମାନେ ହେଲେ ଆଶ୍ରମ ନାୟକ, ପୁଷ୍ପଲତା ନାୟକ, ତୁଳସୀ ନାୟକ, ରଜବତୀ ନାୟକ, ସୁକାନ୍ତି ନାୟକ, ଆଶିଷ ନାୟକ, ରୂପାଲି ନାୟକ, ଦେବାଶିଷ ନାୟକ, ଦୀପାଲି ନାୟକ ଓ ଦେବଯାନୀ ନାୟକ। ଗୁରୁତର ଅସୁସ୍ଥ ଦେବଯାନୀ ଓ ଦୀପାଲିଙ୍କୁ କରଞ୍ଜିଆ ଡାକ୍ତରଖାନା ସ୍ଥାନାନ୍ତର କରାଯାଇଛି।
