ବିଦାୟ ନେଲେ ଦୁର୍ଗତିନାଶିନୀ
8:33 amOctober 10, 2019 / 21

ଢେଙ୍କାନାଳ ଅଫିସ, ୧୦।୧୦ – ଢେଙ୍କାନାଳ ଜିଲା ଓଡ଼ାପଡ଼ା ବ୍ଲକ ସିମିନଈ ଅଞ୍ଚଳରେ ଶାନ୍ତିଶୃଙ୍ଖଳାର ସହ ଶେଷ ହୋଇଛି ଶାରଦୀୟ ଦୁର୍ଗାପୂଜା। ମିଳିତ ଭସାଣି ଶୋଭାଯାତ୍ରାରେ ୧୦ ମେଢ଼ ସାମିଲ ହୋଇଥିଲେ। ବାଜାବାଣ, ପାରମ୍ପରିକ ନୃତ୍ୟରେ ଅଞ୍ଚଳ ଦୁଲୁକି ଉଠିଥିଲା।  ସିମିନଈ ତଥା ଏହାର ଆଖପାଖ ଗ୍ରାମରେ ୭୦ବର୍ଷ ଧରି ଶାରଦୀୟ ଦୁର୍ଗାପୂଜା ଅନୁଷ୍ଠିତ ହୋଇଆସୁଛି। ସିମିନଈ ବଡ଼ବଜାର ପୂଜା ସଙ୍ଗଠନ, ଦୋଳମଣ୍ଡପସାହି, ଶିଶୁସଂଘ ପୂଜା ପ୍ରତିଷ୍ଠାନ, ତରୁଣ ଦୁର୍ଗାପୂଜା ପ୍ରତିଷ୍ଠାନ, ଗାନ୍ଧୀବଜାର, ଜଗନ୍ନାଥ ମଣ୍ଡପ, ଭଗବାନପୁର, ନୂଆସାହି, ଭାଗବତ ମନ୍ଦିର ସାହିରେ ଦୁର୍ଗାପୂଜା ଅନୁଷ୍ଠିତ ହୋଇଥିଲା। ସେହିପରି ମୂଳିସିଂହ, ଅଙ୍କରାନ୍ତିପୁର, ନୀଳାମ୍ବରପୁର, ମହେନ୍ଦ୍ରପୁର, ସାଇଁବିରି, ଗଦାଶିଳା, ଚାଇଁପୁରରେ ୧୨ ମଣ୍ଡପରେ ମା’ ବିରାଜିଥିଲେ। ଲକ୍ଷାଧିକ ଶ୍ରଦ୍ଧାଳୁ ପୂଜାର ମଜା ନେଇଥିଲେ।
ନିର୍ଦ୍ଧାରିତ ସମୟରେ ମେଢ଼ଗୁଡିକ ସିମିନଈ ଯାତ୍ରା ପଡ଼ିଆରେ ପହଞ୍ଚତ୍ଥିଲେ। ସେଠାରୁ ଶୋଭାଯାତ୍ରା ବାହାରି ଦାଣ୍ଡିମାଳ ହାଇସ୍କୁଲ ଯାଏ ଯାଇଥିଲା। ଏହାପରେ ୫୫ନଂ. ଜାତୀୟ ରାଜପଥ ଦେଇ କେନାଲରେ ବିସର୍ଜନ କରାଯାଇଥିଲା। ସଦର ଏବଂ ଝାରଗାଡ଼ିଆ ପୋଲିସ ସମେତ ପୂଜା କମିଟି କର୍ମକର୍ତ୍ତା ଶାନ୍ତିଶୃଙ୍ଖଳା ରକ୍ଷାରେ ନିୟୋଜିତ ହୋଇଥିଲେ।